الجمعة، 22 مارس 2013

التفاؤل

بسم الله الرحمن الرحيم
السلام عليكم ورحمة الله وبركاته

التفاؤل

بالأمس كنت أتسامر مع والدتي نتبادل أطراف الحديث في مواضيع شتى

وفي أثناء الحوار أخبرتها بأنني لست متفائلة بخصوص أمر ما

صمتت والدتي برهة ثم أردفت حكمة لم أكن فاطنة لها من قبل

أخبرتي أمي أنه لا يوجد شيء اسمه غير متفائلة

سواء حدث أمر يصادف هوانا أو حدث ما هو عكس هوا أنفسنا فكلا الأمرين خير

لأن الله لا يأت إلا بالخير

فالتفاؤل يكون بأمر الله وليس بهوا نفسنا

أنا متفائلة بالخير الذي سوف يقرره الله لي أيًا كان

فكما قال -رحمه الله- عبد الوهاب مطاوع

لنا الألم ولله الحكمة

ربما لا ندرك الحكمة في آنها وربما أخذنا التسرع فجزعنا من قضاء الله ولكننا بعد حين سنتبين أن ما حدث كان الخير الذي لم نعيه في حينه

وبناء عليه
تفاءلوا بالخير تجدوه

وأنا متفائلة بخير اخترته لي يا رب فأعني على تقبل خيرك

There is no sense

السبت، 16 مارس 2013

فقدان ذاكرة مؤقت

بسم الله الرحمن الرحيم
السلام عليكم روحمة الله وبركاته

النهارده بالتحديد معرفش فيه ايه

صحيت من النوم الفجر حاسة ان كل ذاكرتي ممسوحة
- الدنيا ضلمة
- مش عارفة انا فين
- مش عارفة انا مين
- مش عارفة المفروض اعمل ايه

وبعد ثواني معدودة بدأت أركز انا في اوضتي على سرير والنور انا اللي طافياه لإني مبعرفش انام غير في الضلمة والباب انا اللي قفلاه والموبايل اللي بيرن دا بتاعي صحبتي بتصحيني اصلي

الحمد لله ركزت وعرفت ايه اللي بيحصل

بعد العصر قررت آخذ قسط من الراحة اصحى منه بعد المغرب وقلت لبابا يصحيني


والدي صحاني الساعة 6 ونص تقريبا وانا صاحية من النوم مخضوضة في دماغي فكرة واحدة بس
ماما أخذت الدوا؟!!

وطالعة اجري غسلت ايدي ورحت لماما صحتها وادتلها المية والدوا
هي قالتلي مانتي لسة مدياهولي الساعة 2 !!

انا بحاول اركز شوية
الساعة 2!!
هي الساعة كام؟

انا اسفة معاد الدوا الساعة عشرة بالليل و6 الفجر انا اتلخبط >_<

ولأول مرة في حياتي أجرب أدي حقنة عملي كنت بدرس طريقة إعطاء حقنة نظري لكن اليوم كانت أول مرة أجرب

ربنا يقومك بالسلامة يا أمي العزيزة

الثلاثاء، 12 مارس 2013

أستغفرك ربي وأتوب إليك

( من لزم الاستغفار جعل الله له من كل هم فرجا ومن كل ضيق مخرجا ورزقه من حيث لا يحتسب) 

{اسْتَغْفِرُوا رَبَّكُمْ ثُمَّ تُوبُوا إِلَيْهِ يُمَتِّعْكُمْ مَتَاعاً حَسَناً} [هود: 3]. 

{اسْتَغْفِرُوا رَبَّكُمْ ثُمَّ تُوبُوا إِلَيْهِ يُرْسِلِ السَّمَاءَ عَلَيْكُمْ مِدْرَاراً وَيَزِدْكُمْ قُوَّةً إِلَى قُوَّتِكُمْ} [هود: 52].

{وَمَا كَانَ اللَّهُ لِيُعَذِّبَهُمْ وَأَنْتَ فِيهِمْ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ} [لأنفال:33]. 

{اسْتَغْفِرُوا رَبَّكُمْ إِنَّهُ كَانَ غَفَّاراً * يُرْسِلِ السَّمَاءَ عَلَيْكُمْ مِدْرَاراً * وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَاراً} [نوح :1012]. 


الاثنين، 11 مارس 2013

ربع قرن

بسم الله الرحمن الرحيم
السلام عليكم روحمة الله وبركاته

إنه يوبيلي الفضي
أي مرور 25 عام على مولدي
كل عام وأنا إلى الله أقرب وعن الذنوب أبعد
اللهم اجعله عام مميز بالسعادة والعبادة

أنا عندي ربع قرن ^_^

كل سنة وأنا طيبة
أنا بحبني قوي
وهنزل أفسحني وأشتريلي هدية


الله يبارك في أعماركم أسرتي الغالية

السبت، 9 مارس 2013

طقس ربيعي جميل

بسم الله الرحمن الرحيم
السلام عليكم روحمة الله وبركاته

اليوم غريب بطقسه الربيعي البديع

إنه الإحساس بأنك ترغب في التهام الهواء واحتواء الشمس بأشاعتها الرقيقة

طقس يساعد على القراءة؛ فوجدتني أنهم من كتابين على عجل شعرت بنشوة غامرة تجري في أوصالي بعد انتهائي منهما فقد كانا كتابين جيدين استمتعت بقراءتهما

كما عدلت بهما معدل قرآتي الشهرية والذي كان قد اختل في الآونة الأخيرة

أنجزت بعض أعمالي التابعة للروضة بالمنزل بالأمس فأعطاني هذا شعورًا بالرضا عن أدائي

علمت من زميلة لي أنه عليّ التوجه للإدارة التعليمية لتجديد عقدي والذي من المفترض انتهائه في آخر شهر مارس.. ولكن المشكلة تكمن في أن صيغة العقد الجديد مماثلة لصيغة العقد الحالي وهي صيغة غير قانونية ضقت ببنودها من الأساس

حائرة هل أوقع هذا العقد أم أحجم عن هذا!!!

Violin

الجمعة، 1 مارس 2013

انتهى العرض


لم أغفر

بسم الله الرحمن الرحيم
السلام عليكم ورحمة الله وبركاته

الله يسامحك يالشيماء

بجد أنا مودي بيتقلب 180 درجة كل مافتح الكشكول بتاع التفصيل بتاعي

من سبع سنين أخذت كورس تفصيل وأنا من النوع اللي بيكتب كل نَفَس المدرب بيتنفسه دا غير إني بعتني جدًا بالمحاضرات اللي بكتبها وخاصة لو في حاجة أنا بحبها

الكشكول دا بجد كان حياتي فيه وكاتبة فيه كل حاجة عن التفصيل

وفيوم طلبت مني الشيماء أعلمها التفصيل ونعمل مع بعض فستان

وأنا مكذبتش خبر لإني بحب أعلم الناس الحاجة اللي اتعلمتها علشان آخذ ثواب وعشان كمان لما بتدرب حد على حاجة اتعلمتها معلوماتك بتثبت أكتر

فاليوم دا أنا ملحقتش أعمل معاها حاجة وسبت عندها الكشكول وروحت وقلتلها خلي الكشكول في عنيكي وأكدت عليها كتير تحافظ عليه

وللأسف مجتش فرصة إني أقدر أروحلها علشان أعلمها وكنت دايمًا بسألها عالكشكول تقولي موجود تعالي خديه وكل ما أروحلها عشان آخده تقولي حاضر وفالنهاية متدهوليش لأي سبب

المهم بعدها بسنتين أو يمكن أكتر بعد طول إلحاح وفاليوم دا كنت رايحالها عشان حاجة تانية أصلا وأنا قاعدة عالمكتب بتاعها -وهي كانت قالتلي انها مش لاقية الكشكول وإنها كانت عايناه في حتة أمان ونسيت المكان اللي عانته فيه- ببص عالكتب اللي عالمكتب وأفاجأ بإن الكشكول بتاع التفصيل بتاعي بينهم

طبعًا أنا استغربت طالما هو قدامها عالمكتب ليه بتقولي انها مش لاقياه؟!!

وقررت أطلعه من بين الكتب وأقولها إني هاخده -هي كانت رايحة تجبلي حاجة أشربها- وبطلعه وأبص فيه اتصدمت بجد صُعقت بمعنى أصح

الكشكول اللي أكدت عليها ياما تحافظ عليه زي عنيها ومتكلة على إنها نسياه فالمكان الأمين اللي كانت عيناه فيه، لقيته متقطع الورق اللي جواه بطريقة همجية ومتشخبط فيه وشوية ورق تانين كانوا مقطوعين ومتكرمشين ومحطوتين جواه

أنا مش عاوزة أقولكم كان رد فعلي إيه ولا إحساسي...

أنا قررت أحط الكشكول قدام عينها بحيث لما تدخل الأوضة تشوفه قدامي وقدامها عالمكتب

وبالفعل هي دخلت وحطت الصينية وبتبص وتقولي آه كشكول الخياطة بتاعك دا كان هنا

وأنا مردتش منتظرة المبرر الخطير اللي هتقوله عالمهزلة اللي حصلت فالكشكول

لقتها بتقولي أنا آسفة جدًا أصل أخويا كان قاعد يذاكر مع أصحابه وكان مفكره كشكول قديم وقطع منه ورق لكن أنا هزأته وحطيت الورق جواه تاني وأنا مش عارفة أعتذرلك ازاي وكلام كتير

مقدرتش أرد عليها غير إني قلتلها لا عادي ولا يهمك -هقولها إيه بعد ما فات سنتين بتقولي الكشكول ضايع وهو موجود قدامها وهي عارفة انه متقطع وساكتة!! حتى لو كانت قالتلي من وقتها كان أرحم- وأخذت الكشكول وكملت كلام معاها عالحاجة اللي كنت ريحالها عشانها وروحت بعدها

لكن كل مابص فالكشكول وفكل مرة أكتشف إن فيه صفحات من الشرح ضايعة بالفعل وانها متأكدتش إن كل الأوراق موجودة ولا حاجة بجد مودي بيتقلب تمامًا وأنسى بقى حبي للتفصيل والحاجة اللي منهمكة في تفصيلها وأقعد أفكر وأقول -الله يسامحك يا الشيماء- أنا من وقتها مكلمتهاش تاني غير مرة واحدة سريعة فالتليفون

لكن أكيد مش هقدر أرجع لطبيعتي مع حد فرط في حاجة عزيزة عليا بالشكل دا

وخاصة لو كانت كتب استعارها ومرجعهاش أو حاجة أنا عملاها ومستأمناه عليها

إلى الآن وفات على الموضوع دا مدة طويلة إلا إني بجد مش قادرة أغفر

ومش عاوزة أحسبن لإني قلتلها وقتها إنه عادي وميهمهاش

وكل اللي أقدر أقوله حاليًا

الله يسامحك يا الشيماء