السبت، 31 ديسمبر 2011

كلام جوايا


كنا في القاهرة امبارح

اليوم كان جميل قوي

انا مبقتش ايناس بتاعت زمان اللي مليانة نشاط وفرح

واحنا راجعين كنا هنعمل حادث بسبب مطب غبي وغير قانوني معمول على الطريق السريع راسي اتخبطت في سقف العربية جامد ومعرفش ازاي وصلت راسي للسقف

بس كان نفسي مرجعش لمحافظتي تاني أيًا كان المكان اللي هكون فيه عند ربنا او في بيتنا اللي في القاهرة

المكان كان هادئ جدًا ناس تحسها من سنين فاتت

الجو كان جميل جدًا في المدينة دي

...........

كان نفسي اعيط
كان نفسي "أباي باي" للست اللي واقفة في البلكونة واقولها اقنعيهم نفضل هنا شوية

كان نفسي حاجات كتيرة قوي

بس مش كل اللي بيبقى نفسنا فيه بنلاقيه

مريت على اماكن كتير محفورة في الذاكرة وفكل مكان فيهم ليا ذكرى مع حد

بابا مش دا الشارع اللي اتزنقنا فيه في يوم في الزحمة والشارع كان مقفول

بابا مش دا المسجد اللي كان فيه كتب كتاب فلان

احمد مش دا الكوبري اللي عدينا من تحته يوم فرح اختنا

ماما مش دا الشارع اللي كنا بنيجي فيه سوا

وفخيالي بقول لحالي .. مش دا المكان!! مش دا المكان!!

وياريت اللي بنحلم به بنلاقيه

لكن واضح انه مليش مكان غير هنا وفي المكان التاني اللي محرم عليّ اختياره

ولما رجعت

قلت ما رتني ما كنت رجعت

...

انا نفسيتي تعبانة قوي ومش عاوزة أي حد من اللي حوليا يحس بدا

بتصدم في ناس كتير قوي لدرجة بتخليني مش قادرة ومحتاجة أتقيأ

وسط العمل في مصر تحديدًا ومع الطبقات الدنيا وسط بغيض بغيض بغيض

أنا تعبانة قوي ولما بحاول ألمح لحد ينصحوني بالصبر والصمت والاكتفاء بأضعف الايمان وانا تعبانة وزهقت من التثبيط وزهقت من الفسااااااااااااااد اللي في قلوب الشعب المصري

انا بقيت بشك هو انا اللي مش مصرية ولا فيه ناس زيي وانا مش لاقياهم ولا الناس دول هم بس اللي وحشين وشايفين نفسهم حلوين

ولا انا كمان وحشة وحاسة نفسي كويسة زي مانا شايفاهم وحشين في حين انهم شايفين نفسهم حلوين

"محدش بيشوف نفسه كخ"

أول ما قابلتني الصبح قالتلي سمعت عنك أخبار وحشة امبارح

كنت عاوزة أصرخ فيها بكل ما فيا بالعكس اللي انتي سمعتيه هو كل الأخبار الحلوة

انك لا تهدي من تحب والله يهدي من يشاء

اللهم اهدني لصراطك المستقيم
اللهم اني أسألك رضاك والجنة وأعوذ بك من سخطك والنار
اللهم لا تجعل مصيبتي في ديني

للحظة امبارح وانا هناك فكرت في الصفاء النفسي اللي كنت فيه
"لو كان فيه خطيب ونحكي ونخرج عن الحوارات المتعارف عليها الآن"
وفجأة استيقظت من هذه اللويحظة النادرة التي افتقدت فيها شخص مستحيل أن يوجد فلا أحد يستحق
وأنا لست على استعداد لتحمل أحد أو تحمل مسئولية ما بعد المعرفة

انتهى

شكر خاص لوالدتي التي لبت لي رغبة كنت أطمح إليها من مدة
فقد سمحت لي بارتداء الخاتم
*******


يا بلدي طول عمري بقول بحبك انتي بحب ترابك وأهلك مش هيكرهوني فيكي


وجت لحظة وقلت خلاص مفيش أمل


ولما نزلت ورحت العمل


وشفت قد إيه فيكي بيتعمل


قلت مستحيل يا بلدي أسيبك لهم


هروح أتعلم في بلاد برة وأرجعلهم


لكن مستحيل هسيبك يا بلادي يا غالية عليا يا كل ما ليا


انتي المكان الوحيد اللي ممكن أتمرمط فيه وانا راسي مرفوعة


يا بلدي يا بلدي يا بلدي


انتي سمعاني!!!


لا استطيع مواصلة الكتابة فربما علا صوت نحيبي

دوريلي على عروسة

بسم الله الرحمن الرحيم
السلام عليكم ورحمة الله وبركاته

تصدق مكنتش أعرف ان الكلمة دي صعبة قوي كدا الا لما قلتها

دوريلي على عروسة
...

يا نهار ابيض

المشكلة ان سهل قوي تدور لواحدة على عريس لكن صعب جدًا لما تدور لواحد على عروسة

معرفش صعوبتها جاية منين تحديدًا

يمكن لأن الطبيعي ان البنت هي اللي بيتعرض عليها العرسان وهي اللي تقرر توافق عليهم أو لأ

يمكن لأني لو اقترحت على ولد عروسة يبقى بدبسها بعكس لو عرضت على بنت عريس هو مش هيبقى متدبس لأن في الغالب الرجل قراره من دماغه لكن البنت قرارها منبثق من آراء أهلها

يمكن لأني نفسي اختارلك أحسن واحدة في الكون وفي نفس الوقت عارفة ان انت مش احسن واحد فالكون فهحس اني بظلمها

يمكن لو كان حد تاني ملوش أي علاقة بيا كان الموضوع هيبقى أبسط شوية يعني مبقاش انا مقياس للحكم على الشخص دا أو دي بمعنى لو ناس معرفهمش وحابة العب دور الخاطبة فالطرفين هيبقوا عارفين ان دوري مجرد اجتهاد وهيسعى كل واحد فيهم لاكتشاف الطرف الاخر بنفسه، لكن لما يكون الطرفين مقربين هتبقى صعبة قوي انا كدا هبقى عاملة زي التوكيل اللي بيدي شهادة ضمان على المنتج

وبصراحة انا مضمنش حد

الخميس، 29 ديسمبر 2011

اليوم

بسم الله الرحمن الرحيم
السلام عليكم ورحمة الله وبركاته

كان مختلفًا بكل ما تحمل الكلمة من معنى

آي نعم لم أستطع إخراج كل شحنتي وتحضيري للموقف الذي كنت قد حضرته

ولكن أيًا كان ما لا يدرك كله لا يترك كله

الحمد لله وربنا يجعل أيامي كلها صواب وثبات وثقة

ربنا ينصرني على من يعاديني ويرد كيدهم في نحرهم ويهد لي العاصي ويهدي على يدي الناس

اللهم آمين

اللهم استرنا فوق الأرض وتحت الأرض ويوم العرض

اللهم وقف لي أولاد الحلال وابعد عني أولاد الحرام

سألتها كثيرًا عني

عندما ملّت من كثرة الأسئلة أجابتها: لو عندك لها عريس قوليلي وأنا أجيبلك بياناتها

هي تعلم أن سؤالها ليس حبًا فيّ ولكنه بغضًا في هذه الفتاة "بنت امبارح" والتي هي "حتة" معلمة بالحصة وأتت لتحاول إثنائهم عن قناعاتهم القديمة

 فأرادت فقط أن تنهي الحديث معها

الثلاثاء، 27 ديسمبر 2011

اعراض غريبة

بسم الله الرحمن الرحيم
السلام عليكم ورحمة الله وبركاته

شكلك يا ضرسي انت الوحيد اللي تقدر تفرض رأيك عليا

أنا بكره دكاترة الأسنان

والضرس دا بالذات هو اللي كرهني فيهم

كانت سوسة صغيرة

دكتور الله يسامحه "مع انه أشهر دكتور في محافظتي وأغلاهم" الدكاترة بتوع الامتياز بيتدربوا عنده

وحضرته بدل ما يراعي اني بروحله ومش بسترخص عشان عارفة انه المفروض شاطر الا انه لم يتورع انه يسيب الزباين بتوعه لطلبة الامتياز اللي بيشغلهم عنده بما اني حالتي مش مستاهلة خبرة

وجناب الدكتور الامتياز مرمط بكرامة الضرس الأرض

وجه الدكتور الكبير يحاول يظبط شوية من اللي بيتمرن عمله بس برضه مفيش فايدة وانا اتخنقت من صوت مكنة الحفر واحساس الحفارة وريحة البنج والقرف وقررت اني أقوله خلاص حلو جميل مش مضايقني وبقيت بحاول أتأقلم على الضرس بحالته الجديدة

ومشيت وبعدها بسنة تقريبا رجع ضايقني تاني ورحت لدكتور تاني والدكتور التاني حاول يحسن من الصورة شوية وكذلك انا مرتاحتش وكذلك مرضتش اجادل لأني أصلا كارهة حوار دكاترة الاسنان وبحس ان مرواحي على العيادة مماثل لطلوع روحي

وحتى الان ورغم مرور السنين الا ان نفس ذات الضرس الـ....."الله يسامحه" وانا من فترة بتجاهل انه بيألمني مع تغير درجة حرارة فمي الا انه زودها امبارح والنهاردة

خايفة الدكتور يقولي انه مجرد السوسة تحولت مع اهمالي لحاجة الضرس لحشو عصب

انا بحب أسناني جدًا ودا اللي بيخليني بكره دكاترة الأسنان اللي بحس انهم واخدني سلعة علشان يعرضوا مهاراتهم المنيلة بستين نيلة

وخايفة أروح للدكتور يقولي يا شيخة سيبك من الضرس دا احنا نخلعه ونركبلك مكانه طربوش

حاكم دكاترة الاسنان دول اكترهم مبيفكرش في الناحية الانسانية المعنوية للبشر ومعندهمش تفكير اساسا تلاقيه حافظ واحد زائد واحد يساوي اتنين وبينفذها على الكل أيًا كانت الاعراض

لدرجة اني رحت في مرة لدكتور اسنان كانت اللثة عندي وارمة جامد وسببتلي مشاكل صحية تانية وهو بكل بساطة بيقولي دا بسبب ضروس العقل وهي ضروس ملهاش لازمة وهخلعهالك

والله حسيت بقمة الاستهبال اللي في الارض يعني ضرس لسة طالع ورور تخلعهولي بتاع ايه؟ والفك أصلا مفيهوش مشاكل ولا الضروس مكركبة فوق بعض بس هو متعود ان ضرس العقل لما بيطلع والواحد مبيعرفش يوصله بفرشاة الاسنان فبالتالي هيسبب لتراكم الجير والتسوس ويؤدي لتلفه وتلف اللي جنبه وموال كدا قالهولي ميدخلش في زمتي بتلاتة تعريفة وسبته ومشيت

ولا الدكتور التاني اللي رحتله وبيقولي على فكرة انتي محتاجة "تقويم" قلتله بكل بساطة وثقة على فكرة انا عجباني أسناني وبحبها كدا
طبعا اتحرج وقالي أكيد طبعًا المهم انك تبقي مرتاحة "مع العلم ان اسناني أساسًا منتظمة جدًا ومش مكركبة اصلا"

والدكتور اللي اروحله الاقيه بيشتغل من غير كمامة ودي أكتر حاجة بتقرفني في الحياة

واللي الممرضة بتاعته مش لابسة جوانتي وحاطة ميكب الدنيا والآخرة وبحث انها كتلة جراثيم ماشية على الأرض

بجد بجد بجد انا بكره دكاترة الأسنان

مبحبش ريحة البنج

مبحبش صوت المكنة

بقشعر لما بتلمس أسناني

والبنج بيجبلي صداع قاااااتل بعد ما مفعوله بيروح

ومقدرش استحمل الألم لو مأخدتش بنج

يعني مقفلة من كل ناحية

امضاء أخير علشان منساش مع ان عمري ما هنسى

انا
بكره
دكاترة
الأسنان

آه يا ضرسي

الاثنين، 26 ديسمبر 2011

شهر أبريل

بسم الله الرحمن الرحيم
السلام عليكم ورحمة الله وبركاته

أوله فرح
وآخره فرج
بإذن الله

الخميس، 22 ديسمبر 2011

مُتفائلة

بسم الله الرحمن الرحيم
السلام عليكم ورحمة الله وبركاته


متفائلة

ولست أدري السبب

الثلاثاء، 20 ديسمبر 2011

ايه دا؟!

أيه دا؟!

لأ ثانية ثانية ثانية

معلش كدا وقف الشريط لو سمحت كدا شوية

لألأ ركز أكتر في الصورة

مش حاسس إن المخرج الغزالة لفت معاه؟!

هو المنتج شربه حاجة عشان يزود إيرادات الفيلم ولا ايه؟!

أقولكم على حاجة اللي بيحصل أصله بكل بساطة حاجة واحدة..هبل

عارف لما واحد رخم من فتوات الشارع كدا يجيلك ويمسكك جامد من ايدك ويخليك تضرب نفسك

وانت اللي بتضرب وانت اللي بتتوجع

وياسلام بقى لما تقتنع ان ايدك بنت الـ........ دي عاوزة قطعها لأنها عمالة تضرب فيك وتستاهل الحرق 

لألألأ سيبك انت من اللي ماسكك من الأصل ماهو دا مش موضوعنا انا اقولك اصل ايدك دي لو مش موجودة مكنش حد مسكك منها اااااااه امال انت فاكر ايه؟!

وصلتك بقى الفكرة ياهبل اقطع ايدك علشان محدش يمسكك منها ويخليك تضرب نفسك انت مش هتقدر على ايدك ولا ايه؟!

ايه يا جماعة ما تفوقوا من الهباب اللي بتشربوه دا

نور النور يابني واقفل الفيلم الغبي دا

ليتكم أعطيتموني عِلم

بسم الله الرحمن الرحيم
السلام عليكم ورحمة الله وبركاته


بُقين ناوية أقولهم في امتحان الشفهي وأجري على الله

واللي يحصل يحصل

أنا يوم ما فكرت أدفع فلوس في الكلية دي وأقدم في الدراسات العليا مكنش غرضي أشتري شهادة تتحط في "السي في" بتاعي.. لكن كان غرضي إني أحصل على عِلم بجد..

دفعت إلى الآن ما يزيد عن ألف وخمسمائة جنيه - في ترم واحد- لم أستفد منه بأي شيء -تقريبًا- وإن كان استفاد من خلالي الكثيرين

ولكن تبقى في النهاية النقطة المركزية

أين العلم الذي دفعت من أجله هذا المال؟!

وإنني على أتم استعداد لدفع المزيد.. ولكن في مقابل عِلم وليس في مقابل أوراق بلا قيمة ولا معنى أُضيفها في سيرتي الذاتية فتشينني أكثر ما تزينني

وشكرًا

وليعطِ الله كلًا حسب نيته

عفوًا ولكنني سوف أسألكم عن أموالي يوم القيامة

ليتكم أعطيتموني عِلم أذكركم به

الاثنين، 19 ديسمبر 2011

بهدلتيهم

بسم الله الرحمن الرحيم
السلام عليكم ورحمة الله وبركاته


هي: بهدلتيهم

هي: مكنش قصدي

هي: كدابة

هي: أنا معملتش حاجة زيادة عن غيري

هي: لأ عملتي

هي: عملت إيه؟!

هي: أنتي عارفة كويس أنتي عملتي إيه

هي: دي مش مشكلتي

هي: لأ مشكلتك

هي: إزاي؟

هي: لما تبقي عارفة إنك مؤثرة وتستمري في لعب نفس الدور تبقى مشكلتك ولا لأ؟!

هي: يعني أروح أولع في نفسي يعني علشان أريحك؟!

هي: مقلتلكيش ولعي في نفسك.. بس برضه تقدري تتحكمي بطريقة تانية ومفيش داعي للبهدلة

هي: خلاص يا ستي حقك عليا

هي: متعتذريليش أنا اعتذري لنفسك -ولهم مع إنها خلاص مبقتش تنفع- اللي حصل حصل

الجمعة، 16 ديسمبر 2011

ماذا عساي أن أفعل

بسم الله الرحمن الرحيم
السلام عليكم ورحمة الله وبركاته

زخات المطر التي تعتمل في صدري كيف يمكنني إيقافها؟!
أحاول إخفائها أجل ولكن.. هل سيصمد كياني الصغير أمامها؟!
جو بارد رعد وبرق في ليل صامت كاحل وفقر
خوف حزين قلق أليم وحدي ولست وحدي بالمحيط

غدًا تشرق سمائي
غدًا تدفء أجوائي
غدًا تطمئن روحي
غدًا ينبض قلبي
غدًا سأرى قوس قزح

أنتظرك يا غدي فلا تتأخر عليّ
أرجوك لا تتركني أنتظر طويلاً

في هذا البرد

الأربعاء، 14 ديسمبر 2011

بلاد طيبة

بسم الله الرحمن الرحيم

السلام عليكم ورحمة الله وبركاته


انتي بلاد طيبة وقريبة وحبيبة انتي أمل وحياة

وقت الخطر أمي بتحملي همي حضنك دفا وأمان

لكي أنا غنيت يا دنيتي وناسي

إذا كنت مرة جنيت حقك على راسي

لا نسيت ولا بنسى قلبك لمس لمسة قلبي اللي داب أحلام

يا بلادي ضميني حضنك بيحميني مالغربة والأيام

لكي أنا غنيت يا دنيتي وناس إذا كنت مرة جنيت حقك على راسي

حقك على راسي

حقك على راسي




مصر..بجد وحشتيني ربنا يطمني عليكي

***********




مكنتش متخيلة اني في يوم من الأيام هيوصل بيا الحال ان فكرة نزولي للعمل مع الأطفال تبقى عبء أتمنى التخلص منه وأتململ وأنا أسعى إليه

مؤكد الخطأ يكمن في أنا ولكنه أضحى واقع أتمنى أن أستطيع تغييره




***********

ميس انتي بتحبيني صح؟! كتير من الأطفال بيقولوهالي وطبعًا بأكدلهم ان الاجابة صح




أنا بحبك قوي يا ميس كذلك أطفال كثيرون يقولونها متبوعة إما بحضن أو قبلة على خدي وأنا جالسة أصحح واجباتهم أو بقطعة حلوى




العيال داوشينا في البيت دايما أبلة إيناس أبلة إيناس العيال بيحبوكي قوي




أبلة ايناس جت أبلة ايناس جت أبلة ايناس جت




ميس ايناس بااااي ميس ايناااس ازيك يا ميس




الأطفال بيحبوكي قوي يا ايناس مش واخدة بالك؟!




...............

أنا بحبكم كلكم جدًا بس على الرغم من حبي لكم وحبكم ليا ليه دائمًا في وجودي لا تحاولون الالتزام بالقواعد النظامية على الرغم من التزامكم بها مع باقي المعلمات "العيب فيا ولا في ايه؟!" أكيد فيا بس منين؟




************

النهاردة قررت أساعد مدرسة الفصل في كتابة واجبات اللغة العربية والحساب "يعني مزاجي كان جايب كدا"

ونديت على "محمد سمير" تعالى يا حبيبي قول معايا "وانا بكتبله الحرف في الكراسة" ميم ميم ميم




أنا كان عندي برد وطبعًا يتبعه زكام وبالتالي المهم بتاعتي كانت بيب مش ميم فلقيت محمد بينطقها زي مانا بنطقال

يا حبيبي انا عندي زكام بص لحركة بقي وقلدها وحاولت وهو كان بيقولها شوية صح بس برضه زيادة تأكيد قلت لمروة "مدرسة الفصل" خدي يا مروة الله يكرمك انطقيله حرف البيب انا اصلي عندي برد وهو بينطقها زيي




الولد راح لمروة بس غالبا بعد ما كنت انا "عن غير قصد كسرت نفسه" وهي بتحاول تقريه وهو مش راضي ينطق خالص

أنا للوهلة الأولى افتكرته مش بيحب مروة عشان كدا مش عاوز ينطق معاها فندتله تاني علشان أكمل انا معاه وجالي وحاولت اخليه ينطقها لكن مرضاش أبدًا وفضلت أدادي فيه وأصالحه وأقوله يا حبيبي الميس هي اللي عندها برد ومش عارفة تنطق انت كميل وشاطر بس على مين بقى اللي حصل حصل انا اللي غلطانة من الأول مكنش المفروض أديله حرف الميم أصلا

************

بطة بطة بطة

بطة بطة بطة

بطة بطة بطة




بأمانة معرفش كنه الأغنية دي غير اني امبارح وأنا قاعدة في فصل الحضانة وقت المرواح وكنت بكتبلهم الواجب في الكراريس وبعض من الأطفال متجمعين حولين المكتب هم واخواتهم علشان منتظرين كراريسهم علشان يروحوا وشوية أطفال بيلعبوا في خلفية المشهد وإذا بي أسمع هذا المقطع الغنائي السابق من بعض البنات وواقفين يسقفوا بقى وهيصة




أنا بصراحة كان كفاية عليا دوشة العيال بتوع ابتدائي اللي في الطرقة ودوشة الأطفال اللي بيلعبوا ومكانتش ناقصة غير البرد اللي جايب أجلي




بصيت ولقيت إن "بنت الدادة" هي اللي بتقود هذا التمرد باعتبارها ذات ثقل وظهر في الحضانة -ألا وهي والدتها- وعليه باقي البنات بيعتبروها "البيج بوص" فقررت أحسم الدوشة من منبعها وإذا بي أصرخ




ريهاااااااام

طبعًا ريهام بصتلي وعرفت اني أفشتها فسكتت هي والبنات اللي كانوا معاها وفضلت واحدة بس هي اللي عمالة تغني بطة بطة بطة وهي مستغربة باقي البنات سسكتوا ليه وبتبصلهم باستغراب ومش واخدة بالها اني بصالها




فإذا بي كذلك أوقظها على صوتي باسمها رواااااااان

............

مقولكوش على المنظر دا بقى اللي مهما حكيته مش هتقدروا تتخيلوه زي ماهو

روان دي بنوتة عسولة خالص ماشاء الله ومن البنات الهادئة اللي ميطلعش منها الشعننة دي أبدًا

أول ما سمعت اسمها اتصرعت وبصتلي وهي مفزوعة ولسة عمالة تقول بطة بطة بطة .. بطة بطة بطة .. بطة بطة بطة




طبعًا صوتها مع كل مقطع بيضعف عن المقطع اللي قبله لحد ما بقت بتحرك شفايفها بس بالكلمات من غير صوت خالص

طبعًا أنا شفت المنظر دا مقدرتش أمسك نفسي من الضحك بعد ما كنت في قمة نرفزتي




ورجعت البيت وحكيت لأختي الموقف وعلقت معايا الاغنية

وبطة بطة بطة

بطة بطة بطة

بطة بطة بطة




بااااااااااااس.. ايه البواءة اللي انتي فيها دي انتي بتعلمي العيال الرقي ولا هم اللي بيعلموكي البواءة لو سمعتك بتقولي بطة تاني هموتك ..طبعًا كل دا على لسان اختي الكبير :$




**************

طبعًا الأطفال دائمًا بيبحوا يهزروا ويلعبوا مع بعض

وديما كذلك هزارهم بيقلب خناق

فكتير بحاول ألحق الموضوع من أوله بدل مالاقي أمهات العيال جاينلي تاني يوم يردحوا لبعض في الحضانة "ودول ناس مبتتوصاش"




بنتين كانوا قاعدين يهزروا مع بعض الهزار اياه وكل واحدة عمالة تزق التانية او تشد شعرها لحد ما وصلت انهم بيتبادلوا الضرب بالألم "طبعًا كل دا وهما بيضحكوا" انا بقى وقتها قلت مبدهاش طالما الموضوع قلب بأقلام يبقى قريبا هتقلب بخناقة فقررت أني أصيح فيهم




هبة..نانسي.. وبعدين في هزار البوابين دا؟!!!!!! دي مش طريقة لعب




ولكن لما تداركت الموقف بعدها "يادي الكسوف وارد جدا اكتر من طفل والده يبقى بيشتغل بواب في هذا الوسط واضح اني لم احسن اختيار التشبيه"




وبعدها اصبحت استخدم مصطلح "هزار بايخ"




**************




كتير بيبقى نفسي اجيب كاميرا ديجيتال واصور الأطفال دول بجد لهم مواقف وأوقات رائعة الجمال يصعب تفويتها




************




كان نفسي أبقى مدرسة في حضانة بجد انا حاسة اني دخلت ملجأ أو دار إيواء فقيرة ومنعدمة الموارد

**************




وخارج أسوار الروضة انتقل




احتسبتك عند الله رجل وقور رب أسرة خريج أزهري له هيبته ووقاره واحترامه

أجل دربتني ولكن.........

أخشى أنني سأضطر يومًا إلى حجبك من قائمة معارفي.. هزارك الدائم "الزائد عن الحد" يضايقني ويضعني دائمًا في موقف محرج فلا أستطيع أن أطالبك بالكف عنه ولا أستطيع تقبله .. هذه أنا فتاة متحفظة فعفوًا اعذرني لا استطيع الاستمرار هكذا




***************




أنا لا أعد ولكني أحاول

**************
ياسمينا..
مازلت أشرد عندما أنظر إليكِ

السبت، 10 ديسمبر 2011

لو سألوك عني

بسم الله الرحمن الرحيم
السلام عليكم ورحمة الله وبركاته
لو سألوك عني أخبرهم .. بأني كنت ماضٍ كنت وهم

أخبرهم بأن الليالي الحزينة .. باتت عزيزة باتت حلم

أخبرهم بأن الدموع بكت .. وفاضت وفي جوف السماء ارتمت

أخبرهم بأني أصبحت سراب .. بقعة ماء على أسفلت العذاب

أخبرهم بأن المعاني الجماد .. شكت للفؤاد من فرط العناد

أخبرهم بأني سأظل أنا .. أنا أنا قابعة هنا

أخبرهم أخبرهم أخبرهم أخبرهم

ولماذا الخبر ولماذا الضجر .. وكل ما كان أضحى عبر

عيوني الندية وروحي القصية .. وعقلي وقلبي والحرب الأهلية

وماضي وحاضر .. مستقبل يناضل
وأنا أنا .. وسأظل هاهنا

فيا رب من غدٍ تضاء له الشموع .. وياويل ذكريات تقاوم بالدروع

دعوني أناجِ القلب الحليم .. وقلمي الفارغ ونبضي الحزين
دعوني أحدث قلوب الحجر .. وصدق الفؤاد وزخ المطردعوني وشأني وعقلي وفكري .. دعوني ألملم شئوني وأجري
دعوني دعوني دعوني دعوني

وعلى كلماتي لا تلوموني

إمضاء:
E73

لو كان للأحلام نصيب


بسم الله الرحمن الرحيم
السلام عليكم ورحمة الله وبركاته

أين توجد تلك السينيما التي أدخلها يوميًا بعد الخلود للنوم؟!

منذ أن كنت صغيرة وأحلم بقطعة الـ"جيرسي" أو كيس الـ"شيبسي" وأتشبث به جيدًا حتى أجده عندما أستيقظ لأنني في كل مرة أستيقظ لا أجده بجواري

وفي ذات مرة خبأته أسفل المخدة وعندما استيقظت سريعًا وبحثت عنه ولم أجده وذهبت إلى أمي أبكي وأشكو إليها أن هناك من يأخذ حلوتي وأنا نائمة

لن أنسى بالطبع أول كابوس حلمت به والذي استيقظت منه مرتاعة وحتى الآن لست أدري ماذا حدث وقتها كل ما تذكرته بعد أن استيقظت أنني كنت جالسة على طرف الفراش أسند رأسي على ظهره وأبكي ورأسي تؤلمني ووجدت والدي وأختي يهرعون إليّ وبصيص نور أصفر يأتي من باب الحمام المجاور واختي تسألني ماذا حدث ما هذا الصوت؟ وأنا لم أكن أعرف أي شيء أعتقد أنني سقط وارتطمت رأسي بحافة المكتب ثم عدت وجلست على طرف الفراش واستيقظت وقتها ربما هذا هو أكثر التفسيرات منطقية لأنني اكتشفت في اليوم التالي أن جبهتي متورمة شيئًا

وحلم آخر مرعب حلمت به عندما كنت عند جدتي وصحوت مفزوعة وأخبرت جدتي فقالت لي أنني لم أقرأ القرآن قبل نومي وهذا هو السبب وعندما قرأت معي ونمت حلمت بأنني وسط حقول من الأزهار والورود أجري وألعب وأشتم رائحتها

على الرغم من كثرة أفلام الرعب التي دخلتها في أحلامي إلا أنني أستيقظ أحيانًا مستمتعة فليس في كل الأحوال أكون مرتاعة رغم انحباس صوتي وثقل خطواتي وعدم قدرتي على الهروب او الاستنجاد بأحد

أحيانًا عندما ننام تراودنا احلام جميلة بل ورائعة ونتمنى أن ننام مرة أخرى لنستكملها

وننام وننام وننام ولا نحلم بشيء ولا تكتمل أحلامنا

أحيانًا ننام فقط لنحلم بشيء نتمنى حدوثه وقتها تداعبنا الاحلام فتارة تستجيب وتارات تخلف توقعاتنا

ولكن ماذا نفعل عندما يكون نومنا فقط درب من دروب الروتين الذي لم نعد نستمتع به ولا نحلم فيه بشيء ولا حتى يتجدد نشاطنا معه ولا نشعر بالدفء الذي ننشده في أيامنا الباردة

شعور صعب ننام ونصحو دون أي راحة دون أي أحلام دون أي تغيير فقط ننام لأننا تعلمنا أن النوم مفيد وصحي ومطلوب لتجديد الطاقة واستمرار النشاط

أفكار سوداء وأعلم أن المستقبل أفضل بكرم الله

يا رب اجعل أيامي في هذه الدنيا صلاح وفلاح وستر وطاعة

واجعل أيامي بعدها "لست ادري لماذا انتابتني نوبة بكاء عند كتابة هذه الكلمة" قبر روضة من رياض الجنة

وارزقني الستر فوق الارض وتحت الارض ويوم العرض

ياحي يا قيوم برحمتك أثتغيث اصلح لي شاني كله ولا تكلني لنفسي طرفة عين ولا لأحد من الناس

اللهم اختر لي الخير فأنا غير قادرة على الاختيار

اللهم قدم لي الخير فأنت الحنان المنان

اللهم توفني وأحسن خاتمتي واقبلني قبولاً حسنًا يا رب العالمين آمين آمين آمين

الجمعة، 9 ديسمبر 2011

جرة قلم


أو تكتكة كي بورد
No problemمبقتش فارقةطالما كل شيء انتهى

الأحد، 4 ديسمبر 2011

وينك يا طول البال

بسم الله الرحمن الرحيم
السلام عليكم ورحمة الله وبركاته

صبري عليك طال طال واحتار فيك أمري
جفا ولا دلال خليت دمعي سال سال عالخد صار يجري

مش عارفة ليه جاية على بالي

المهم نسيبنا من دي

تفاجأت النهاردة لما عرفت من جروب الدبلومة على الفيس بووك ان جدول الامتحانات نزل

"ابتسامة ساخرة" هو احنا لسة جبنا الكتب؟! هو لسة فيه دكاترة انتظمت؟!

لأ والأدهى أول مرة اسمع عن مادة ممتدة لها امتحان نصف عام وملهاش لا كتاب ولا محاضرات هندخل الامتحان نمخمخ

وكان الجدول كالتالي


جدو إمتحانات الفصل الدراسي الأول- دور يناير 2012- الزمن من 1 ظهراً إلى 3 م.

1- الخميس: 5-1-2012 المنهج التكنولوجي.
2- الخميس: 12-1-2012 تفريد التعليم.
3- الأثنين: 16-1-2012 تكنولوجيا التعليم فئات خاصة.
4- الأربعاء: 18-1-2012 إنتاج المواد التعليمية.
5- الأثنين: 23-1-2012 قاعة بحث.

أعتقد أهم شيء إننا دفعنا المصاريف ودفعنا تمن الكتب وطلعنا الكارنيه هنعوز إيه أكتر من كدا هننهب يعني!!!!!

الأربعاء، 30 نوفمبر 2011

حاجات غريبة

بسم الله الرحمن الرحيم
السلام عليكم ورحمة الله وبركاته

حاجات ملهاش علاقة ببعضها بس يلا الحساب يجمع

سينما أحلامي..أحب أقولك انتي بقيتي بتعرضي أفلام غريبة قوي مؤخرًا الصراحة<<بس ببقى مستمتعة استمري استمري

في الحضانة..

العيال دول أشقية قوي

محمد حمادة<<هو اسمه كدا.. كان قاعد معايا فيوم بعد ما باقي الأطفال روحوا ولسة محدش جه ياخده
وانا قاعدة قررت أقلع النظارة عشان ألمعها

أول ما قلعتها لقيته بيبصلي كدا "مستاء" وبيقولي "انتي عملتي كدا لييييييييييه؟"

أنا بصراحة استغربت عملت ايه؟

كدااااااااا

كدا ايه يعني قلعت النظارة؟

آااااااااه

ايه هو انا كدا وحشة ولا ايه؟

لأ حلوييييييي بس بيها أحلى

ههههههههههههههه بصراحة هو أول حد يقولي كدا بس خلينا نمشي ورا آراء الأطفال انا أصلا جيباها عشان عارفة انها هتعجب الأطفال بالفريم الأسود التخين بتاعها دا

المهم يوم تاني ونفس ذات المحمد حمادة بس المرادي كان الصبح بدري والأطفال كانوا قليلين وهو دايمًا بيحب ييجي يقعد جنبي طالما لسة مش بشرح وبرضه قلعت النظارة ألمعها لأن الدنيا كانت مطرة وبلتها

المهم لما قلعتها لقيته بيقولي انا كدا مش شايفك البسيها تاني

طبعًا أنا ضحكت هو مين اللي مش شايف مين تقصد انا مش شيفاك؟

لأ انا مبقتش شايفك لما قلعتيها

بس كدا حاضر من عيوني هلبسها تاني ولبستها

الولد دا أصلا مش قادرة أقولكم عليه ولد خطيييييييييير ماشاء الله عليه عسولة خالص كيوتي كيوتي كدا هو كلابيظو خالص وبيتتك عالحروف وهو بيتكلم وبياخد نفس ما بين كل كلمة والتانية ورغم شقاوته الزايدة إلا انه شطور وماشاء الله عليه بيلقط النطق بتاع الانجليزي بسرعة وبينطقه صح

نيجي بقى للأطفال اللي بقوا دلوقتي في أولى ابتدائي وكنت انا بدرسلهم السنة اللي فاتت وكل يوم يمروا عليا في الفسحة ويسلموا عليا

ولا البنات بتوع الحضانة دلوقتي وكل شوية ألاقي واحدة جيبالي معاها بسكوت الأول حاولت ماخدش منهم الحاجة بس كل ما كنت بحاول اقنعهم ان هم اللي ياكلوا حاجتهم كنت بلاقيهم زعلوا كتير وفيوم بنوتة كانت هتعيط لما مرضتش آخد منها البسكوتة ومن يومها مبقتش أحب أكسر بخاطر حد

بس بصراحة المسألة زادت عن حدها يا جماعة بقوا بيجيبولي يستفندي كمان انا حاسة ان باقي العاملين بالحضانة فكرني بستغل العيال وبستولى على حاجتهم ههههههههههههه

اعترف اني ساعات ببقى متوحشة وألاقيني بشخط في الأطفال جامد لما يعملوا حركات غباء غبية يعني بس برجع بعدها على طول أركز وارجع لعقلي واعرف انهم مجرد أطفال واني في يوم من الأيام كنت بتصرف زيهم ومين عالم يمكن اكون كنت اغبى منهم كمان وبرجع اعتذر وأصالح وأدادي

السبت، 26 نوفمبر 2011

ساكن قصادي


كنت قاعدة قدام الجهاز بالليل بدور على أغنية لنجاة الصغيرة كانت صديقتي أيام الكلية مولِعة بها جدًا اسمها "عيون القلب"

أنا مكنتش بحب نجاة أصلاً بس هي دايمًا كانت بتشعر في صوتها وأغانيها

المهم قلت أدور عليها واسمعها ولقيت ماما جت وقفت جنبي وقالتلي طيب افتحي كدا كام اغنية وكان من ضمنها بتاعت ساكن قصادي وقالتلي انها حلوة قوي

المهم بقى بجد الكلمات كقصة خرافية واللحن اللي ماشي مع تطور الأحداث وصوت نجاة اللي تحسه واحدة قاعدة بتهمهم مع نفسها بجد جميلة قوي

وقعدت انا وماما نسمع طول الليل ونعيد ونزيد وأنا قاعدة طق في دماغي سؤال فبقول لماما تخيلي كدا فرح وواحدة من المعازيم قامت تهدي الاغنية دي للعروسين وبعدها قام واحد يهدي أغنية وائل جسار "اعذريني يوم زفافك"

ماما بصتلي كدا وضحكت هيهيهييي في فرح واحد!!!!!!! نفس الفرح!!!!!!!!! ههههههههههه لأ يبقى يستحسن يخلوا المأذون قاعد لآخر الفرح احتمال العروسين يغريروا رأيهم في الجوازة دي

قلتلها ولا الاتنين بتوع الإهداءات يظبطوا مع بعض ونخلص

*************
ساااااااااااااااااااكن قصاااااااااااااادي وبحبه..بحبه
وأتمنى أقابله..فكرت أصارحه
لكن أبدًا أبدًا مقدرش أقوله أقوله

وفضلت أستنى أستنى الأيام
فمعاد ما يسهر ومعاد ما يرجع
وفكل خطوة أرسم أحلام
تكبر في قلبي والقلب يطمع

وفضلت أستنى أستنى الأيام
فمعاد ما يسهر ومعاد ما يرجع
وفكل خطوة أرسم أحلام
تكبر في قلبي والقلب يطمع

وفضلت أستنى أستنى الأيام
فمعاد ما يسهر ومعاد ما يرجع
وفكل خطوة أرسم أحلام
تكبر في قلبي والقلب يطمع

وأقول مصيره هيحس بيا لو يوم صادفني وسلم عليا
هيلاقي صورته ساكنة فعينيا ويحس بها فرعشة إيديا

وأقول مصيره هيحس بيا لو يوم صادفني وسلم عليا
هيلاقي صورته ساكنة فعينيا ويحس بها فرعشة إيديا

وأقول مصيره هيحس بيا لو يوم صادفني وسلم عليا
هيلاقي صورته ساكنة فعينيا ويحس بها فرعشة إيديا

كنت حاسة إن حبه كل مادى كان بيكبر كان بيكبر
أبقى عايزة لو يكونلي قلب غير قلبي الصغير

كنت حاسة إن حبه كل مادى كان بيكبر كان بيكبر
أبقى عايزة لو يكونلي قلب غير قلبي الصغير

فضلت أماني..مع الليالي
تقرب حبيبي اللي ساكن قصادي حبيبي

اللي ساكن اللي ساكن اللي ساكن اللي ساكن قصاااااااااادي وبحبه

*_*_*_*_*_*

"اللحن في الحتة دي تحفة الترقب مع صوت الفرح"

وفيوم صحيت على صوت فرح بصيت من الشباك
زينة وتهاني وناس كتير دايرين هنا وهناك


وفيوم صحيت على صوت فرح بصيت من الشباك
زينة وتهاني وناس كتير دايرين هنا وهناك


وفيوم صحيت على صوت فرح بصيت من الشباك
زينة وتهاني وناس كتير دايرين هنا وهناك

شاورولي بإيديهم وقالولي عقبالك
شاورولي بإيديهم وقالولي عقبالك

هللت مالفرحة هللت مالفرحة هللت مالفرحة مالفرحة
هللت مالفرحة هللت مالفرحة هللت مالفرحة مالفرحة
هللت مالفرحة هللت مالفرحة هللت مالفرحة وسألت

قالوا جارك..جارك حبيبي حبيبي

اللي ساكن اللي ساكن اللي ساكن اللي ساكن قصاااااااااادي وبحبه

*_*_*_*_*_*

"على اللحن وخيبة الأمل"

رحت الفرح بالليل ورسمت فعنيا الفرحة
ساعة ماكان بيشيل بإيديه وبعنيه الطرحة

رحت الفرح بالليل ورسمت فعنيا الفرحة
ساعة ماكان بيشيل بإيديه وبعنيه الطرحة

شربت شرباتهم وأنا قاعدة بصالهم
لحد ما قاموا ومشيت ومشيت أوصلهم


شربت شرباتهم وأنا قاعدة بصالهم
لحد ما قاموا ومشيت ومشيت أوصلهم

حتى الأمل مبقاش من حقي أفكر فيه
بعد الليلة دي خلاص بقى غيري أولى به

حتى الأمل مبقاش من حقي أفكر فيه
بعد الليلة دي خلاص بقى غيري أولى به

بقى غيري أولى به

وتهت وسط الزحام ماحد حاسس بي

عايزة أجري أجري أجري وأرجع أتوه والناس يقولوا حاسبي

ناس في طريق النور ما بين فرح وشموع
ناس في طريق النور ما بين فرح وشموع

وأنا في طريق مهجور ومنوراه الدموع
وأنا في طريق مهجور ومنوراه الدموع

ولقتني فايتة من جنب بابه لا هو داري بقلبي ولا باللي نابه
ولقتني فايتة من جنب بابه لا هو داري بقلبي ولا باللي نابه

ويا ويلي يا ويلي من طول غيابه ويا ويل أيامي من جرح عذابه

ولقتني فايتة من جنب بابه لا هو داري بقلبي ولا باللي نابه

ويا ويلي يا ويلي من طول غيابه ويا ويل أيامي من جرح عذابه
عذاب الجرح اللي فاتهلي وسابه ساكن في قلبي

وساااااااااااااكن قصااااااااااااادي وبحبه..بحبه

حبيبي ساكن حبيبي ساكن قصاااااااااااادييييييييي وبحبه

************
تحفة

الأربعاء، 23 نوفمبر 2011

سوري فيه حاجة مش مظبوطة

بسم الله الرحمن الرحيم
السلام عليكم ورحمة الله وبركاته

ومن جانب مستمعة ومشاهدة وغير متابعة وغير مصدقة لكل ما يقال ومشككة

أحب أقول القصة مش مظبوطة عالمقاس

ناس تقولك عشان اللي اتهموا مبارك والعادلي بقتل المتظاهرين في يناير طب المتظاهرين بيتقتلوا والتانيين في السجن اهو يعني "على رأي اللي قال" مش هم اللي أكلوا الجبنة

وناس تطلعلك بكل سماجة وسذاجة وتقولك شفت شفت شفت ياللي قلت لنعم على الاستفتاء ايه اللي حصل مانا قلتلك من الأول

أهي بقى الكلمة دي اللي بتحرق دمي وبتحسسني ان كلها كانت تمثيلية

الا صحيح محدش قالنا هو القيادات لو كان من حقها التصويت كانت هتصوت بنعم ولا لا؟!!

فيلم عربي محروق والمصور مصمم يخبط راسه في الحيطة "على فكرة لو بصيت لورا هتلاقي الكدر أوسع وأريح"


ومع احترامي لكل الشرفاء والمحترمين اللي في الميدان ودعواتي لهم ربنا يسلمهم لكن فيه لعبة قذرة أحب أقولكم انها بتتلعب على الجانب الآخر وما الميدان إلا لفت أنظار ليلهينا عن متابعة التمثيلية

كل سنة وانتم طيبين

السبت، 12 نوفمبر 2011

Take it easy

بسم الله الرحمن الرحيم
السلام عليكم ورحمة الله وبركاته
ربنا يسترنا دنيا وآخرة يا رب

تك إت إيزي؛ نو بروبلم

عادي يعني أتخن تخينة بتعدي مبتلزقش، مش قضية يعني، وكله هيبقى في عِداد الماضي

tomorrow is a new day

الأربعاء، 2 نوفمبر 2011

أنا آسفة حبيبي

بسم الله الرحمن الرحيم
السلام عليكم ورحمة الله وبركاته
ليه مش بتسمع الكلام؟
ليه كل حاجة بقولها بتتعمد تعمل عكسها؟
ليه ساكت ومبتردش عليا؟

أنت سامعنيييييييي؟

وظل صامتًا

يأبى الرد
يأبى الطاعة
يأبى التجاوب

بالطبع جعلته يجلس بعيدًا عن الآخرين وهددتهم من يحاول التحدث إليه سوف أضربه

ظل صامتًا

حاول الرجوع إلى كرسيه
ضربت المكتب بالعصا فأصدر صوت عال رعبه كما رعب البقية وقرر أن ينصاع إلى أوامري بدلاً من أن تكون الضربة القادمة من نصيبه

وفي آخر اليوم وبعد أن استكملت نشاطي وأخذت أكافئهم على حسن السمع والطاعة بأن يخرجوا إلى "السبورة" ليستعرضوا ما تعلموه أمام زملائهم لينالهم نصيب من التصفيق

ناديت عليه كي يشارك بما تعلمه
ظل متردد كالعادة حركته أبطأ من السلحفاة

شجعته حمسته وكأن شيئًا لم يكن

أخيرًا وصل إليّ مددت يدي إليه "بقلم السبورة" وطلبت منه كتابة الحرف الذي تعلمه

كتبه بصورة صحيحة
طلبت من باقي الصف التصفيق له

ناولته عبوة البسكويت وعبوة الحليب الممزوج بالفراولة وكتابه الذي سبق وأخذته منه وداعبته وطلبت منه ألا يشاغب زملائه مرة أخرى حتى لا يحزنني منه

في اليوم الآخر "وقد علمت أنهم -الأطفال- هكذا يتصرفون دائمًا بسبب خوفهم من مدرسة الفصل الأساسية فظنوا أن كل معلمة تدخل لهم مثلها"

ألقيت السلام

ردوا السلام

طلبت منهم تناول الإفطار
تناولوه

وحبيبي الصغير اليوم سعيد وقد تغير سلوكه تمامًا عن المرة السابقة

فأنا لست بطبعي متجهمة أو شرسة ولكنني أدخل إليهم لأغني معهم أغاني ممتعة بلغة جديدة عليهم وأعلمهم ألعاب وحركات جديدة يفرحون بها

حبيبي آسفه لطريقتي في التعامل معك مسبقًا ولكنني حقًا جربت قبلها كل الحيل ولم يسعفني الوقت للصبر أكثر من هذا

40 طفل مع معلمة واحدة أعتقد انه عدد كبير مجرد التفاتة سهو منها قد تتسبب في كوارث

الاثنين، 24 أكتوبر 2011

اللهم..

بسم الله الرحمن الرحيم
السلام عليكم ورحمة الله وبركاته

بعض الأدعية

ادعوها معي

عل الله يرزقنا ويفرجها علينا من حيث لا نحتسب

دُعاء عند الاستيقاظ
***************

"الحمد لله الذي أحيانا بعد ما أماتنا، وإليه النشور"

"أصبحنا وأصبح الملك لله،والكبرياء والعظمة والخلق والأمر والليل والنهار، وما يضحى فيهما لله وحده، اللهم اجعل أول هذا النهار صلاحًا، وأوسطه فرحًا، وآخره نجاحًا"


"أصبحنا على فطرة الإسلام، وكلمة الإخلاص، وعلى دين نبينا محمد صلى الله عليه وسلم، وعلى ملة أبينا إبراهيم حنيفًا مسلمًا، وما كان من المشركين"


"اللهم إني أصبحت/أمسيت أُشهدك، وأُشهد حملة عرشك وملائكتك وجميع خلقك أنك أنت الله لا إله إلا أنت وحدك لا شريك لك، وأن محمدًا عبدك ورسولك"

"أصبحنا وأصبح الملك لله رب العالمين، اللهم إني أسألك خير هذا اليوم، فتحه ونصره ونوره وبركته وهداه، وأعوذ بك من شر ما فيه وشر ما بعده"

دُعاء بعد الآذان
*************

"اللهم رب هذه الدعوة التامة، والصلاة القائمة آتِ محمدًا الوسيلة (منزلة في الجنة قريبة من الله عز وجل)، والفضيلة، وابعثه مقامًا محمودًا الذي وعدته"

دُعاء عند استفتاح الصلاة
*******************

"اللهم، إني أعوذ بك من كل عمل يخزيني، وأعوذ بك من صاحب يؤذيني، وأعوذ بك من كل أملٍ يلهيني، وأعوذ بك من كل فقرٍ ينسيني، وأعوذ بك من كل غنى يطغيني"

دُعاء للشفاء
************

"ياحي، يا قيوم، برحمتك أستغيث، أصلح لي شأني كله، ولا تكلني إلى نفسي طرفة عين، ولا إلى أحد من الناس"

"بسم الله، اللهم داوني بدوائك واشفني بشفائك وأغنني بفضلك عمن سواك واحْدُر (أزل) عني أذاك"


ليست كل هذه الأدعية صحيحة عن الرسول صلى الله عليه وسلم
ولكنها تبقى في النهاية أدعية إلى الله
وكلا يدعو الله بما يستطيع