الأربعاء، 30 يونيو، 2010

إحنا هنتعازم؟!!!!!!!

بسم الله الرحمن الرحيم
السلام عليكم ورحمة الله وبركاته


كان موقف بصراحة محرج جدًا ودا اللي خلاه مضحك جدًا...

تعمل إيه لما تكون انت سايق عربية في طريق ضيق -حارتين- وتلاقي سواق تاكسي وقف قدامك علشان يركب زبون؟

طيب تعمل إيه لو اللي بيركب حد كوول حبتين وواخد راحته ومش حاطت في اعتباره العطلة اللي انت فيها

طيب تعمل إيه لو عرفت إن أنا كنت مكان الزبون دا؟

الموقف كان كالتالي...

كنت أنا وماما في مشوار والمفروض إن ماما هترجع على الشغل وأنا هرجع على البيت

ولأن الطريق للشغل وللبيت واحد لحد نص الطريق فماما اقترحت عليا بدل ماركب لوحد هي تركب معايا ونيجي عند مفترق الطرق وننزل

أنا أركب مواصلة تانية أو أكمل مشي وهي تكمل مشي للشغل لأن المسافة هتبقى صغيرة

المهم واحنا بنتناقش لسة إذا كنت أركب من البداية لوحدي ولا اركب مع ماما وننزل ولا إيه

لقيت تاكسي فاضي

وقفته

وقلتله على المكان اللي أنا وماما المفروض ننزل فيه

أنا عارفة إن ماما مبتحبش تركب هي الأول

ففتحتلي الباب وأنا لسة هركب فماما انتبهت لشيء ما مش طبيعي في الموقف وقالتلي

استني أنا هركب الأول عشان انتي هتنزلي الأول

طبعًا أنا فتحت بقي كالبلهاء مفهمتش ماما تقصد إيه بس فهمت إنها عوزة تركب الأول فبعدت لورا علشان هي تركب

وفي اللحظة دي كنت فهمت ماما تقصد إيه، بمعنى إنها نسيت إن المفروض احنا الاتنين هننزل مع بعض

فقلتلها يا ماما لأ احنا الاتنين هننزل مع بعض

فطبعا ماما -وقبل ما تركب- انتبهت للفتة النبيهة اللي أنا قلتها فقررت التنحي على جنب علشان أركب أنا الأول

وطبعا مش هتفرق مين يركب الأول المهم ننجز علشان الطريق واقف

ومن نظرة "الشلل" في عين سائق التاكسي

أنا وماما بمجرد ما ركبنا كنا في حالة غير طبيعية من الضحك "المكبوت"

ونسكت شوية ونرجع نفتكر منظرنا ونبص لبعض ونضحك

طبعًا مكناش بنضحك بصوت دا حتى عيب لكن أنا كل متخيل المنظر دا ببقى عوزة الأرض تبلعني

على الإحراج اللي الواحد بيحط نفسه فيه

الاثنين، 28 يونيو، 2010

حينها


حينها أفتح عيني من جديد فلا أجدك أمامي

أنا حيث أنا... هنا كنت واقفة

تبادلنا بعض الكلام

كنت إلى جواري...أمامي

ألم يكن ذلك كافِ

أكان عليَّ ألا أغمضهما!!!

وابتلعت غصة ألم

كان.

من الواضح أنه لم يكن كافٍ

إمضاء:ُE73

الأحد، 27 يونيو، 2010

في الركن البعيد الهادي

بسم الله الرحمن الرحيم
السلام عليكم ورحمة الله وبركاته


في الركن البعيد الهادي
وفنفس المكان فالنادي
انا قاعدة مستنية
النتيجة المهلبية
والخوف زرع حوليا
شجرة جوافة مندية

وفاتت ساعة
وفاتت ليالي
وفاتت وراها ليالي تلالي
وفين انتي فين
يا أم الروتين
وفين انتي فيييييين
يا ألمي الحزين

أديني خلصت الامتحانات

أخدت إيه؟

إيدي على خدي

أنا مؤمنة بربنا اللي عمره ما هيضيعني ولا هيشمت فيا حد
لكن دا ميمنعش اني خايفة من اول مادة وربنا يستر
لو حصل فيها حاجة أنا عندي استعداد أقعد في البيت أقشر بصل

كفاية عذاب كفاية
محاضرات ملهاش نهاية
وكفاية ذل بقى
ومذاكرة تقلب شقى

عدينا يا سنة عدينا مش عوزة أشوف وشك فينا

إهئ إهئ إهئ عااااااااااااا

أنا بجد السنة دي خرجتني بنفسية

محطمة

مدمرة

رثة

وجاري التصليحات

معلش يا نفسي
ربنا يعينك ويقويكي
وربنا عالظالم والمفتري
وحسنة قليلة تمنع بلاوي كتيرة

دا بجد دا على فكرة

الثلاثاء، 22 يونيو، 2010

لكل من يريد تعلم الطبخ

بسم الله الرحمن الرحيم
السلام عليكم ورحمة الله وبركاته
جوليا العرب
food lover

المدونتان لنفس الطاهية ولكن مترجمة وهناك صفحات للفيديوهات وأخرى لألعاب الطبخ وأخرى للوصفات

حقيقة أعجبتني وصفاتها

سهلة
سريعة
غير مكلفة

والمهم لذيذة وشكلها حلو

وبالهنا والشفا

الأحد، 13 يونيو، 2010

غدًا صباحًا وكل صباح

بسم الله الرحمن الرحيم
السلام عليكم ورحمة الله وبركاته

أحب أبشركم وأفسر في وشكم

أنا امتحاناتي هتبدأ إن شاء الله تعالى غدًا صباحًا وكل صباح

وأحب أقولكم من موقعي هذا أمام إحدى شاشات الكمبيوتر في بيتنا إني مذاكرتش

وربنا يستر على امتحان بكرة

عوزة دعوات بجد مش فض مجالس لإني ولله الحمد بنجح دائمًا وأبدًا ببركة دعاء الوالدين والأهل والأصدقاء وطنط وتيتة وجدو وخالووعمو وموشي وهوشي وروشي وكل سنة وانتوا طيبين ومنجلكوش في حاجة وحشة

وربنا عالظالم والمفتري

وحسنة قليلة تمنع بلاوي كتيرة

وهنيالك يا فاعل الخير والثواب

ومن قدم خير بيداه التقاه

واعرف ان مع نظام أجدع ناس كل دعوة هتدعيهالي الملايكة هترد عليك وتقولك ولك بالمثل

فادعي بذمة وضمير... تجيك دعاوي كتير

ومنجلكوش في وقت زنقة

والسلام عليكم ورحمة الله وبركاته

الثلاثاء، 8 يونيو، 2010

أنا...مش...فاهمة...حاجة


أنا ... مش ... فاهمة ... حاجة

حاجة جميلة جدًا...

متكلمنيش بصوت واطي ... دي حاجة بتنرفزني مش هفضل أقول نعم؟ نعم؟ نعم؟، ياتعلي صوتك عشان أسمعك يا متتكلمش خالص

مبقاش عطشان وتديني نقطة مية ... دي حاجة بتموتني أكتر من لو كنت سبتني عطشان من الأول

متخلينيش أتحايل عليك عشان تفضفضلي ... يا تتكلم وتخلص، أنا معنديش وقت أنا كمان، يا إما متظهرش إنك متضايق من حاجة من الأول

أنا بكره اللون الرمادي

يا أبيض يا أسود

يا في البيت يا في الكلية مبحبش قعدة الشارع

الأحد، 6 يونيو، 2010

بوادر كآبة

بسم الله الرحمن الرحيم
السلام عليكم ورحمة الله وبركاته

بوادر كآبة

أصبح من الطبيعي لدي أن أشعر بحالة من الاكتئاب الغير مبرر من وقت لآخر
وعلى الرغم من أن حالة الاكتئاب في حد ذاتها تُشعر الفرد بالاكتئاب..
إلا أنني أجد متعة في هذه الحالة والتي تخرجني من الملل الشديد الذي أشعر به

ولكن لست أدري! ألسوء حظي! أم ماذا، فإن بوادر حالة الاكتئاب متوفرة لدي ولكن حتى الآن لم أدخل في هذه الحالة التي أجد نفسي فيها أحيانًا

أنا الآن باحثة عن سبب قوي يدفعني للبكاء وحتى الآن لم أضع يدي على هذا المبرر

الاكتئاب عندي هو غاية نبيلة أبحث عنها بين الحين والآخر

حقًا أريد أن أبكي ولا أجد سبب قوي للبكاء وهذا يضايقني ربما يدخلني في حالة من الإحباط بدلاً من حالة الاكتئاب التي أنشدها والتي تدفعني للإنجاز

عندما يكون عندي اكتئاب يكون لدي دافع قوي للمذاكرة
عندما يكون عندي اكتئاب فهذا كفيل بمنعي من الجلوس أمام هذا الجهاز اللعين
عندما يكون عندي اكتئاب فهذا كفيل بأن أمتنع عن الطعام بضعة أيام أو على العكس الانهماك فيه طوال الوقت
عندما يكون عندي اكتئاب ألزم حجرتي وهذا يعطيني الوقت للتفكير وإعادة حساباتي مع نفسي من وقت لآخر

متى ستأتي أيها الاكتئاب؟؟؟

أنا في انتظارك أيها الاكتئاب العزيز