الجمعة، 1 مارس 2013

لم أغفر

بسم الله الرحمن الرحيم
السلام عليكم ورحمة الله وبركاته

الله يسامحك يالشيماء

بجد أنا مودي بيتقلب 180 درجة كل مافتح الكشكول بتاع التفصيل بتاعي

من سبع سنين أخذت كورس تفصيل وأنا من النوع اللي بيكتب كل نَفَس المدرب بيتنفسه دا غير إني بعتني جدًا بالمحاضرات اللي بكتبها وخاصة لو في حاجة أنا بحبها

الكشكول دا بجد كان حياتي فيه وكاتبة فيه كل حاجة عن التفصيل

وفيوم طلبت مني الشيماء أعلمها التفصيل ونعمل مع بعض فستان

وأنا مكذبتش خبر لإني بحب أعلم الناس الحاجة اللي اتعلمتها علشان آخذ ثواب وعشان كمان لما بتدرب حد على حاجة اتعلمتها معلوماتك بتثبت أكتر

فاليوم دا أنا ملحقتش أعمل معاها حاجة وسبت عندها الكشكول وروحت وقلتلها خلي الكشكول في عنيكي وأكدت عليها كتير تحافظ عليه

وللأسف مجتش فرصة إني أقدر أروحلها علشان أعلمها وكنت دايمًا بسألها عالكشكول تقولي موجود تعالي خديه وكل ما أروحلها عشان آخده تقولي حاضر وفالنهاية متدهوليش لأي سبب

المهم بعدها بسنتين أو يمكن أكتر بعد طول إلحاح وفاليوم دا كنت رايحالها عشان حاجة تانية أصلا وأنا قاعدة عالمكتب بتاعها -وهي كانت قالتلي انها مش لاقية الكشكول وإنها كانت عايناه في حتة أمان ونسيت المكان اللي عانته فيه- ببص عالكتب اللي عالمكتب وأفاجأ بإن الكشكول بتاع التفصيل بتاعي بينهم

طبعًا أنا استغربت طالما هو قدامها عالمكتب ليه بتقولي انها مش لاقياه؟!!

وقررت أطلعه من بين الكتب وأقولها إني هاخده -هي كانت رايحة تجبلي حاجة أشربها- وبطلعه وأبص فيه اتصدمت بجد صُعقت بمعنى أصح

الكشكول اللي أكدت عليها ياما تحافظ عليه زي عنيها ومتكلة على إنها نسياه فالمكان الأمين اللي كانت عيناه فيه، لقيته متقطع الورق اللي جواه بطريقة همجية ومتشخبط فيه وشوية ورق تانين كانوا مقطوعين ومتكرمشين ومحطوتين جواه

أنا مش عاوزة أقولكم كان رد فعلي إيه ولا إحساسي...

أنا قررت أحط الكشكول قدام عينها بحيث لما تدخل الأوضة تشوفه قدامي وقدامها عالمكتب

وبالفعل هي دخلت وحطت الصينية وبتبص وتقولي آه كشكول الخياطة بتاعك دا كان هنا

وأنا مردتش منتظرة المبرر الخطير اللي هتقوله عالمهزلة اللي حصلت فالكشكول

لقتها بتقولي أنا آسفة جدًا أصل أخويا كان قاعد يذاكر مع أصحابه وكان مفكره كشكول قديم وقطع منه ورق لكن أنا هزأته وحطيت الورق جواه تاني وأنا مش عارفة أعتذرلك ازاي وكلام كتير

مقدرتش أرد عليها غير إني قلتلها لا عادي ولا يهمك -هقولها إيه بعد ما فات سنتين بتقولي الكشكول ضايع وهو موجود قدامها وهي عارفة انه متقطع وساكتة!! حتى لو كانت قالتلي من وقتها كان أرحم- وأخذت الكشكول وكملت كلام معاها عالحاجة اللي كنت ريحالها عشانها وروحت بعدها

لكن كل مابص فالكشكول وفكل مرة أكتشف إن فيه صفحات من الشرح ضايعة بالفعل وانها متأكدتش إن كل الأوراق موجودة ولا حاجة بجد مودي بيتقلب تمامًا وأنسى بقى حبي للتفصيل والحاجة اللي منهمكة في تفصيلها وأقعد أفكر وأقول -الله يسامحك يا الشيماء- أنا من وقتها مكلمتهاش تاني غير مرة واحدة سريعة فالتليفون

لكن أكيد مش هقدر أرجع لطبيعتي مع حد فرط في حاجة عزيزة عليا بالشكل دا

وخاصة لو كانت كتب استعارها ومرجعهاش أو حاجة أنا عملاها ومستأمناه عليها

إلى الآن وفات على الموضوع دا مدة طويلة إلا إني بجد مش قادرة أغفر

ومش عاوزة أحسبن لإني قلتلها وقتها إنه عادي وميهمهاش

وكل اللي أقدر أقوله حاليًا

الله يسامحك يا الشيماء

7 آراءكم:

P A S H A on 1 مارس 2013 في 4:23 ص يقول...

وأنا باقرا الموضوع ده دمي اتحرق جداً .. لأنه فكرني بكتب كتيرة عزيزة عليا جداً كنت مسلفها لصحابي وأهملوا فيها ، لدرجة إني لما كنت أشوف الكتاب بتاعي عند حد منهم وألاقي فيه صفحة متنية أو متعلم فيه بالقلم الرصاص كنت باسيبه لصاحبي وباشتري غيره وأحلف ما أنا مسلفه كتاب من عندي تاني !! لأ وكنت بجد بازعل منه وباقعد فترة مش عارف أعامله ومخنوق منه لأني باحس أنه أهانني أنا شخصياً .

الكلام ده كان تقريباً من خمستاشر عشرين سنة .. دلوقت باقول في داهية كل كتب الدنيا بس ما أخسرش أي حد ولا أخليه يزعل مني أبداً أو يزعل من نفسه وربنا يبارك لنا في بعض ونفضل أصحاب .

صدقيني صاحبتك أكيد زعلت على الكشكول
ومش عاوز أقول لك يمكن أكتر منك كمان بدليل أنها خبيته سنتين عنك .. هي من كسوفها منك تلاقيها ما كانتش عارفه توريهولك لأنها عارفة هو مهم قد إيه بالنسبة لك .. كفاية عليها التأنيب اللي هي حاساه بسبب الكشكول .

وربنا يصلح الأحوال

P A S H A on 1 مارس 2013 في 4:50 ص يقول...

معلش يا أستاذة أنا هاستأذنك في تعليق تاني بعد إذن حضرتك لأن الموقف ده فكرني بحاجة شبيهة حصلت معايا من عشرين سنة بالظبط .

كان ليا واحد صاحبي باباه كان مسافر السعودية فترة طويلة وما نزلش مصر لمدة عشر سنين تقريباً .. المهم لما باباه نزل مصر جاب له ساعة رقمية هدية .. ومش عاوز أقول لك صاحبي كان فرحان بيها قد إيه .. المهم في يوم كنا بنهزر مع بعض على السلم في بيت واحد صاحبنا واستفزني فزقيت دراعة الساعة اتكسرت !!
مش عاوز أقول لك إنه دمع قدامي وأنا اتخنقت أوي من نفسي .. خدت منه الساعة ووعدته إني هاصلحها له أو اشتري له واحدة جديدة بدالها .. رحت لكذا واحد ساعاتي قالو لي مش هاينفع تتصلح !! سألت ع الساعة الجديدة لقيتها غالية جداً - وقتها - فقلت أحوش من مصروفي كل شهر مبلغ لحد ما أجمع تمن الساعة وشيلتها في درج المكتب عندي .. فات شهر واتنين وتلاتة وأنا باتهرب من صاحبي كل يوم سواء الصبح في المدرسة أو بالليل في البيت اللي كنا بناخد فيه درس سوا .. وطبعاً باباه كان اتخانق معاه بسبب الساعة .. المهم بعد فترة طويلة تشاء الظروف أنه ييجي البيت عندي ويسألني على حاجة - تقريباً شريط كاسيت - وأقول له : افتح درج المكتب هاتلاقيه !!
فإذا به يفتح الدرج ويطلع الساعة !!
أنا ساعتها ما نطقتش بحرف !!
ما بقتش عارف أقول له إيه !!
أعتقد أن أي مبرر ساعتها ما كانش هايقنعه !!
صح ؟؟
وطبعاً من بعدها غير معاملته ليا تماماً وما بقيناش أصحاب زي الأول .

E73 on 1 مارس 2013 في 6:32 م يقول...

باشا..

التعليق التاني دا بجد ولا قصة من القصص اللي بتكتبها فالمدونة؟!!

هو بصراحة خلاني ابتسمت وانا كنت مخنوقة

..........

يعني المفروض أبقى عادي؟!

هحاول

وانا شاكرة لحضرتك جدا عالتعليقين :)

زينب علي حبيب on 4 مارس 2013 في 5:41 م يقول...

انا لو مكانك يا باشا كنت كملت التحويش واشتريت له البدل وارضيت ضميري على الاقل ... بس هو موقف بجد صعب وبتحصل

============

الموقف مزعج اووي بجد ... ومش بلومك فيه خالص ...بس بجد خدي كلام باشا على محمل الجد ... احيانا بتحصل حاجات مش بارادتنا ...

انا مرة استلفت كتاب من وحدة لتعليم الانجلش ... الكتاب مكنش اصلي يعني مطبوع وكدا فانا وبقلب فيه وبقرا اتفكك ليجي ثلاث اجزاء ... يعني بقا الجلاد فمطرح والمحتوى نصين وفي ورقتين طالعين ... انا كنت محافظة عليه ومعملتلهوش حاجة هو اللي طابعو ممهتمش فيه ... بس والله زعلت اوي وكلني ضميري ... وقررت اني مستلفش حاجة تانية خالص ... اللي يعجبني انا اشتريه وخلاص كدا ...

ومتزعليش بجد ... مع انو معاكي حق ... بس بجد ربنا العالم ازاي حصلو كدا يمكن مش بقصدها بجد

وروقي :)

E73 on 5 مارس 2013 في 12:29 ص يقول...

نفس رأيك يا زوزو كنت هرد به عالباشا بس اهو قدرًا

فعلا رده خلاني أفكر بطريقة تانية

وعملتلها ايه فالكتاب ^_^

أمري لله.. هقول إيه قدر الله وما شاء فعل

روقت أهو :)

زينب علي حبيب on 5 مارس 2013 في 11:17 م يقول...

رجعتلها ياه وانا متأكدة انها مش هتسلفني كتاب اياً كان تاني هههههههه ... كنت عايزة اشتريلها جديد وكنت رافضة اني ارجعو بس بحكم انا خروجاتي قليلة وكدا وكمان ماما قلتلي رجعيه محصلش حاجة ومفيش داعي تشتري ...

واهو لساتني كل مبفتكر دا بنزعج ... :(

E73 on 5 مارس 2013 في 11:44 م يقول...

:( معلش يا زنوش ورد فعل البنت كان ايه؟