الأربعاء، 18 يوليو 2012
بسم الله الرحمن الرحيم
السلام عليكم ورحمة الله وبركاته
انا بحبني
وبحب حاجة معرفش هي ايه
وبحب حد معرفش هو مين
وحابة حالتي اللي مش عارفة هي عبارة عن ايه
مبسوطة قوي وحاسة ان ربنا هيفرجها عليا قريب
وأحب أقول لفارس المستقبل "حلمت بك من كام يوم على فكرة وكنت فرحانة قوي"
انا مش هحكي الحلم لأني مش فاكراه كله بس هوصف شعوري اللي كان فيه واللي حاسة ان قلبي لسة حاسس به الى الآن
انا كنت مروحة من الشغل وكنت متضايقة "كطبيعة مرواحي من الشغل يعني ودا العادي" انا رايحة وانت جاي
مش فاكرة مين اللي كانت جنبي ومش واخدة بالي من اللي كان جنبك
المهم اني حسيت اني اتخطفت من جوايا لما عديت جنبي ومعرفش منين عرفت ان جالك نفس الشعور
بصتلك ولفيت وانا ماشية وكذلك انت
رجعت بصيت قدامي ومشيت و"كابرت" لأن بطبيعة "كوني جوهرة"؛ الكبرياء لازم يغلفها حاولت انت تقرب انا مشيت
مشيت وانا نفسي تيجي ورايا
وقلبي كان هيقف لما اكتشفت انك فعلا مكدبتش خبر ورحت اتقدمت لوالدي
يا نهار ابيض شعور غريب بجد والاغرب اني متخيلتش انه يبقى واقعي قوي كدا في حلم
وفي النهاية كان مجرد حلم
وأديني حتى معرفش شكل فارس المستقبل ايه
هو يا انت كنت بشكل زمان ودلوقتي اختلفت يا انا بقى اللي احلامي مش مركزة
حلمت بك من ييجي اربع سنين كنت بشكل
ومن كام يوم لقيتك طول بعرض اسمراني شوية وعندك شنب
عامة الواحد بيشوف افلام "احلام" حلوة كتير في سنيما الأحلام
وهقول لفارس المستقبل حاول تلاقيني بسرعة "بس على مهلك عشان متعملش حادث فالطريق" ^^
الاشتراك في:
تعليقات الرسالة (Atom)
6 آراءكم:
:)
مش عارفه هنفضل نكتبله لامتى
شكلهم سمعهم تقيل ولا ايه
ان شاء الله هيفرجها قريب
تقريبا في قصور في حواس كتير يا ريمى سمع بصر الخ الخ
ربنا يشفيهم قريبًا ان شاء الله
يا رب اللهم آمين
ربنا يكرمك ياااارب ويفرح قلبك يارب ...وتلاقي احلي من ايلي حلمتي بيه كمان
اللهم آمين يا ميرو نحن واياكم يا رب
يا احلامك يا اينو ربنا يحققلك كل احلامك حتي اللي لسه محلمتيش بيها كمان قولي امين
:)
نحن واياكم يا رنرن اللهم آمين
كل سنة وانتي طيبة يا كميل
إرسال تعليق