الجمعة، 18 مايو 2012
بسم الله الرحمن الرحيم
السلام عليكم ورحمة الله وبركاته
كام فكرة ومكنتش بكتبهم في بوستات لوحدهم بس النهاردة طفح الكيل
نبدأ بالأخطاء السمعية
كان عيد ميلاد ماما "وعشان الناس متزعلش" يوم ميلاد ماما
وقلت أجبلها عطر هدية ورحت للراجل عشان اجيب عطر فكان والده اللي قاعد بقوله لو سمحت عاوزة عطر "برسيف" الراجل استغرب كدا وبرقلي "برسيييييييييل!!!"
يا عمو برسيييف برسيف
فحفيده بيقوله برسيف يا جدو مش برسيل المهم في الوقت دا كان صاحب المحل جه وقالي انه خلصان ومش بيجيله غير لما بينزل عليه عروض
فقررت أغير وقلتله على "بلو ليدي" وجبته بس ضحكت على برسيل دي ضحك
النهاردة وانا مروحة من الكورس قابلتني بنت ووالدتها في الشارع والبنت بتقولي لو سمحتي شارع الجلاء اللي عليه "نجوم" منين
طبعًا انا فتحت بقي بنظرة الغباء اياها بتاعت الراجل وقلتلها شارع الجلاء اللي عليه "نجوم؟!" نجوم ازاي يعني؟!
فوالدتها بتقولي اللي بيبيعوا فيه ملابس يعني ملابس
هي افتكرتني اجنبية باين ولا ايه المهم شاورتلها عالشارع وبعد ما مشيت فهمت ان البنت كانت بتقول "هدوم" مش نجوم"
بس برضه ازاي عليه هدوم؟! هو ترابيزة؟! اسمها بيبيع هدوم وبعدين اصلا مش الشارع اللي بيبيع الهدوم اسمها اللي فيه محلات الهدوم
المهم اني مشيت بعدها اضحك مع نفسي
*************
لحد ما وصلت البيت واللي مقلتلكوش عليه من طلبات الترقية في البوست اللي قبل اللي فات انهم طالبين مني امحي امية خمس افراد من سن 16 الى 35 سنة في خمس شهور ومن المركز اللي انا تابعة ليه
وبكدا نكون دخلنا في النص التاني من عنوان البوست داهية تاخدهم
مبدئيًا انا لست ممتنعة عن تعليم الكبار لكن مفيش حد في الفئة العمرية دي بيسعى انه يتعلم وعليه
ادارة محو الأمية رفعت ايدها من توفير هذه الفئة والراغبة في التعليم ورموا على عاتقنا احنا ان نجمعهم واحنا اللي نعلمهم واحنا اللي نمتحنهم وناقص احنا اللي ناخد الشهادات مش هم
وبناء عليه لما تحاول تلف على هؤلاء الذين لم يفلحوا في تلقي قسط كاف من التعليم اللي منهم هيبقى فاق لنفسه وعرف أهمية "الشهادات" في مصر بكل صلف "وكأنك بتشحت منه" هيقولك هاجي بس بشرط انا مش هحضر الحصص وهاجي عالامتحان على طول وفي الامتحان تغششني وتنجحني لأني عاوز الشهادة
دا نوع
النوع التاني واللي أذهلني بصراحة يوقلك عاوزني أحضر الحصص اديلي 15 جنيه في الحصة "ورأي آخر يقولك 20" ولو افترضنا انهم 10 في الفصل وبياخدوا 3 حصص في الاسبوع في مدة خمس شهور يعني هتصفى في النهاية على عشر آلاف جنيه وليه علشان يتفضلوا كرامًا ويتعطفوا ويتعلموا
داهية تاخدكم وتريحنا منكم وان شاء الله ما اتعلمتم أبدًا اللي بيفكر بالطريقة دي مش بعيد أبدًا ميتمرش فيه تعليم هم واخدنها متاجرة وفيه غيرهم هيموت عالعلم وبيشقى ويتعب ويقرص على نفسه عشان يوفر فلوس للعلم
كنت بجد دمي محروق جدًا من الأشكال اللي شفتها وكنت بجد متضايقة جدا وانا بكلم بابا وبحكيله علشان يفاجئني ويقولي وماله نقعد معاهم ونفهم شروطهم ونعرف منهم مطالبهم طبعا انا كنت هولع من كلام بابا نقعد مع ميييييييين؟
قالي انتي عاوزة تسمعي ولا عايزة تخبطي دماغك في الحيط وخلاص؟ قلتله اسمع قالي يبقى تهدي وتفهمي
وقالي ان اللي اتسرب من التعليم له اسبابه يمكن معهوش فلوس يكمل تعليمه وبالتالي ساب التعليم عشان يشتغل شغلانة يكسب منها ويمكن اصلا دماغه مش جايبة تعليم ودا عمره ما هيتعلم الا اذا اديتيله حافز
في الحالة الاولى انتي هتقطتعي من وقت عمله ومن دخله في وقت الحصة فهو عاوز اللي يعوضه عن الوقت دا ودا من حقه
وفي الحالة التانية كذلك اللي رافض حاجة عمره ما هيقبلها كدا بصدر رحب من غير محفز
وبدأ يقترح عليا اقتراحات حلوة قوي اننا مثلا نطلب دعم جمعية او مؤسسة خيرية تتكفل بدفع المكافآت دي ونعملها في صورة منحة مثلا كل مبلغ الدارس هياخده هيمضي انه استلمه ويمضي اقرار انه في حالة منجحش في الامتحان ملزم برد كل مبلغ اخده نظير تعليمه ودا لضمان الجدية وميكنش واحد جاي يتاجر وخلاص وفي نفس الوقت نعملهم مقابلة شخصية نعرف من خلالها هل هم فعلا عاوزين يتعلموا ولا بيضيعوا وقت وخلاص
طبعا كلام بابا كان جميل جدًا واقتراحه رائع بس للأسف افحمته انا بالعقد بتاع تعليم الكبار واللي فيه انا بتعهد بعدم اعطاء اي مكافآت او مقابل مادي للدارس في مقابل تعلمه وكذلك بتعهد بعدم أخذ أي هدايا أو مكافآت عن تعليمي لهم
طبعًا انا قلت لبابا على البند دا ولقيته بقى أخد شوية من الضيق اللي انا فيه وقالي لأ دول يبقوا بيستهبلوا بقى وعاملين شرط تعجيزي ومش عاوزين يعلموا حد وهو اللي ساب التعليم وهو صغير ايه اللي يخليه يرجعله بعد ما يكبر ومخه ينحس؟! وفضل يقولي انتي لازم تكتبي مذكرة بالكلام اللي قلتيه دا كله وبرأيك واللي شفتيه ونروح لوكيل الوزارة ونعرضه عليه
بابا افكاره حلوة جدا بس للأسف انا عارفة اللي هيحصل في بلدنا العظيمة مصر زي اللي حصل بالظبط لما بابا اقترح عليا اني اروح للمعسكر اللي جنبنا واقابل قائد المعسكر واعرض عليه اني اعلم العساكر الاميين وبكدا يستغلوا فترة وجودهم في الجيش و "بلا بلا بلا" دا اللي كان حاسس به قائد المعسكر وانا بكلمه منفضلي تمامًا ولا كأني بتكلم أصلا وكل ماقترح عليه حاجة ولا افتح بقي يصُدني في الكلام آخر ما زهقت اديته ورقة الاعلان اللي انا عملااها وطلبت منه انه حتى يعلقها للعساكر عشان اللي عنده حد في عيلته عاوز يتعلم يقرأها وبكدا احنا نكون أخدنا ثواب وفنفس الوقت ساعدنا في رُقي مصر و"بلا بلا بلا كذلك" المهم انه حتى مرضاش ياخد الورقة ورجعهالي
ما كان مني الا اني قلتله آسفة على الازعاج وشاكرة لحضرتك "حسن" تعاونك .. وانا خارجة بقول في سري حسبي الله ونعم الوكيل
وخرجت من المعسكر ولفيت على المساجد اللي في الجوار وكل مادي لشيخ جامع الورقة واطلب منه يقرأها للمصلين أو في أثناء خطبة يقولي حاضر هعلقها في لوحة الاعلاانات "دا على اساس ان فيه حد بيلتفت للوحة الاعلانات اصلا" اقوله بس حضرتك هو لو أمي هيقرأ الورقة ازاي؟! يقولي حد يقرأهاله وسبحان الله نفس رد الفعل من شيوخ المساجد
قررت ألف على محلات البقالة اللي في المنطقة ووزعت عليهم الورق بتاع الاعلانات اللي عملته وواضح انهم دخلوا من ودانهم دي وطلعوا من التانية ومش بعيد مجرد ما دورت وشي يكونوا رموا الورقة اصلا
يمكن مش مستبعدة اني الاقي نفسي في يوم واقفة على الكوبري وبحدف ورق الاعلانات من ازاز العربيات >_<
طبعًا بابا صعب عليه حالي وقالي انتي مش ملزمة انك تجمعي الأميين انتي واجبك تعلميهم مش انك تشتغلي للادارة مندوبة تسويق
رغم الجهل والأمية والتخلف والرجعية اللي مصر غرقانة فيهم حد أذنيها الا انك تكتشف وقت ما تحاول تصلح حاجة زي دي ان المريض بيقولك انا معنديش حاجة يا دكتور وصحتي زي البمب
الفكر الانتهازي الاستغلالي اللي مستشري في فئة ليست بالقليلة من الشعب المصري هو اللي بيعطل مسيرة التقدم لما المرضى يروحوا لطالب الامتياز "بعتباره مليونير" ويقولوله مش هنقولك عن الاعراض اللي عندنا الا لما تدينا فلوس.. على الرغم من انهم لو قالوله هم اللي هيبقوا الكسبانين زيه بالظبط لأنه هيعالجهم ومجانًا بس هو الجشع
وكذلك الجاهل الأمي لما يروح لمدرس ويقوله عاوز تعلمني اديلي فلوس "وكأنه رايح لقارون وهيغرف ويديله" في حين انه لو مطلبش كل الأطراف هيبقى لها نفس القدر من المكسب هو هيتعلم وهياخد شهادة يشتغل بيها والمدرس أوراقه هتمشي.. بس هو الطمع
هتفضلي على حالك يا مصر طول ما ولادك كل واحد فيهم مش شايف غير مكاسب اللي قدامه بس ومش عارف او مش مقدر المكاسب اللي هو طالع بيها ومش راضي بيها
أنا عن نفسي مش فارق معايا الترقية ولا التعيين وفي لحظة وعلى الجزمة هقولهم ان شاء الله ما علمت حد ولا اتثبت وانا اصلا مش فارقة معايا دانا بس كنت حابة اعمل حاجة في دنيتي أقابل بها ربنا لكن مش لدرجة اني اخسر نفسي بالشكل دا ويقولك يا تديني رشوة يا تغششيني بجد قرفوني من كل حاجة في الحياة وأحب أقولهم رسالة لكل واحد بيفكل بالطريقة دي
لأ يا حبيبي وعلى إيه خليك في الوحل اللي انت فيه وانغمس فيه أكتر وأكتر
علشان تعرفوا ان مشكلة مصر عمرها ما كانت في نقص فرص عمل ولا في فساد تعليم المشكلة كانت في فساد النفس البشرية اللي عاوز يوصل واللي عاوز يعمل ربنا بيساعده أما اللي مستني كل حاجة في الحياة تجيله على طبق من ألماظ دا هيشوف بالظبط ايه اللي هيجيله وايه نصيبه في الدنيا والآخرة
ومتنساش تستمتع بالوحل اللي انت قاعد فيه واوعى تفكر تقوم منه أصله جزء منك
الاشتراك في:
تعليقات الرسالة (Atom)
6 آراءكم:
بتفكريني بنفسي وبمبادئي . انا مريت بنفس تجربتك ولسه بعافر علشان زي ما قولتي يبقى لي دور في الدنيا ونحس اننا عملنا حاجه
خليكي قوية ومحاربه للنور واوعي تستسلمي. احنا نقطة النور في الضلمه.
ربنا يسعدك يا ايناس
هم كل اللي اسمهم ايناس بيعافروا علشان مبادئهم ولا ايه؟!
طيب طمنيني هل هتنور ولا الانسحاب هيكون رفيقي؟!
أمين . انا وانتي يا إيناس :)
ههههههههه تقريبا كده :) اللي اسمهم إيناس مش كتير في الحياه أصلا :)
إنتي شايفه إيه؟
^_^ اللهم آمين
:) ههههههه أيون أيون أتفق معكِ
انا هسيب تكالي على الله وربنا يقدرني وان شاء الله وربنا يثبتني ووقت ما احس اني هنجرف لموجة الفساد ممكن وقتها أقفل الدفتر دا على اللي فيه وأحاول ادور على كتاب تاني أفتحه
قرأتها بس مش عارفة مين قالها لو حاربك الناس على الدنيا فاتركها لهم وان حاربوك على الآخرة فانتصر عليهم وقتها ستجد الدنيا والآخرة بين يديك
عجبتني قوي
- بالنسبة للأخطاء السمعية .. كتير بنقع فيها .. المشكلة بس بتبقى لما حد بيسمع كلمة غلط وبيتعود عليها وبيكتبها بالطريقة اللي سمعها بيها .. زي قمبلة بدلاً من قنبلة وغيرها
- بالنسبة للبوست .. أسلوبك في السرد جميل ، يشد القاريء ، وبتعرفي تصوري الموقف كويس ، وتعرضي وجهة نظرك بطريقة لطيفة ، وحقيقي أنا استمتعت جداً بالبوست وضحكت على المواقف اللي انتي ذكرتيها بس فِ نفس الوقت كنت زعلان على اللي بيحصل في البلد والبهدلة اللي الشباب بيتبهدلها علشان يشتغل ، اقتراح الوالد بصراحة عجبني جداً ، بس للأسف واضح – بعد اللي شفتيه - أنه هايفضل مجرد إقتراح !
- للأسف ما عنديش حل أو اقتراح معين أقدر أفيدك بيه ، ربنا يكرمك وييسر لك اللي فيه الخير إن شاء الله .
تحياتي
اه فعلا من ضمن الحاجات دي زمان كنت بقول على كلمة "جنبي" جمبي >_<
الله يكرمك يا باشا بجد دا من بعض ما عندكم حقيقي رفعت من روحي المعنوية كتير بجد
انا نفسي جو نفسي تجاه الناس دي فيه تناقضات حبة بلاقي نفسي قاسية عليهم قوي لكن لما بتغرس فيهم في خضم الحياة "حلوة خضم الحياة دي هههههههه" بلعن اللي جابوهم
انا تقريبًا حلي في الدعوات
يا رب اللهم آمين نحن واياكم
شرفتنا
إرسال تعليق