الأربعاء، 18 مايو 2011
بسم الله الرحمن الرحيم
السلام عليكم ورحمة الله وبركاته
السلام عليكم ورحمة الله وبركاته
أدخل في الموقف على طول بدون مقدمات وبحيادية شديدة
خرجت انا وبنات صحبات صحبتي عشان نحتفل بيوم ميلاد واحدة منهم
قررنا نجيب تورتة ونروح نحتفل بيها في أي نادي
ونظرًا للميزانية المفستكة بتاعتنا ونظرًا لغلاء الأسعار الفاحش قررنا نجيب قطع جاتو وعصائر ونروح على حديقة عامة
دخلنا حديقة شجرة الدر واللي عمري ما دخلتها في حياتي غير مرة أول ما فتحت سنة 94 والمرة التانية امبارح
دخلنا واتصورنا جنب النافورة وقررنا ندور على مكان نقعد فيه وكنا ماشيين على مجموعتين
اتنين ماشيين قدام وتلاتة وراهم
طبعا انا كنت من المجموعة اللي ورا وكانت معايا صحبتي وواحدة صاحبة صاحبة يوم الميلاد
كان فيه ولدين ماشيين ورا البنتين اللي تبعنا قدام واحنا متابعين بترقب هل هيضايقوهم ولا هيمروا مرور الكرام؟و البنت اللي معايا انا وصحبتي كانت بتستعرضلنا نوادرها مع الناس اللي بيعاكسوها وانها مرة جابت واحد من قفاه وطرحته أرضًا وانهالت عليه ضربًا بالجزمة وانها لن تتورع عن ضرب العيال دول بالجزمة لو اتهفوا في عقلهم وضايقونا
الحمد لله مروا مرور الكرام والبنات اختاروا مكان جنب ناس قاعدة
لما حصلناهم قررنا ندور على مكان تاني لأنهم كانوا قاعدين في وسط الشمس غير انهم كانوا قاعدين على السور واحنا عاوزين كراسي عشان نعرف نحتفل
طلعنا قدام شوية وعند المرسى بتاع المراكب كان فيه كنبتين خشب في ظهر بعض في الظل
قررنا نقعد عليهم وكانت صحبتي والبنت اياها بيشاوروا عقلهم يأجروا بدال في النيل وكانوا واقفين قدامنا واحنا قاعدين على كنبة وسايبين التانية على أساس انهم لسة هيقعدوا عليها
المهم قرب من ناحيتنا العيلين الخفاف اللي كانوا ماشيين ورا البنات وواحد بيقول للتاني بصوت مسموع أراهنك اننا لو قعدنا على الكنبة دي هما هيقوموا "يقصد الكنبة اللي في ضهرنا" والتاني قاله لأ مش هيقوموا المهم جم قعدوا ورانا وواحد بيقول للتاني انت تكسب الرهان يا باشا واحنا عاملين مش واخدين بالنا وبنتكلم على أساس ان يبقى عندهم دم ويقوموا
أقل من دقيقة استنيناها وهما مقاموش فالبنت اياها لفتلهم وقالتلهم يلا من هنا عشان احنا حاجزين المكان دا نقعد فيه
واحد من الولدين بيقولها تدينا كام ونقوم؟ "بيستخف دمه" فهي زعقت وقالتله هديك بالكوتشي اللي في رجلي وغور من هنا بدل ماضربك
طبعا انا كل دا ظهري للموقف كله ومش عارفة ايه اللي بيحصل انا بس سامعة الكلام ولقيت الراجل بتاع مرسى المراكب بيقول والله جدعة وبميت راجل ولقيت الولدين مشيوا وبيقولولها بس بالراحة على أعصابك ومفيناش من ضرب وهتتهوري على ايه يعني
المهم في كل الموقف المنيل دا وانا وصاحبة عيد الميلاد قاعدين مكشرين وألاقي صحبتي مسخسخة على نفسها من الضحك المكتوم دا أثناء الموقف لسة
فبعد ما الولاد مشيو ببص ورايا بقى على البنت وإذ ببص لقيتها قاعدة وبتلبس الكوتشي
مين؟ فين؟ ليه؟ انتي قلعتيه بجد؟ انتي كنتي ناوية تضربيهم بجد؟!!!!!!!!!!!!!
ما بين مؤيد ومعارض إيه رأيكم في أسلوب البنت؟
مع العلم إننا مكناش نعرف إن دا مستوى الحديقة وكنا فاكرينها حديقة عائلات طلعت حديقة كابلز
لو مؤيد مؤيد ليه؟
ولو معارض معارض ليه؟
ولو مؤيد بتحفظات فما هي تحفظاتك؟
الأحد، 15 مايو 2011
بسم الله الرحمن الرحيم
السلام عليكم ورحمة الله وبركاته
طبعًا المقال دا كان المفروض يتكتب من يوم الخميس الماض ولكن بسبب العطل اللي كان في بلوجر معرفتش انزله
نحكي الحكاية من أول اليوم
طبعًا قلتلكم من كام مقال اني اشتغلت والشغل دا في قرية خارج المنصورة
وقلتلكم ان مدة التعاقد كانت شهر ونص واني هخرج منها في النهاية أكيد بخبرة وثانيًا بـ 150 جنيه مصري فقط لا غير<< كتباها زي ما بتتكتب في الشيكات لكنها بالطبع في نظري مش مجرد مية وخمسين جنيه دي أول مرتب ليا على الإطلاق واللي كنت نادرة ندر وانا صغيرة ان أول مرتب ليا هديه لماما عشان تعمل بيه حاجة كدا بس اكتشفت حاليا انه قليل قوييييييييييييييييي بس ميضرش هديهملها برضه
المهم بقى ندخل في يوم الخميس عشان نعرف ايه اللي حصل يومها
طبعًا منمتش من اليوم اللي قبلها أصل اليوم دا يوم مش عادي مينفعش اروح متأخرة
على الساعة 6 قمت لبست وجهزت نفسي إني أروح بدري
على الساعة 7 وتلت نزلت وركبت تاكسي لحد الموقف عشان أختصر وقت
الساعة 8 إلا خمسة وصلت المدرسة
سألت إذا كان اسمي نازل في كشف المراقبة على لجان ربعة وخامسة ابتدائي لكن ولله الحمد ملقتش اسمي
طبعا مفيش أطفال بييجوا الحضانة من قبلها بأسبوعين قعدت أنا والمدرسات بتوع الروضة وأخدت منهم طريقتين مختلفتين لعمل كيك الشاي
على الساعة 9 ونص المدرسة المتثبتة اللي فينا اقترحت عليا اني ألحق أمشي عشان يوم الخميس الموظفين بيزوغوا بدري وألحق أخلص ورقي وادتلي إخلاء طرف من المدرسة كانت الموظفة الإدارية في المدرسة سيباهولها تديهولي عشان هي مش جاية
طلع ت انا بقى على 9 ونص وركبت ورحت الإدارة التعليمية ومعايا إخلاء الطرف وصور الشهادات بتاعتي كما طلبت مني الموظفة بالإدارة التعليمية في أول الموضوع
وصلت الإدارة التعليمية على الساعة 10 وطلعت وسلمت للموظفة إخلاء الطرف وهي ادتلي الملف بتاعي وشكلها مكنتش عاوزة تاخد صور الشهادات لولا اني صممت أسيبهملها شكلها رمتهم أساسًا بعد مانا مشيت
قالتلي إني كان لازم آخد من المدرسة استمارة مرتب وأطلع بيها على الإدارة تاني عشان أختمها وأمضيها من موظفة تانية وآخدها لشئون العاملين اللي عند المدرسة الزراعية عشان أسلملهم الاستمارة والممضية المختومة وآخد منهم شيك بالمبلغ وأطلع بيه على بنك القاهرة أصرف بيه المرتب بتاعي
طبعًا انا لما سمعت اللفة اللي قالتلي عليها اتصدمت وفتحت بقي وقلتلها تمليني الكلام دا عشان منساش منه حاجة
واضطررت آسفة أرجع تاااااااااني على المدرسة عشان أقولهم على الاستمارة
وصلت المدرسة الساعة 10 ونص وعرفت ان المدير استغرب اني مشيت بدري _مع إني قيلاله إني همشي بدري عشان ألحق موظفي الإدارة_ وكان منزل اسمي في المراقبة للجنة المادة التانية
رحت قلتله في الإدارة التعليمية قالولي كذا كذا
قالي وانتي مقلتيش ليه انك مدرسة بالحصة داحنا عملنا لمدرسات الحصة بتوع الابتدائي الاستمارة دي بقالنا اسبوعين
طبعًا مش عاوزة أقولكم شعوري كان إيه هو مين اللي هيعرف مين بالظبط؟! بس مش قضيتنا ونده على الموظف اللي بيعمل الاستمارات دي عشان يعملي واحدة
طبعا الموظف أفحمني ان الاستمارات الفاضية اللي عنده خلصانة واني المفروض أروح أي مكتبة أدور على استمارة50 هي اسمها كدا وقالي انها موجودة في المكتبة اللي مواجهة للمدرسة
وطلب مني جدول الحصص قلتله رياض أطفال مش بالحصص دي بالفترات يعني ملناش جدول طبعًا هو صمم إن عشان يعملي استمارة مرتب اني يبقى معايا جدول حصص فمدير المدرسة قرر ينادي على المدرسات بتوع الروضة اللي كان المفروض انهم هيروحوا وطلب منهم انهم يكتبولي جدول وكان ردهم زي ردي فرد عليهم وقالهم خلاص قسموا الفترات على شكل حصص مع الأخذ في الاعتبار ان الحصة مدتها 45 دقيقة
طبعا المدرسات قرروا يقعدوا يملولي الجدول على ما انا اروح اجيب الاستمارة
طلعت من المدرسة لقيت المكتبة اللي قدامها قافلة سألت أطفال الشارع عن مكتبة تانية ولقتها هي كمان قافلة ولقيت بنوتة شكلها ليها في الدراسة وسألتها على مكتبة تكون فاتحة وصفتلي الطريق ورحتها
سألت اللي واقف لو سمحت عندك استمارة50؟! فتح بقه وقالي استمارة50؟!!! بتاعت ايه دي؟ قلتله بتاعت المرتب قالي والله مش عارف ثواني أناديلك صاحب المكتبة أكيد هو عارف
وطلع يصحي صاحب المكتبة "الميزة في البلد دي إن كل واحد ساكن قريب من محل عمله يعني سهل قوي تجيبه من قفاه" وقعد ييجي ربع ساعة يصحي في صاحب المكتبة وانا لما حسيته اتأخر وزامان الناس بيشدوا شعرهم مني في المدرسة اتصلت بمدرسة منهم ووصفتلها الوضع وهي قالتلي لأ ارجعي تاني على المدرسة
بعد ما قفلت معاها لقيت صاحب المكتبة وصل وسألته عالاستمارة وقالي لأ معنديش استمارات
رجعت المدرسة ولقتهم واقفنلي زي ماكون كنت تايهة وبيدوروا عليا وسألوني انتي كنتي فين وقلتلهم قالولي ما المكتبة اللي على أول الشارع فاتحة قلتلهم انا لقتها قافلة قالولي ان مدرسة منهم لسة جاية منها دلوقتي وقرروا انهم يطلعوا معايا يودوني المكتبة وبالمرة بعد ما يخلصوا معايا شراء الاستمارة يروحوا
لقيت ان المكتبة اللي بيقولوا عليها كانت جنب المكتبة اللي انا شفتها قافلة بس المكتبة دي صاحبها حاطت قدامها كراتين شيبسي وسلع استفزازية عشان كدا انا مأخدتش بالي انها مكتبة وصورنا الحاجات اللي كان المفروض تتصور وسألنا البنت اللي واقفة عن استمارة50 قالتلنا لأ مفيش فأنا سألتها مفيش ولا متعرفيش قالتلي لأ معرفش فالمدرسة اللي معايا قالتلي ما تقريبا الورق اللي معاكي هي دي استمارة خمسين فقررت اكتفي بإني أصورها كذا نسخة وارجع انا المدرسة بعد ما ودعت المدرستين
رجعت بقى للموظف اللي في المدرسة وادتله الورق اللي صورته فبص فيه كدا وبصلي أمال فين استمارة50؟! طبعًا أنا كنت هشد فشعري وسألته بكل سذاجة هي مش دي استمارة50؟! قالي لأ وطلب مني اني أروح أشوف مكتبة تانية بتبيع الاستمارة دي
قررت اني اطلع على المكتبة اللي فيها البنت وطلبت منها تناديلي صاحب المكتبة عشان اعرف اتكلم معاه قالتلي المكتبة ملهاش صاحب طبعا انا تنحت ازاي يعني المكتبة ملهاش صاحب المهم كنت انا في قمة خنقتي فمحاولتش اتناقش معاها كتير لأن اللي فهمته كدا انها مش هتقوم وتسيب المكتبة لوحدها فسألتها على صاحب المكتبة اللي في وش المدرسة صاحبها ساكن قريب قالتلي اه
رحت لبتاع الطعمية اللي فاتح جنب المكتبة اللي في وش المدرسة وقلتله الله يخليك ممكن تناديلي صاحب المكتبة دي عشان عاوزة من عنده استمارة مش موجودة في المكتبات التانية فرد عليا وقالي اصل هو كان فاتح ولسة قافل قلتله مانا عارفة بس لو ينفع تناديهولي بس يجبلي الاستمارة دي ويقفل تاني قالي أصله عنده عزاء عشان كدا قافل فواحد كان واقف بيشتري طعمية قالي ان فيه مكتبة في وسط البلد بتبيع استمارات برضه ووصفلي الطريق وقالي أروح اسأل عند مكتب البريد عن المكتبة هيدلوني عليها سألته على اسمها قالي ملهاش اسم
أخدت بعضي ورحت مطرح ما وصفلي وسألت هناك ووصفولي في شوارع جانبية مكان المكتبة واكتشفت انها مطبعة مش مكتبة
سألت الراجل لو سمحت فيه عند حضرتك استمارة50؟ قالي لأ والله متلاقيش قلتله انا من الساعة 10 وانا بدور على الاستمارة دي ومش لاقية أي حد بيبيعها والمكتبة اللي في وش المدرسة هي بس اللي بتبيعها "مع العلم ان الساعة بقت 12 ونص" الراجل أشفق لحالي وقالي بصي يا بنتي انا أصلا ببيع الاستمارة دي بس هي خلصانة من عندي استني أدورلك على واحدة مرمية هنا ولا هنا وأصورهالك
وبالفعل لقى استمارة طالعة من بق الكلب "اكسبرشن بيدل على مدى تلف الاستمارة اللي لقاها" وبالفعل صورهالي كذا نسخة ورجعت انا بقى بانتصاري للمدرسة
ويال صدمتي لما وصلت المدرسة ولقيت المكتبة اللي كانت قافلة من أول اليوم جت دلوقتي بس وفتحت بس ما علينا دخلت للموظف وادتله الاستمارات
هو بيبص بقى للأوراق اللي انا جبتها وراح باصصلي وقالي انا محتاج كذا نسخة بالكربون لإقرار العمل وإخلاء الطرف عاوز 3 نسخ من كل واحد
طبعًا انا عارفة إن الموظفة الإدارية بتاعت الحضانة مجتش أصلا وعارفة إن المدرسات مشيو وعارفة إن الدادة روحت وكذلك مدير المدرسة والراجل مصمم إنه يفضل معايا لآخر الخط ويخلصلي الورق دا يومها لأن يوم السبت اللي هو امبارح المدرسة بتتسلم لإدارة تانية عشان امتحانات الشهادات زي ستة ابتدائي وهكذا ومش هيرجعوا إلا بعد أسبوعين
قررت أتصل بالدادة وأقولها تعدي على الموظفة الإدارية تجيبها وتيجي عشان يجيبوا الملفات اللي في المكتب بتاعهم عشان أخلص الورق
شوية والدادة جتلي ومعاها مفتاح المكتب
رحنا وقلبنا المكتب كلها عشان نلاقي الدفاتر المطلوبة فين وفين لحد ما لقيناها ورجعنا بيها للموظف كتب النسخ اللي هو محتاجها ووداها لراجل تاني مضاها وختمها ورجعتله تاني علشان يظبط معايا عدد الحصص اللي انا حضرتها وطلب مني دفتر الحضور والانصراف بتاعي عشان يعمل على أساسه استمارة الحضور والغياب ورحت انا والدادة تاني لمبنى الروضة وقلبنا الدنيا لحد ما لقينا الدفتر ورجعناله المهم حسب عدد الحصص وجه عالأسبوع الأخير وكتب فيه امتحانات قلتله رياض أطفال مفيهاش امتحانات قالي بس المدرسة كانت فيها امتحانات قلتله بس المفروض ان رياض الأطفال مستقلة بذاتها عن المدرسة المهم كلمة منه وكلمة مني انا قلتله انا هتصل بالموجهة بتاعت رياض الأطفال أسألها المفروض أكتب إيه في الأسبوع الأخير دا
وبالفعل اتصلت بيها وقالتلي اليوم اللي انتي مضيتي فيه حضور ومحضراه في كشكول التحضير بتاعك احسبيه بعدد الساعات لأن رياض الأطفال مفيهاش امتحانات
وبالفعل قد كان وخلصنا الورق ودبسنا كل شهر بأوراقه لوحده آخر 3 أيام من شهر مارس لوحدهم وشهر أبريل لوحده وأول 12 يوم من شهر مايو لوحدهم مدبس مع كل شهر نسخة إقرار عمل ونسخة إخلاء طرف وصورة البطاقة واستمارة50
وكانت الساعة 2 إلا ربع قلتله المفروض انا بقى آخد الأوراق دي عشان أختمها وأمضيها من الإدارة التعليمية وأطلع بيها على شئون العاملين عند المدرسة الزراعية قالي لأ احنا اللي المفروض هنوديهم قلتله متأكد؟ الموظفة اللي في الإدارة التعليمية قالتلي انا اللي المفروض ألف اللفة دي
المهم قالي هي بتوضحلك خط سير الأوراق بس
قلتله طيب المفروض أروح أستلم الشيك من شئون العاملين إمتى؟ قالي كمان 15 يوم
ما علينا المهم إن اليوم خلص بحلوه ومره بس بجد رجعت البيت مش شايفة قدامي ريقي ناشف جدًا دايخة ومش قادرة أمشي صوتي رايح واترميت على الكنبة مصحتش إلا بعد العشاء >_<
وكل سنة وانتم بخير
الأحد، 1 مايو 2011
بسم الله الرحمن الرحيم
السلام عليكم ورحمة الله وبركاته
حاجات مبعملهاش ومبحبش اعملها وربنا ما يجعلني اعملها
اتقالي انك قلتي عليا كذا كذ>> دا محصلش.. كان لازم تعرفي حاجة واحدة بس لو كنت عمري اتكلمت معاكي على حد يبقى معنى كدا اني اتكلمت مع حد عليكي.. مكنش المفروض تصدقي اني قلت حاجة زي كدا لأني مبحبش الغيبة والنميمة والطبيعي ان اللي يحكيلك يحكي عنك ولو انا طبعي الغيبة والنميمة أكيد مكنتش هقدر امسك لساني معاكِ مخصوص
انتي قلتيلي ان حصل كذا وكذا وكذا>>انا مش هقول حاجة على انها حصلت وهي محصلتش لأني مبحبش الكذب أكيد حد تاني اللي قالك أو انتي اللي فهمتي الكلام غلط هستفيد ايه لما أقول حاجة محصلتش؟
انتي مبتجيش ليه مببتصليش ليه؟>>الأجدر بكي تسألي نفسك السؤال دا مش تسأليني أنا ولا هو خدوهم بالصوت لا يغلبوكم!
هو ليه الانسان مبيوزنش الكلام في دماغه قبل ما يحدفه زي الطوب في وش اللي قدامه؟!
بسم الله الرحمن الرحيم
السلام عليكم ورحمة الله وبركاته
بين لحظة ولحظة تتغير أشياء
تموت أشياء وأخر تحيى
ولكن يا لها من لحظات
عندما لا تستطيع التفريق
أهذا التغيير بسبب أو بآخر
لحظات تفصل بين الحياة والاحياة
هل نفكر دوما في كيفية فهم الآخر لهذه اللحظات؟
هل يهمنا أن يدرك غيرنا سبب لحظاتنا؟
ولكنها لحظات وإن مر الزمن
فستبقى لحظات
فما هو إلا
مجرد وقت
كتبتها بتاريخ 10/12/2008
الأربعاء، 27 أبريل 2011
بسم الله الرحمن الرحيم
السلام عليكم ورحمة الله وبركاته
اللي عودتني أكتب البسملة والسلام في أول كل بوست أو كمنت كانت سهام ربنا يهديلها العاصي ويسعدها يارب.
**
هانت مبقاش فيه أطفال بتحضر في الحضانة وبكدة الضغط النفسي هيقل شوية.
**
مرتين أو تلاتة حسيت إني ممكن لو فضلت في الوسط بتاع الأطفال دا ممكن أتعدى كل الحدود والقيود وألاقي نفسي نازلة بإيدي بترف على خد عيل من العيال دول بجد مش عارفة أقول إيه في أهاليهم غير حسبي الله ونعم الوكيل، الناس دي مبتفكرش إن ربنا هيحاسبها على عيالها؟!، يا رب هونها عليا وابعد عني كل سوء يا رب.
**
حالة مرضية غير طبيعية يمكن تكون لها مرجعية نفسية لأنها وللأسف منفعش معاها لا أدوية ولا حقن. بجد حقيقي مستغرباني.
**
مكنتش أعرف إنك بسكوتة قوي كدا.. هي قالتهالي بقالها كام سنة وحاليًا أنا بقولها لنفسي.
**
إنتي عاوزة إيه بالظبط؟ مترسيلك على بر؛ بجد خنقتيني أووووووووووووف.
**
مركز الهلاك.. قصدي الرحمة.. آكل حتة من النحيادي لألألأ دا من النحيادي.. جتكم البتاع قرفتوني تلت أسابيع عشان تعدلو الاسم وفي الآخر التعديل غلط!!!!!!!!!!!!!!!!!!!
**
بطلي تعاتبي نفسك على حاجات محدش واخد باله منها غيرك.
**
وهيحصل إيه؟ لو اللي فات ترميه.. واللي عرفتيه تنسيه.. مش دا اللي أنا عايشة فيه؟! إيه الجديد يعني؟
**
أحيانًا بفكر أنا لو مكنتش أنا مكنتش صاحبتني.
**
ساعات لحظات الألم بتسبلنا ذكريات حلوة :).
**
أول مرة آخد بالي إني بفلتر المدونة بصورة دورية بحيث إني ملقتش فيها غير مسودة واحدة بس...
إشتغالة
*____*
*___*___*
*_____*
*__*
*
**
أول مرة آخد بالي إني بفلتر المدونة بصورة دورية بحيث إني ملقتش فيها غير مسودة واحدة بس...
إشتغالة
*____*
*___*___*
*_____*
*__*
*
الخميس، 7 أبريل 2011
بسم الله الرحمن الرحيم
السلام عليكم ورحمة الله وبركاته
عارفة.. المقال دا اتأخر شويتين
هو كان المفروض يتكتب تاني يوم ما كتبت المقال اللي فات على طول
واللي حصل إني سبحان الله كنت لسة في المقال اللي فات مخنوقة عشان مش عارفة أشتغل ولو جالي شغل بيبقى بعيد والمرتب قليل هضطر أصرف فوقه عشان المواصلات بس
وسبحان الله صحيت تاني يوم الصبح والبشاير جتلي إن الإدارة التعليمية اتصلت بيا عشان أروح أستلم جواب التعيين وإني اتعينت في قرية اسمها ميت الكرماء
طبعًا مكنش فيه مجال للنقاش، أنزل أستلم الجواب الأول وبعد كدا أبقى أفكر في أي تفاصيل؛ أنا مصدقت إني لقيت فرصة عمل. آي نعم هي لمدة شهر ونص بس يعني فترة مؤقتة بس على الأقل هتديلي الخبرة اللي المدارس الخاصة بتتطلبها دا كان تفكيري وقتها.
كنت خايفة جدًا وحقيقي كنت قلقانة وحاسة إني تحت ضغط؛ لما عرفت إن التكليف جالي في بلد بعيد عن المكان اللي أنا ساكنة فيه على الرغم من إن فيه مدرسة لسة مبنية قدام البيت بتاعنا ولما سألتهم هي فيها رياض أطفال قالولي اه قلتلهم طيب ممكن أنقل عليها بدل البلد البعيد دي؟ قالولي ثبتي رجلك فأي مكان وبعد كدا اطلبي نقلك
رحت أول يوم عشان أسلم جواب التعيين المدرسة وآخد منهم إقرار بأنهم استلموا الجواب وأرجع بالإقرار على الإدارة التعليمية
طبعًا أخدت أخويا معايا لأني كانت أول مرة أروح البلد دي ومعرفش الطريق عامل إزاي ولا إيه الظروف
المهم رحت وأول ما وصلت من أول المدير لحد العاملة والموظفين والمدرسات مبسوطين قوي وبيقولوا الأبلة الجديدة جت الأبلة الجديدة جت
وكلهم مقابلني بترحاب كبير قوي ارتحتله شوية وأخدت الإقرار ورجعت الإدارة التعليمية عشان أسلمه هو وأصول الشهادات بتاعتي
ولما وصلت الإدارة التعليمية في المدرسة وصوني أسألهم هل هيتم تثبيتي بعد فترة التدريب دي ولا هي فترة مؤقتة بس؟ المهم سألتهم قالولي لأ مش هيتم التثبيت إلا إذا كان فيه عجز في المعلمات في المدرسة. فواحدة واقفة برضه وصلها جواب تعيين بتسأل الموظفة طيب هما هيدولنا شهادة خبرة؟ فالموظفة ردت بطريقة تلقائية جدًا وكأن إجابتها حاجة عادية ومفيهاش مشاكل وقالتلها لأ مش هيدولك شهادة خبرة هيدولك جواب فصل "يعني هيفصلونا" وتجيبي إنتي بقى جواب الفصل دا وتجيلنا نحطهولك في الدوسيه بتاعك اللي عندنا وتاخدي أصول الشهادات بتاعتك وتسيبلنا منها صور، وبعد كدا لو مدرسة تانية بعتتلنا تطلب مدرسات هنتصل بيكي
طبعًا أنا تنحت.. جواب فصل؟؟!! أول القصيدة كفر؟! وفكرت طيب ودي هتبقى سُبة في تاريخ "السي في" بتاعي ولا هقول في "السي في" إيه بالظبط؟ اتفصلت بعد شهر ونص؟ المهم سرعان ما طنشت الإحساس دا من خلال نبرة صوت الموظفة اللي أوحتلي إن دا الطبيعي، عادي يعني لما آخد جواب فصل حسستني إنه حاجة كدا زي شهادة الخبرة
المهم يومها روحت البيت وأنا مكبوسة ومش عارفة أفكر وهل أروح ولا أكنسل وأستعبط ومرحش والمفروض إن الفترة دي بأجر رمزي لمدة شهر ونص وأخويا ربنا يكرمه زودلي الطينة بلة واحنا مروحين وهو بيقولي متفرحيش قوي كدا باستقبالهم الحافل بيكي بكرة يبانوا على حقيقتهم
رعبني كمان طلاب المدارس المجاورة واللي كنا راجعين في معاد خروجهم من المدارس الاعدادي والثانوي وهما عمالين يستظرفوا على زميلاتهم ويعاكسوهم بجد حسيت إني خايفة قوي من الجو الجديد دا. دا غير الحيوانات اللي قلبكم يحبها من معيز لونها أسود وجاموس وخرفان بني سارحة كدا في الشارع تقريبًا دي عندهم زي القطط والكلاب مش بتتاكل ولا إيه لأنها بتاكل من الزبالة اللي في الشارع
يومها بالليل كنت قاعدة في الأوضة حاسة بهبوط غريب وجسمي كله بيرتعش إحساس أول مرة أحسه وقررت أنام وأسيبها لربنا
وتاني يوم الصبح صحيت صليت الفجر والاستخارة هل أروح المدرسة ولا لأ ولبست ونزلت
المواصلات كانت سهلة قوي
الطريق فاضي والمسافة 10 دقايق بس
وصلت المدرسة ورحبوا بيا قوي تاني وقرروا يعفوني من التدريس اليوم الأول احتفالاً بيا وفهموني النظام إزاي وهو إني هدرس للأطفال الانجليزي وأحكيلهم قصص بس. وفترة العمل اليومية لمدة ساعتين ونص -حابة أقعد وأكمل اليوم معاهم أنا حرة عاوزة أمشي برضه ليا الحرية في كد-ا والمفروض إني هدرس للأربع فصول بمعدل كل يوم فصلين ساعة وربع في كل فصل يعني بتنقل بين الفصول مليش فصل خاص بيا
المهم عدى اليوم الأول والمدرسات صمموا إني لازم طالما هشتغل معاهم يبقى لازم نفطر مع بعض "خاصة لما عرفوا إني مليش في الأكل ومش بهتم إني أفطر أصلا" والمُدرسة الأولى اللي فيهم قالتلي إنها هتخبزلي عيش مخصوص لليوم اللي بعده ولازم أبدأ أظبط عاداتي الغذائية عشان صحتي تبقى كويسة لأن شغلي مع الأطفال مرهق جدًا غير كدا إنهم شايفين اني "ضعيفة وخاسة" ولازم هما يتخنوني وهيسعوا بكل الطرق للوصول للهدف دا حتى وأنا رافضة إني أتخن أصلا وبروح جيم عشان أحافظ على لياقتي وفنفس الوقت متخنش
والدادة اللي مش بنتعامل معاها على إنها دادة لكن بنتعامل معاها على إنها مدرسة مساعدة وهي سنها مقارب لينا وحبوبة قوي ومتفهمة
وجه تاني يوم وقررت إني أعمل زي اليوم الأول والتزم بالعادات الغذائية السليمة وهي إني آخد معايا الحضانة فاكهة مقطعاها في علبة عشان آكلها هناك ودا طبعًا اللي خلاهم يضحكوا عليا أول يوم ويصمموا إنهم هيأكلوني سندوتشات طعمية
تاني يوم دا بقى فيه مُدرسة من الأربعة كانت غايبة وعليه اضطريت إني أمسك الفصل بتاعها طول اليوم وإني مش هعمل الجدول اللي كان المفروض أعمله وهو إني أدرس الانجليزي بس لفصلين
واليوم دا تحديدًا جه رئيس قسم التوجيه من الإدارة التعليمية. شخص ظريف برضه وقعد يحكي معايا شوية ويسألني عن رأيي في المدرسة والحياة العملية وهل هي أحسن ولا القعدة في البيت وهكذا وبعد ما اليوم خلص كان فيه حاجة تانية مضيقاني غير أول يوم وهي إن المُدرّسة لما خبزتلي عيش وجابلتي سندوتشات في الفصل أنا كنت منهمكة في الشغل مع الأطفال ونسيت آكل السندوتشات ومش دي المشكلة لكن المشكلة إني نسيت أصلا آخد السندوتشات وأنا مروّحة، نسيتها على المكتب. وأنا بسلم على المُدرّسة وماشية حسيتها مقفولة شوية بس أنا كنت مستعجلة ومشيت ومفتكرتش إني نسيت السندوتشات غير وأنا في السنتر اللي باخد فيه كورس تنمية بشرية وحسيت إن تصرفي الأحمق دا هيرسخ جواهم الإحساس بأني متكبرة أو بتعالى عليهم أو أي شيء. والحاجة التانية اللي كانت مضيقاني إن اليوم دا كان يوم خميس يعني الجمعة والسبت أجازة ومش هعرف أعتذر للمدرسة عن إهمالي دا وخاصة إنها اهتمت وتعبت نفسها وعملتهملي مخصوص
عدى الجمعة والسبت ورحتلهم الأحد وأول حاجة عملتها طبعًا إني رحت للمدرسة اعتذرتلها جدًا ووضحتلها إني يومها مكنتش ملاحقة على حاجة وخاصة إنها أول مرة ليا إني أمسك فصل لوحدي والمعروف عن رياض الأطفال إن بيشتغل في الفصل الواحد مدرستين ومساعدة يعني تلاتة بيبقوا في الفصل مش واحدة المهم هي قبلت الاعتذار ووعدتني إنها هتجبلي تاني يوم بدلهم وطبعًا مسابتنيش غير لما فطرت معاها. فطرت يومها 3 سندوتشان طعمية ومش عاوزة أقولكم كملت اليوم ازاي ولا بطني عملت فيا إيه بقيت اليوم
فضلت طول اليوم دا بعد ما روحت البيت حاسة إني لسة بهضم في سندوتشات الطعمية ومعرفتش أتغدى وتاني يوم كالعادة نزلت من غير فطار ورحتلهم قلتلهم الله يكرمكم تخفوا عليا لأن معدتي صغيرة ومش متعودة إني باكل كتير وإني طول اليوم إمبارح كنت بهضم في الفطار وطبعًا مسلمتش من التريقة بقى وكل واحدة بتحكي عن نوادرها مع الأكل وفضلوا ورايا عاوزني أعودهم على إنهم يكلوا قليل عشان عاوزين يعملوا رجيم واللي ضحكهم أكتر اني مبشربش أي منبهات زي الشاي أو القهوة أو الكاكاو ولا الشيكولاتة ولا مشتقات القهوة ولما بشرب حاجة سخنة لازم محطش فيها ولا معلقة سكر وبستناها لما تبقى دافية لأني مبحبش أشربها سخنة بقيت حاسة وسطهم إني جاية من الفضاء وبالفعل الدادة فضلت متابعة معايا وكل يوم تيجي تفرحني انها قللت السكر اللي بتحطه على المشروبات وكترت من الخضروات والفاكهة وقللت من العيش والرز والمكرونة
اليوم اللي بعده رحتلهم وكان معايا كيكة طبعًا قالولي مش إنتي ملكيش في السكريات؟ قلتلهم دوقوها الأول واحكموا وكان سكرها قليل بس عجبتهم قوي طبعا مش أنا اللي كنت عملاها أنا شرياها من عند خباز حاجته حلوة قوي وعنده ضمير "تصوروا الباتيه اللي بالجبنة عنده بيبقى فيه جبنة :D " المهم عجبتهم قوي والدادة قالتلي إنها هتبقى تقلل السكر في الكيكة اللي بتعملها
إمبارح بقى التغيير ولأول مرة جه من ناحيتي وهو إني لما صحيت الفجر من النوم حسيت إني جعانة قوي ودخلت عملت لنفسي طبق غدا على الفجر ورحتلهم المدرسة بيعزموا عليا بفطار قلتلهم لأ النهاردة ادولي أجازة دانا متغدية قبل مانزل طبعًا اتصدموا بيقولولي إيه دا؟ احنا مكنش قصدنا توصلي للدرجادي إحنا كان غرضنا تفطري بس مش توصل لدرجة تتغدي قبل ما تنزلي
والنهاردة كان فيه مُدرّسة تانية غايبة وأخدت الفصل بتاعها وحكيتلهم قصص وغنيت معاهم أغاني
طبعًا كل اللي فات دا متطرقتش للأطفال واللي حسيت إني مبسوطة قوي وسطهم وبالمناسبة جيل المستقبل في الحضانة بيكتبوا عربي وانجليزي وبيجمعوا في الحساب بالإضافة وبيطرحوا بالاستلاف وبيرتبوا الأرقام تصاعدي وتنازلي اللي كنت باخدها في خمسة ابتدائي وكانت معقداني وعمري ما كنت بعرف أعملها
ما شاء الله يا ولاد العلم بيتطور
وبيبقوا مبسوطين قوي وأنا بدرسلهم الانجليزي كله بالأغاني وكل مادخل الفصل يقولوا ميس إيناس جت ميس إيناس جت ويفضلوا يطلبوا مني أراجع معاهم على الأغنية بتاعت اليوم اللي قبله قبل ما ناخد الأغنية الجديدة
حقيقي الحمد لله مبسوطة قوي
وطبعًا منستش أصلي شكر لربنا زي ما أحمد راضي فكرني
ربنا يكملي على خير ويقدملي الخير ويجعل أفعالي كلها خير
بالمناسبة خلاص بقى مبقاش ينفع أخلي اسم المقال يوميات مدرسة فالأرياف علشان البلد دي بجد قدرها بقى عالي عندي حبيتهم وخلاص مبقتش فكرتي عن العمل عندهم إني باخد خبرة عشان أقدم بيها في حضانة خاصة لأ دانا بقيت عاوزة أشتغل معاهم هم السنة الجاية وأفضل معاهم
وبالمناسبة برضه اتضحلي إن الأطفال بييجوا المدرسة باليونيفورم مش بالبيجامة زي ما كنت متخيلة :D
الاثنين، 28 مارس 2011
بسم الله الرحمن الرحيم
السلام عليكم ورحمة الله وبركاته
بين كل فترة وفترة من حياتنا بنمر بحياة جديدة
تجارب جديدة
مواقف جديدة
بنحس فيها باختلاف وحماس وصفات جديدة علينا في شخصيتنا
أحيانًا فعلا بستغرب نفسي من قمة الفراغ والملل لقمة الإنشغال والضغط
في الوقت الحالي مغروزة في خمس كورسات ما بين انجليزي وتنمية بشرية وكمبيوتر ولغة اشارة وما إلى ذلك الواحد مبيلاقيش وقت يتنفس
أنا عاوزة أغسل الجيبة السودة ومعنديش وقت :D بس نعمل ايه من الانشغال الواحد بيستمد أهميته في الحياة وبيقتنص سعادته وبيخلق ذكراياته
وأدينا عايشين وبنعيشها يا رب قدرني إني أشتغل في مكان كويس وأفيد مصر بطريقة كويسة وأقبض مرتب كويس وابن ناس
150 جنيه لمدرسة أطفال حراااااااااااااااام دا اللي بيشحت في الشارع بيلم أكتر منهم عااااااااا
الاشتراك في:
الرسائل (Atom)
