الثلاثاء، 24 أبريل 2012

طلبات الترقية

بسم الله الرحمن الرحيم
السلام عليكم ورحمة الله وبركاته



قلتلكم قبل كدا ان الادارة التعليمية اتصلوا بيا عشان اعمل العقد السنوي بدل اللي بالحصة اللي كنت عليه

وكان من الطلبات ما يلي

عدد 4 صورة بطاقة
عدد 4 صورة المؤهل
عدد 4 صورة شهادة الميلاد
عدد 4 صورة العقد
عدد 1 صورة شخصية
فيش وتشبيه - واللي يلزمه صورة بطاقة
استمارة كشف طبي
اقرار من المدرسة انني على رأس العمل منذ تعاقدي بالحصة


بالنسبة لتصوير النسخ دي كانت أسهل حاجة لأن الراجل اللي واقف بآلة التصوير جنب مقر الادارة مباشرة

أما بالنسبة للباقي فكان أمره كالتالي

بالطبع في اليوم اللي اتصلوا عليا فيه من الادارة مكنتش هلحق اروح المدرسة اجيب الاقرار لأن الاداريات هيكونوا مشيوا

فرحت مع والدتي لأقرب "نقطة شرطة" زي ما بيسموها عشان الحق اعمل الفيش والتشبيه ويومها كان يوم الاحد اللي قبل شم النسيم مباشرة
وصلت ومن على الباب قالي واحد معرفش رتبته اني لازم يكون معايا صورة بطاقة واضطريت اروح مشوار تاني عشان اصور البطاقة لأن "النقطة" في منطقة تعتبر نائية

صورت البطاقة احتياطي كذا صورة ورجعت عالنقطة طلب مني الموظف 15 جنيه وصورة البطاقة والبطاقة عشان يتاكد من التطابق وحطيت ايدي عالجهاز عشان سحب البصمات واتصورت وسألته آخده امتى قالي يوم الاربعاء بعد الساعة 10

ماما صممت ننهي كل الاوراق المطلوبة في نفس اليوم طلعنا على "القومسيون" اللي في منطقة تانية محدوفة كذلك وللطف ربنا لقيناهم فاتحين جبنا استمارة الكشف الطبي بـ 13 جنيه

اليوم دا كدا انتهى

يوم الاربعاء اللي بعده رحت المدرسة جبت الاقرار وطلعت على نقطة الشرطة جبت الفيش والتشبيه وطلعت عالادارة ومعايا الاستمارة والصورة الشخصية

الموظفة ملأتلي بيانات الاستمارة ودبست الصورة واخدت الاقرار والفيش والتشبيه وطلبت مني اروح لشئون العاملين في مكان تاني خالص امضي واختم الاستمارة بتاعت الكشف الطبي وبعدها اتصل عالارقام الموجودة بالاستمارة واحجز كشف ولما استلم النتائج اصور الاستمارة وارجع عليها تاني

حدث وذهبت ومضيت وختمت الاستمارة ورجعت اتصلت عالارقام حددلي يوم الاثنين موعد الكشف الطبي

اول ما دخلت وسألت قالتلي الموظفة ادفعي طوابع بـ 40 جنيه عالشباك دفعتها ورجعتلها لصقتها بالاستمارة وفضلت منتظرة من الساعة 10 ونص للساعة 1 الظهر لحد ما ندوا على اسمي

كشف النظارة بيتعمل وانا لابسة النظارة "حاجة عظيمة جدا" والدكتور استغرب اني معملتش باقي الحاجات المطلوبة وكتبلي ورقتين واحدة تحليل بول والتانية اشعة صدر

"تحليل!! ليه تحليل!! انا مش بتاعت تحاليل وحاولت اقنعهم بس مفيش فايدة وقد كان وعملته بـ 40 جنيه

ورحت لقسم الاشعة وانا مش واخدة خوانة وكانت بـ 18 جنيه الاقيلكم المسئول عن غرفة الاشعة واحد كدا شكله ميحصلش تباع ميكروباص وطبعا انا مكنتش عاملة حسابي للموال دا كله وكنت فاكرة ان كل دا كشف روتيني ومأخدتش معايا حد وطبعا حتى لو اتصلت بحد مش هيلحق يحصلني ومكنتش عارفة اعمل ايه بالظبط وانا عارفة نظام غرف الاشعة اذا كانت اشعة الاسنان الدكتور بيخليني اشيل اي بنس او اربطة شعر او أي اكسسوارات لابساها فما بال اشعة الصدر ومبقتش عارفة اعمل ايه لحد ما لقيت راجل وتقريبا قاعد معاه مراته وبنته

مراته دخلت مع بنته الاشعة وهو فضل قاعد فسألته هل دول مراته وبنته قالي اه فطلبت منه يخليهم يدخلوا معايا وانا بعمل الأشعة لأني مش معايا حد ومكنتش عاملة حسابي فوافق وبمجرد ما خرجوا شاور لمراته تدخل معايا وهي طبعا مفهمتش وبصتلي باستغراب وبعدها بنته لقطتها تقريبا وقررت تدخل هي معايا ووضحتلها انا الموقف وكانت بجد جدعة ومتعاونة ومتفهمة وعدى اليوم وسألتهم عن موعد الاستلام قالت الخميس الساعة 10

يعني بعد بكرة المفروض اروح اجيب النتائج وارجع عالادارة بعد ما اصور النتائج واسيبلهم الاوراق وربنا يعمل اللي فيه الخير لما نشوف آخرتها

الثلاثاء، 17 أبريل 2012

لأنك لا تعرفني

بسم الله الرحمن الرحيم
السلام عليكم ورحمة الله وبركاته


لأنك لا تعرفني أتوقع منك ألا تفهمني
لأنك لا تعرفني أتوقع منك أن تظلمني

لأنك لا تعرفني أتوقع أن تنبهر بي
لأنك لا تعرفني سوف لن أوقف حياتي رهن اعتقاداتك

لأنني لا أعرفك سوف أختلق لك الأعذار
لأنني لا أعرفك سوف أتغاضى عما تفعله ويضايقني
لأنني لا أعرفك سوف لن يؤلمني سوء ظنك
لأنني لا أعرفك سوف أنتظرك قليلاً لتوضح لي سوء التفاهم


لأن كل منا لا يعرف الآخر يجب أن نتوقع الاختلاف
لأن كل منا لا يعرف الآخر يجب أن نوضح نوايانا
لأن كل منا لا يعرف الآخر يجب أن نصبر على بعضنا
لأن كل منا لا يعرف الآخر يجب أن نسعى للتعرف على بعضنا البعض

فأنا أنتظر اللحظة التي سوف أعرفك فيها

الأحد، 15 أبريل 2012

قصور ذاتي

بسم الله الرحمن الرحيم
السلام عليكم ورحمة الله وبركاته

قصور ذاتي هو اللي انا فيه؟! ولا عدم القدرة على حسم القرار!!

مكنتش ناوية أبدًا أكمل في شغل الحكومة ولا في مهنة التدريس في المدارس من الأساس والنهاردة وبمجرد ما اتصلت بيا موظفة من الادارة وقالتلي اني اجيب اوراقي عشان بدل ما انا متعينة بالحصة هيخلوني بالتعاقد السنوي لقتني قمت وصليت استخارة ولبست ورحتلها وكملت ورقي زي ماكون منومة مغناطيسيًا مع اني عارفة اني مش طايقة ولا قادرة استحمل حتى انتهاء التعاقد اللي بالحصة بتاعي واللي كان المفروض يخصل في آخر شهر ابريل

هل المشكلة كانت في البلد اللي بشتغل فيها ولا المشكلة في العمل الحكومي ولا المشكلة في المناهج نفسها ولا المشكلة فيا ولا المشكلة في ايه معرفش وكل ما آخد رأي حد يقولي انتي في نعمة غيرك بيحسدوكي عليها ومترفصيش النعمة اللي انتي فيها وألاقيني ماشية بقوة الدفع او القصور الذاتي وجوايا مليون حاجة بتقولي لأ كفاية وفنفس الوقت ألف حاجة تقولي هي دي رسالتك في الحياة والدنيا دي مش مكان للراحة أساسًا ومفيش شغلانة هتبقي مبسوطة فيها 100% 

حقيقي تعبانة ومش عارفة المفروض اقرر ايه

الدبلومة اللي اهملتها لما اقنعت نفسي اني مش هكمل في مجال التدريس اصبحت الان مهمة لمجالي بما اني مضيت على التعاقد

المنحة اللي كنت ناوية اتفرغلها وحطيت عليها آمال عريضة أصبحت هي الآن العائق والمشتت لطريقي وأنا مبقتش عارفة اعمل ايه

انا كان نفسي اشيل ايدي من كل حاجة وأهيم على وجهي مطرح ما أحب أسافر وقت ما أحب أزور أقاربي



شخصية تكره القيود وأشعر أن العمل الحكومي ما هو هي ساقية وأنا الثور اللي مربوط فيها ولازم لا أبص يمين ولا شمال عشان اركز في اللي بعمله

ومع كل دا الاقي آلام القولون العصبي بتتصارع بداخل لتعلن هي الأخرى رأيها في الوضع الراهن

أفكر أحيانًا.. وما الذي يجبرني على كل هذا السعي والبهدلة وأنا في النهاية أنثى لابد ممن يتحمل مسئوليتي
وأفيق أحيانًا.. ليست الحياة دائمًا وردية كما هي والله أعلم بالغيب وعصفور في اليد خير من ألف على الشجرة وأن العمل عبادة ولهذا خلقنا فإذا لم أرد العمل فلأذهب إلى قبري

وفي النهاية أفكر

لماذا أفعل ذلك بنفسي؟!

ولا أنسى قول

الحمد لله عالم الغيب والشهادة

الثلاثاء، 10 أبريل 2012

لسة فيه أمل


بسم الله الرحمن الرحيم

السلام عليكم ورحمة الله وبركاته



رغم الضغوط وشوية قيود إلا إن ربنا كذلك مش بيسبني برحمته

عارف لما تحس انك في الحر والجو سخن والهوا واقف وانت هتفطس ومش لاقي اكسجين تتنفسه


وفلحظة واحدة تلاقي نسمة هوا بتهفهف عليك بتحسسك ان اللدنيا دي قد ايه جميلة

مع انها نسمة خفيفة وانت عارف انها هتعدي بسرعة بس بتلحق تاخد منها نفس عميييييييييييق

وتسرق من العمر نسمة

حصلت معايا مشكلة الأسبوع اللي فات في الشغل والحمد لله اعتقد على النهاردة انها اتحلت

رغم الضغوط والاحباط الا اني بلاقي نسمة حب من زميلاتي في العمل

لما بحس ان ورايا مليون حاجة المفروض اعملها في وقت واحد بلاقي نفسي بطريقة لا ارادية بدل ما أأجل حاجة عشان الحق اعمل التانية

لأ بلاقيني أجلت كل حاجة وفضلت اتفرج من بعيد

طبعًا دا مش بيريحني أبدًا لأني طول الوقت ببقى حاسة بالضغط

وقت لما بشيل عن كتفي جزء ولو بسيط من الضغط دا بحس ان نسمة الهوا اللي قلتلكم عليها بدئت تحل عليا

ووقتها بقدر قيمة ومعنى "لا تؤجل عمل اليوم الى الغد"

أكيد الرسول عليه الصلاة والسلام كان سعيد في حياته هو والصحابة عشان مكانوش بيأجلوا أعمالهم ويراكموها على بعض

جتلي فترة من ضمن الهروب وادعائي ان مفيش وقت خالص لعمل أي شيء ولقتني بقضي معظم وقتي "الفاضي" على الفيس بووك بلا هدف بلا معنى

فقط تضييع وقت

وما كان مني الا ان طقت على دماغي لحظة جنون من اللي بتجيلي كتير ورحت قفلت الأكونت بتاعي

الراجل زعل وبعتلي وقالي يا فندم انتي مش واخدة بالك ان انتي الأدمن الوحيدة على البيدج بتاعتك ولا ايه؟ لو قفلتي الحساب البيدج هتتقفل هي كمان

مكنش بإيدي شيء غير اني "أباصيها" لواحدة صحبتي لحد ما عقدتي تتفك

شهر ابريل وفرحه المزعوم كان كالتالي

الفرحة اللي في أوله كانت فرحة ولادة أول حفيدة في اسرتنا واللي قررت انها تستعجل وتنور الدنيا في شهر مارس

الفرج اللي في آخره هو انتهاء تعاقدي مع الحضانة اللي انا فيها واللي بقيت بحس ان يوم 30 في الشهر دا بعييييييييد قوي ومش بييجي مع ان خلاص مبقاش فاضل الا اسبوعين تقريبا

الدبلومة اللي انا فيها واللي المفروض تخلص على آخر مايو ولقينا الدكتور رئيس قسم التكنولوجيا في الكلية "قال بيبشرنا" وبيقولنا ان الدبلومة المهني اتلغت من لائحة الكلية وان بعد كدا اللي هيخلص كلية هيدخل على الدبلوم الخاص على طول "يا فرحتي" والكلام الجميل دا اعتبارًا من السنة الجاية

حد قالك اني ناوية أكمل؟! خلاص اكتفيت منكم الحقيقة وفي الآخر طلعت فاشوش

بالنسبة لمنحة تطوير المواقع اللي باخدها احيانًا بحس نفسي ضايعة جدا وأحيان أخرى بحس إن الموضوع مش عاوز مني غير شوية تركيز "الموضوع المفروض ميبقاش مضلم للدرجة دي"

بس منين ييجي الفضى والتركيز؟

والمفروض دي هتخلص في خلال ثلاثة اشهر الجزء الاول منها والجزء التاني مفتوح لمدة 6 شهور المفروض "قال ايه" ادرس اللي اتعلمته لعشر اشخاص على اساس اني فاهمة بقى

كل الليلة دي وانا نففسي اتفرغ لسمسمتي اللي خلتني خالتو وللأسف مش عارفة اديلها حقها ولا آخد راحتي عشان اللي ورايا

وعارفة اني وقت ما هفضى مش هلاقيها قدامي عشان هتبقى سافرت مع مامي وبابي وهتسيب "آنطي" نوسة لوحدها

الأربعاء، 4 أبريل 2012

كذبة اسمها ابريل

بسم الله الرحمن الرحيم
السلام عليكم ورحمة الله وبركاته

مش عارفة ليه الشهر دا بدأها معايا كدا

مع إني والله كانت نيتي فيك صافية جدًا

انا ضد مبدأ التشاؤم لكن فعلا الشهر دا أظهرلي ما لم أكن أبطن له عندما كتبت هذا المقال



فالفرح الذي كنت في انتظاره أوله كان فرحان أحدهما ذهب مع الريح والآخر قرر اللحاق بقطار شهر مارس في آخر أيامه

أما بالنسبة للفرج في آخره فأتمنى حقًا أن يأتي سريعًا عاجلاً لأنني أكاد لا أحتمل الاستمرار اكثر من ذلك

وما بين الفرح والفرج فاجأني هذا الشهر في البضع أيام الأولى منه بعدة مفاجآت غير سارة بالمرة

اللهم تمم هذا الشهر على خير يا رب العالمين

وأشكرك ربي على نعمك الكثيرة عليّ

لم أتوقع أنني سأحتاج للدعاء في شهر مثل هذا الشهر الذي توقعته أفضل الشهور لهذا العام



الأحد، 1 أبريل 2012

أسمهان




أنا عاوزة أدخل للنونو وحشتني جدًا جدًا جدًااااااااااااااااااااا

يادي البرد اللي بينقي الأوقات

يعني طول ما هي مسهرانا ومغلبانة أبقى زي الفل

وأول ما تبقى هادية ومؤدبة يجيلي برد يخليهم يعملولي حظر تجوال في الشقة عشان النونو متتعبش

مليش دعوة أنا عاوزة أشوف النونو اتصرفوا وادعولي البرد اللي عندي يروح بسرعة بقى