الأحد، 27 مايو 2012
بسم الله الرحمن الرحيم
السلام عليكم ورحمة الله وبركاته
أحب أقول لكل المحبطين
والمصدومين
واللي بجد مش مصدقين
انتوا تاو ما فهمتوا اللي فيها!!!!!
أصلي بجد غلبت أهاتي وأنادي وأحاول أقنع الناس اللي أعرفهم
المشكلة لا في نظام ولا في رأس نظام ولا في مجلس شعب ولا شورى ولا بطيخ أزرق
المشكلة في الشعب المصري نفسه
المشكلة في كل واحد فينا
أيوة ومتقوليش واحنا مالنا داحنا اللي بنفهم وهم مبيفهموش
لأ اعذرني كلنا لا نفهم يا عزيزي
حضرتك صممت تحط في ودنك فليينة وتتجاهل تماما شعبك اللي بطبيعته "....." ولا بلاش اتكلم دلوقتي احسن الناس تقول اني بقول كدا لمجرد انهم اختاروا شفيق
ياما حاولت اتكلم يقولولي انتي ضد الثورة
وهو انا ليه كنت معترضة على كلمة ثورة من البداية ولما بقولها لحد "من شباب الثورة" بقولها وانا بجبر خاطره
لأن بكل بساطة انتم ناس رافضين مبدأ لكن مقدرتوش تقنعوا اللي حواليكم بمبدأكم أصلا
مش هقول دا عيب فيكم لكن خطأ "يمكن" تداركه
وانا ليه مكنتش بنزل في مظاهرات في أي مكان رغم اني متضامنة جدا مع فكرة التغيير
لكن التغيير لما ييجي من رأس الفساد "وبس" بكل بساطة اللي هييجي جديد هيبقى فاسد
انت محاولتش حتى تصلح نفوس الناس
مش هقولك صلح الفاسدين لكن عالأقل حاول تجمع في صفك الناس اللي ماشية مع التيار وخلاص اللي بيعملوا زي مالناس بتعمل
أنا ضد الاخوان وبقولها بعلو صوتي انا ضد الاخوااااااااااااااان وشايفة ان كفاية عليهم قوي مجلس اللعب
منظمين على عيني وراسي لكن مش اي شيء منظم يبقى كويس
واللي بيفكر ينتخب الاخوان ويقولك اصل احنا محتاجين نغير دم لأ عدم اللـ... وقت ما هترشح الاخوان انسى حاجة اسمها دولة القانون هتبقى دولة الغاب "ودا طبعا مع احترامي لكل اللي اعرفهم من الاخوان احترامي لك لا يستلزم بالضرورة احترامي لتوجهاتك" لأن بكل بساطة الاخوان عمرهم ما احترموا القانون من أول السطر لآخر نقطة في السطر وفرض الرأي وانت داخل اللجنة ويقولك انتخب الحرية والعدالة "دا باعتبار اني واحدة مغييبة ومستنية معاليهم لما يقترحوا عليا انتخب مين
سيبنا من نقطة الاخوان
وسيبنا من الناس اللي بتردد كلام وخلاص وهي مش هاين عليها تقرأ ودا كذلك من أكبر عيوب المنضمين للثائرين أحب أقولهم علشان تبقى ثائر بحق وحقيقي مينفعش يعني تقول معلومة لأنك بس سمعتها وييجي واحد سواق تاكسي "مع احترامي لسائقي التاكسيات" يطلعك ولا فاهم أي حاجة حاول تخرج من إطار البغبغانات اللي تسمعه تردده بدون حتى ما تكلف خاطرك تبحث عن أصله
سواء الاخوان او شفيق اللي ينجح فيهم أعتقد دلوقتي هيبقى واضح قوي نقاط الضعف اللي حصلت في الثورة "ودلوقتي بقول عليها ثورة مش لمجرد جبران الخواطر لكن لأنها بالفعل حققت حاجات كتير رغم إنها محققتش حاجات تانية اكتر" وهيبقى فيه فرصة إننا نحاول "ولأول مرة بقول إننا وبجمع نفسي ومش بقول انهم لأني كنت ومازلت على مبدئي ولسة بعمل به حتى الآن وهو اني بحاول في السواد الأعظم الحقيقي الفساد اللي من تحت" نفهم الناس الصح والغلط مش هقول نفهمهم حقوقهم وواجباتهم لأن دي هم فهمنها كويس قوي لكن دول ناس بيزوروا ويقولك -من اضطر غير باغ ولا عاد- وهم متعودة دايماااااااا
عاوزين نوصل بهم لمبدأ لأ دا غلط يبقى مش هعمله ومش هسمح لحد يضغط عليا اني اعمله
لما نبقى كدا بجد وقتها هينفع نقول نثور على الفساد
لأن في تفسيري كلمة ثورة على الفساد وكأن الفساد غطاء وما تحته الخير ونحن نثور على هذا الفساد لينقشع فيظهر الخير
لكن اللي حصل انها كانت حلة شوربة معفنة ومجرد ما رفعت الغطا وقلبت الشوربة ريحتها المهببة فاحت
والهاموش اللي كان ملموم على حلة الشوربة قالك لا يا عم الشوربة دي معفنة ويكأنها مفاجأة مثلا وقالك أنا هروح ادورلي على طبخة تانية آكل منها
يا راجل جديدة دي لا مكنتش اعرف تصدق ان الشوربة بايظة اصل مش باين عليها
كلامي مش شماتة بس بعرف الناس اللي اتريقت عليا زمان لما شبعت وقالتلي كلام بايخ كتير وعديته "أتمنى دلوقتي يكون رأيي وضح ووجهة نظري تكون وصلت"
أصلكم مأخدتوش بالكم من أهم حاجة "من أعمالكم سلط عليكم" مش هقول للناس الثائرة من أعمالهم هم لأ فيهم ناس كتير محترمة وفعلا رافضة اللي بيحصل وناس مبتسكتش عالغلط
بتكلم عاللي رافضين يفكروا في اللي هم بيعملوه واللي بيدعوا الناس تعمله وبيحللولهم الحرام ويبسطوه ويرجع يقولك يسقط الفساد مش لما نبقى نفهم الأول يعني ايه فساد؟ ويعني ايه اسقاط؟
وأحب أوجه رسالة لكل متشائم من نتائج الانتخابات واللي خايف من بكرة
يا سيدي لو حصل "ودا احتمال ضعيف" وأحمد شفيق مسك البلد ولو حصل ومعملش حاجة عدلة وطينها ومقضاش عالفساد أكيد أكيد يعني الاخوان مش هيسلموا بسهولة يعني لا هم ولا الثوار وبكل بسطاة الاخوان هيخلوه يحصل السادات يعني متقلقوش
أما في حالة الاخوان مسكوا ويعني حصلت معجزة وخلوا مصر دولة قانون واتبعوا القانون ومثلا مثلا موظفي الحكومة "واللي بالمناسبة الى الآن مش عاملين أي وزن للبرلمان" احترموا قراراتهم واللي متوقعاه لو الاعادة كانت بين الاخوان وشفيق الاخوان هي اللي تمسك وقتها لو حصل والتزموا "مع اني استبعد" هيبقى خير وبركة
أما لو محصلش إممممم مش عارفة الحقيقة المفروض ايه اللي يحصل؟!!
الفكرة مكانتش فكرة اختيار شفيق من عدمه
الفكرة فكرة الاعتياد على الخطأ باعتباره أمر مسلم به لا يمكن تغييييييييييييييييييره
اقنع اللي بيرمي زبالة في الشارع انه بيعمل حاجة غلط وبعدين اقنعه بعدها ان النظام السابق كخ وان التغيير للأفضل دح
أحب بس أقول حاجة للراجل اللي مرشح نفسه السيد شفيق
أحب بس أقول حاجة للراجل اللي مرشح نفسه السيد شفيق
احترم فيك وضوحك الشديد وثباتك على موقفك
مش زي ناس ماشية مع الموجة
زي حاجة كلنا مش عاوزين نصدقها وبندفن دماغنا في الرمل منها
هو ليه في نظر الكثيرين "من الغرب" ان اسرائيل "دولة عظيمة" دا لو احنا كعرب اصلا اعتبرناهم شعب اصلا عشان نعتبرهم دولة "ربنا يبيدهم على ايدينا يا رب" لأن بكل بساطة دول ناس مش بتوع كلام دي ناس بتشتغل
وأتمنى نفهم في يوم معنى كلمة ان واحد معندوش وقت يضيعه في الكلام
دع عملك يتحدث عنك ولا تبالغ في الحديث عما تنتوي عمله
وأحب أقول لأي حد مش عاجبه طبخ ماما وناوي يضرب عن الطعام
إن مكنش عاجبك أكل ماما اختارلك حاجة من اتنين يا تبطل اكل يا تتعلم الطبخ وتطبخ انت
وأتمنى الرسالة تكون وصلت
الاشتراك في:
تعليقات الرسالة (Atom)
2 آراءكم:
اول مره ف حياتى اختلف معاكى بنسبه تفوق ال 50 % واختلافى معاكى ف نهايه المقاله هو اللى خلى النسبه ترتفع اوى على فكره نار الاخوان ولا جنه شفيق ده لو هنشوف اصلاً على ايامه جنه مش هقولك ان الاخوان دول مننا وان اختلافهم بس معانا سياسى وممكن يتحل وان شفيق مشارك ف قتل الشهداء لان من اعان ظالماً على ظلمه فقد خرج من الاسلام وده حديث للرسول صلى الله عليه وسلم اما بالنسبه للجزء بتاع الثوره لو انتى شخص وعايزه تغيرى العالم هتبدأى بنفسك تمام؟ طب افرضى انتى اتغيرتى واللى حواليكى زى ماهما هتعملى ايه ؟
عليه الصلاة والسلام
تمام
ماهو دا اللي قلت عليه هحاول معاهم ومش بسكت عالغلط وبتكلم معاهم بثقة علشان يعرفوا قد ايه هم غلط وفنفس الوقت مش هكلمهم من برج عالي عشان كلامي يوصلهم والنصيحة متبقاش فضيحة
بالنسبة للاختلاف في الرأي انا لم أدعي ان شفيق جنة بالعكس انا بتكلم على حقائق
وإن كنا بالفعل مؤمنين إن اللي اتقتلوا دول شهداء فهم مش منتظرين مننا حق نجبهولهم لأن الشهداء فعليا جزائهم وحقهم هو الشهادة في حد ذاتها
وإن كان فعلا دا اللي حاصل فليه اخاف ان شفيق يقتل كمان وكمان؟!! الموت في سبيل الحرية بالنسبة لي أشرف من الرضوخ للحلول الوسط
وطالما الثورة لسة مكملتش يبقى لا نصبر على شفيق ولا على الاخوان
بالنسبالي شفيق استمرار للوضع أما الاخوان فهم مساومة على وضع والانتظار ومحاولة التكيف والتأقلم معه واللي طلع مرة هيقولك مش كفاية بقى واسقطوا النظام عاوزين ايه تاني وعمره ماهو طالع تاني
طبعًا انا لا أتحدث عن ثقة الـ 100% لأنه لا يعلم الغيب والحق إلا الله وهذا ما أثق به وعليه فإنني ادعو الله دومًا أن يرينا الحق حق ويرزقنا اتباعه ويرينا الباطل باطل ويرزقنا اجتنابه
انا بس عندي سؤال جانبي
هي ايه آخرة التنازلات؟!
الثورة كانت ثورة ضد فساد وتحولت لثورة لإسقاط نظام مع الفرق الواضح بين الاثنين
الفساد مازال ومن الواضح أنه سيظل مستشري في شرايين مصر
إرسال تعليق