الجمعة، 31 أغسطس، 2012

مطروح وأم مروة

بسم الله الرحمن الرحيم
السلام عليكم ورحمة الله وبركاته


الأسبوع اللي فات كنت في مطروح مع العائلة الكريمة وقضينا أسبوع جميل جدًا الحمد لله ولسه راجعة النهارده

مش موضوعنا مطروح خالص .. لأن اللي عاوزة أحكي فيه النهارده خاص برحلة العودة وتحديدًا آخر ساعة فيها

كنا في العربية

ماما موبايلها بيرن "رقم مش متسجل"
ردت
ماما: مدام بسمات معايا؟
...
ماما: أنا مش سامعة حضرتك بس إيناس معايا ثواني أجبها لحضرتك لأني مش سامعة كويس
...
"مدام بسمات دي الموجهة بتاعت التربية والتعليم بتاعتي واللي المفروض إن ماما إتصلت بها من كام أسبوع وطلبت منها تنقلني لحضانة داخل المدينة بدل القرية اللي بسافرلها كل يوم"

أنا أخذت السماعة على أساس اللي بتتكلم هي مدام بسمات وقلت السلام عليكم مدام بسمات؟
قالتلي أنا من طرف أم مروة السورية >_<
أنا: "مش فاهمة أي حاجة وجه في بالي زملتي في الحضانة اللي اسمها مروة وليه واحدة من طرف مامتها تتصل بيا وهي من إمتى سورية أصلا؟ معلوماتي انها مصري" أم مروة مين؟
المتصلة: أم مروة بشرى السورية مرات البشمهندس خالد
أنا: مين بشرى؟ هو مين حضرتك؟ هو حضرتك طالبة مين؟
المتصلة: هو مش أنتي فلانة الفلانية؟؟
أنا: أيوة أنا مين حضرتك؟
المتصلة: أنا واحدة من طرف أم مروة مرات البشمهندس خالد وكنت بدور لابني على عروسة ومدام بشرى قالتلي عليكي مش أنتي برضه بتشتغلي مدرسة حضانة في الحكومة ووالدتك بتشتغل كذا كذا
أنا: "ولسة في بالي انها الموجهة وبكل غباء الدنيا" أيوة أنا
المتصلة: أنا اتصلت عالأرضي ولقيته مرفوع مالخدمة فكنت عاوزة أعرف هل هتوافقي عالمواصفات ولا لأ هو بيشتغل كذا في المكان الفلاني وعنده كذا سنة
انا: >_< طيب انا مش فاهمة حاجة هو عامة إحنا في الطريق حاليًا راجعين من السفر وإن شاء الله ساعة ونوصل البيت
المتصلة: طيب عامة لو حسيتي أنك عندك استعداد لقبول العريس تتصلي بيا لما توصلي وياريت في أقرب فرصة


أنا بقى بعد ما قفلت وكررت الكلام على مسامع العائلة الكريمة وركزت في الكلام اللي المتصلة قالته وفنص الكلام بقول لماما ااااااااااااااااااااه

أم مروة
مدام بشرى
السورية
البشمهندس خالد

أنا ازاي مجاش في بالي

إحم إحم دي تبقى قريبتنا

لكن لأني داخل في دماغي حوار الشغل جه في بالي الموجهة التانية اللي اسمها بشرى وجه في بالي والدة زميلتي والحوار دخل في بعضه والشمس كانت ضاربة في راسي طول الطريق

هو مين اللي طفى النور >_<

واحب اقول لوالدتي العزيزة "تعيشي وتدبسيني يا حاجة"

هههههههههههههههههههههه كان حتة موقف تيييييييييييييييييييييييييييت

الجمعة، 24 أغسطس، 2012

خروجات العيد


بسم الله الرحمن الرحيم

السلام عليكم ورحمة الله وبركاته

الخروج في الأعياد فكرة بالنسبالي غير سديدة بالمرة واكرملي اقضيها في بيتنا

اللي يقولك اللي بيتفسحوا في الاعياد دول بني آدمين زينا ومصريين زينا وعيب قوي لما يكون عندنا نزعات عنصرية منهم ومش عشان الظروف جنت عليهم وخلتهم في مناطق عشوائية وضالة يبقى احنا والزمن عليهم


أحب أقولكم الانسان هو اللي بيخلق البيئة اللي عايش فيها مش بيئته هي اللي بتخلقه

بمعنى

بعد محايلات مضنية من بنات خالاتي اننا نروح نذور العائلة ونتجمع في النادي كنوع من انواع صلة الرحم عشان نكسب ثواب في العيد "وانا كنت رافضة الفكرة تماما لأني مبحبش اخج فالعيد"

المهم فين وفين نزلت معاهم وبعد ما شبه وصلنا للنادي اتصل بينا ابن خالتي وقالنا انه سبقنا عالنادي وانه لقاه قافل


طبعا احنا بصينا حولينا لقينا الدنيا زحمة بشكل وشبه لأول مرة ابقى قلقانة بالشكل دا من البشر

هم فعلا شكلهم غلط مع ان عمرهم لا يتجاوز الـ 18 سنة بس مش عارفة حاسة زي مايكون راكبهم شياطين مجرد بس لما تبصلهم تحس انك في المكان الغلط ومكنش لازم تخرج من بيتك

المهم الحمد لله وصلنا البيت بسلام

وتاني يوم المفروض كنت اروح لأختي في القاهرة عشان ننزل نشتري حاجات مع بعض
اليوم دا انا كنت فاكراه يوم عادي مش تابع للعيد لأن المفروض العيد يوم واحد "الكلام دا على يوم التلات" المهم اكتشفت انه لسة تابع لإجازة العيد وليلتها قرأت عالفيس بووك شوية بوستات خضتني اصلا بقيت تاني يوم صحيت الصبح وبدل ما بكون متحمسة للسفرية كنت قلقانة جدا وقلت دعاء الاستخارة ورحت استأذن بابا عشان اسافر وهو في البداية رفض وهو لو كان صمم على رفضه انا كنت هتخلى عن تصميمي اساسا وخاصة انه كان عايز يفسحنا في اي بلد ساحلي قريبة لمدة يوم ونرجع في نفس اليوم وانا مبحبش اخذل بابا وخاصة لما يكون عايز يخرج او يقعد معايا "ربنا يخليه ليا" المهم اني تمسكت برأيي لأني كنت متفقة مع اخواتي وازواجهم ومكنتش عاوزة اضيع الفرصة وكلمت اختي وصلت لحل وسط مع بابا وهو ان اخويا يسافر معايا

وكذلك على غير العادة كنت مبسوطة جدا انه هيبقى معايا كنت مطمئنة

المهم سافرنا عادي ولما وصلنا القاهرة والمفروض نركب المترو عشان نروح لأختي لقيت كمية من الكائنات الغلط اللي بقولكم عليها دي هائمين على وجوههم داخل محطات المترو بلا هدف ولا غاية 

هدفهم الوحيد انهم يركبوا عربيات "السيدات فقط" ويضايقوا البنات اللي فيها سواء لفظًا او سلوكًا

المهم انا مرضتش اركب لا اول مترو ولا التاني ولا التالت كلهم فيهم ولاد في عربيات البنات وآخر ما زهقت واتنرفزت قلت لأخويا يروح يسأل فين افراد الامن بتوع المترو وازاي يتقاعصوا عن اداء دورهم في ردع هؤلاء "الحثالة" اللي مش عارفين جنسهم اللي بيركبوا عربيات البنات

وبالفعل هو راح لبتوع البوابات وسألهم انتوا ازاي سايبين الرصيف منغير تأمين؟!! وايه المهزلة اللي في المترو دي؟ قالوله دي مهمة شرطة المترو احنا وظيفتنا مقتصرة عالبوابات بس

سألهم وفين شرطة المترو دي؟
شاوروله على اوضة دخلها وشوية ورجعلي

وقال ايه واخدين اجازة

انا عمري ماشفت كدا شرطي ياخد اجازة!! من إمتى دا؟ انا اعرف انهم ياخدوا علاوات بدلات لكن اجازة

دانا فاكرة ايام زمان لما كنا في الاعياد وبشوف عربيات الامن المركزي مرصوصة في المناطق الحساسة زي محطات القطار والسينيمات للحد من الشغب

بجد الدم نط في نافوخي وكان عندي استعداد اقتل اي حد لو فكر يقربلي "وفكرت انا ليه مأخدتش معايا أي سلاح ابيض وانا خارجة من البيت؟!!" ايوة للدرجادي وصلوني بالتفكير لما الشرطى تاخد اجازة يبقى من حقي ادافع عن نفسي بالطريقة اللي اشوفها صح

وقتها اخويا قالي خلاص اللي جاي دا اخر مترو هنستناه ولو لقيت عربية السيدات فيها ولاد هركب معاكي فيها واجبرهم ينزلوا المحطة اللي بعدها لكن مستحيل هخليكي تركبيها لوحدك "وطبعا انا مش هركب العربية المشتركة لأنها عاملة زي علبة السردين" وطبعا الكائنات اللي بتركب عربيات البنات دول مش بيخرجوا برا المترو لما بيوصلوا لمحطة هم عاوزينها لأنهم خارجين من وش الصبح ونيتهم انهم يضايقوا البنات في المترو وبس وبيتنقلوا من مترو لمترو ومن عربية لعربية زي المتسولين والباعة الجائلين بالظبط

المهم الحمد لله ربنا ستر والمترو اللي جه مكنش فيه ولاد "الا القليل اللي شكلهم مش بتاع اذية" ركبت واخويا قالي انه هيركب العربية المشتركة ولو حد ضايقني اتصل عليه وهو يجيلي في المحطة اللي بعدها

الفكرة مش في حوار اليوم كله الفكرة في سبب اللي بيحصل واللي خلاني بجد مش فارق معايا الكائنات دي خالص لدرجة قلت والله خسارة فيهم الحياة اصلا دا لو مصر قامت بحرب نحط دول على خط المشاة في واجهة الجيش عشان يموتوا افيدلهم ولنا واهو نقول داهية ما ترجعهم

ازاي انسان يوصل بقيمته انه يبقى بهذا الشكل وتكون دي قيمته وسط الناس

بحسهم فعلا حيوانات حتى الحيوانات عندها ضمير بيرشدها للصح والغلط
الحيوانات مش بتقتل الفريسة غير لما تكون جعانة

المهم بقى نسيبنا من موال الكئابة اللي فوق دي

انا فرحانة قوي لأني اخيرًا لقيت "الشوزة" اللي كنت بدور عليها بقالي شهووووووووووووور
مبسوطة بيها قوي "اللهم اني أسألك خيرها وخير ما صنعت له واعوذ بك من شرها وشر ما صنعت له" وربنا يفرح قلوبنا جميعا يا رب

الثلاثاء، 21 أغسطس، 2012

حاجة


بسم الله الرحمن الرحيم
السلام عليكم ورحمة الله وبركاته

حاجة

حاجة المفروض اكتبها عشان مسبش المدونة يعشش فيها  العنكبوت

حاجة وخلاص اي حاجة ولسة مش عارفة هكتب ايه

بقالي فترة طويلة قوي مقعدتش على جهازي لدرجة اني ببص لقيت التراب مالي المكتب والكيبورد بس برضه منظفتوش وقعدت اكتب حاليا وهو مترب وانا مقروفة

الحمد لله قبضت الشهور المتأخرة في الشغل وعايزة اجيب لابتوب بس لسة مش عارفة اجيبه انهو نوع واي امكانيات لسة مش مستقرة لأني لسة مش عارفة بكرة اعمل ايه

قدمت في منحة ITI ونتيجة الانترفيو في نص سبتمبر

تقديم الدبلومات بيقفل على نص سبتمبر او اخره

ناس كتير بتشجعني اكمل الطريق اللي مشيت اوله لكن انا مش عاوزة اكمل في جامعة المنصورة دا لو كملت لأني حاسة اني بدفع فلوس على ورقة وانا مستفدتش علم وبيبقى ضغط عصبي عالفاضي

الشغل مخنوقة اه من البلد اللي شغالة فيها وساعات بتجيلي افكار وهواجس ومشاعر سلبية للغاية تجاه البلد دي بتخليني خلاص عاوزة اقلب الكباية باللي فيها ومش عاوزة اكمل في الحكومة

ولما الاقي ناس كتير قوي عمالة تصبرني وتقولي انتي بتأدي رسالة "اللي هي ضاعت مني اساسا" بدعي ربنا يا رب نور بصيرتي وقدرني وثبتني عالصح

المشكلة اني عارفة اني مش زي مالناس متخيلاني بقى بطل سالل سيفه امام جيوش الاعداء لا خالص انا مش كدا ودا بيسببلي ضغط نفسي من نوع اخر

ساعات بلاقي افكار بتنور في بالي وببقى نفسي اطبقها في شغلي لكن سرعان ما تغمر مرة تانية

ربنا يقدرني يا رب

كنت بقول لخالتي انا بحب اللون الاصفر قوي
قالتلي انتي شخصية غيورة

!!!
من مين؟!
غيرة حلوة ولا وحشة طيب؟

أهم حاجة بقى كل سنة وانتم طيبين وربنا يتقبل مننا رمضان

وبالمناسبة اغنية اعلان موبينيل تحفة وعلى رأي بنت خالتي "خسارة في موبينيل"