الثلاثاء، 27 ديسمبر 2011
بسم الله الرحمن الرحيم
السلام عليكم ورحمة الله وبركاته
شكلك يا ضرسي انت الوحيد اللي تقدر تفرض رأيك عليا
أنا بكره دكاترة الأسنان
والضرس دا بالذات هو اللي كرهني فيهم
كانت سوسة صغيرة
دكتور الله يسامحه "مع انه أشهر دكتور في محافظتي وأغلاهم" الدكاترة بتوع الامتياز بيتدربوا عنده
وحضرته بدل ما يراعي اني بروحله ومش بسترخص عشان عارفة انه المفروض شاطر الا انه لم يتورع انه يسيب الزباين بتوعه لطلبة الامتياز اللي بيشغلهم عنده بما اني حالتي مش مستاهلة خبرة
وجناب الدكتور الامتياز مرمط بكرامة الضرس الأرض
وجه الدكتور الكبير يحاول يظبط شوية من اللي بيتمرن عمله بس برضه مفيش فايدة وانا اتخنقت من صوت مكنة الحفر واحساس الحفارة وريحة البنج والقرف وقررت اني أقوله خلاص حلو جميل مش مضايقني وبقيت بحاول أتأقلم على الضرس بحالته الجديدة
ومشيت وبعدها بسنة تقريبا رجع ضايقني تاني ورحت لدكتور تاني والدكتور التاني حاول يحسن من الصورة شوية وكذلك انا مرتاحتش وكذلك مرضتش اجادل لأني أصلا كارهة حوار دكاترة الاسنان وبحس ان مرواحي على العيادة مماثل لطلوع روحي
وحتى الان ورغم مرور السنين الا ان نفس ذات الضرس الـ....."الله يسامحه" وانا من فترة بتجاهل انه بيألمني مع تغير درجة حرارة فمي الا انه زودها امبارح والنهاردة
خايفة الدكتور يقولي انه مجرد السوسة تحولت مع اهمالي لحاجة الضرس لحشو عصب
انا بحب أسناني جدًا ودا اللي بيخليني بكره دكاترة الأسنان اللي بحس انهم واخدني سلعة علشان يعرضوا مهاراتهم المنيلة بستين نيلة
وخايفة أروح للدكتور يقولي يا شيخة سيبك من الضرس دا احنا نخلعه ونركبلك مكانه طربوش
حاكم دكاترة الاسنان دول اكترهم مبيفكرش في الناحية الانسانية المعنوية للبشر ومعندهمش تفكير اساسا تلاقيه حافظ واحد زائد واحد يساوي اتنين وبينفذها على الكل أيًا كانت الاعراض
لدرجة اني رحت في مرة لدكتور اسنان كانت اللثة عندي وارمة جامد وسببتلي مشاكل صحية تانية وهو بكل بساطة بيقولي دا بسبب ضروس العقل وهي ضروس ملهاش لازمة وهخلعهالك
والله حسيت بقمة الاستهبال اللي في الارض يعني ضرس لسة طالع ورور تخلعهولي بتاع ايه؟ والفك أصلا مفيهوش مشاكل ولا الضروس مكركبة فوق بعض بس هو متعود ان ضرس العقل لما بيطلع والواحد مبيعرفش يوصله بفرشاة الاسنان فبالتالي هيسبب لتراكم الجير والتسوس ويؤدي لتلفه وتلف اللي جنبه وموال كدا قالهولي ميدخلش في زمتي بتلاتة تعريفة وسبته ومشيت
ولا الدكتور التاني اللي رحتله وبيقولي على فكرة انتي محتاجة "تقويم" قلتله بكل بساطة وثقة على فكرة انا عجباني أسناني وبحبها كدا
طبعا اتحرج وقالي أكيد طبعًا المهم انك تبقي مرتاحة "مع العلم ان اسناني أساسًا منتظمة جدًا ومش مكركبة اصلا"
والدكتور اللي اروحله الاقيه بيشتغل من غير كمامة ودي أكتر حاجة بتقرفني في الحياة
واللي الممرضة بتاعته مش لابسة جوانتي وحاطة ميكب الدنيا والآخرة وبحث انها كتلة جراثيم ماشية على الأرض
بجد بجد بجد انا بكره دكاترة الأسنان
مبحبش ريحة البنج
مبحبش صوت المكنة
بقشعر لما بتلمس أسناني
والبنج بيجبلي صداع قاااااتل بعد ما مفعوله بيروح
ومقدرش استحمل الألم لو مأخدتش بنج
يعني مقفلة من كل ناحية
امضاء أخير علشان منساش مع ان عمري ما هنسى
انا
بكره
دكاترة
الأسنان
آه يا ضرسي
الاشتراك في:
تعليقات الرسالة (Atom)
2 آراءكم:
الف سلامه عليكي يا حبيتي.ان شاء الله الناس الوحشين....عايزه اقةلك مين فينا مش بيكره دكاتره الاسنان..معلش استحملي بس اهم حاجه تعالي علي نفسيك وكملي مع الدكتور ...عشان وجع السنان ده مصيبه...الف سلانه عليكي
الله يسلمك يا أمورة ربنا يبعد الشر عننا جميعًا يا رب
شكلها كدا يا أمورة
لأ مانا برضه غلست ومرحتش والوجع راح لوحده الحمد لله وربنا يستر بقى
الله يسلمك يا جميلة نورتيني
إرسال تعليق