الأحد، 15 أبريل 2012
بسم الله الرحمن الرحيم
السلام عليكم ورحمة الله وبركاته
قصور ذاتي هو اللي انا فيه؟! ولا عدم القدرة على حسم القرار!!
مكنتش ناوية أبدًا أكمل في شغل الحكومة ولا في مهنة التدريس في المدارس من الأساس والنهاردة وبمجرد ما اتصلت بيا موظفة من الادارة وقالتلي اني اجيب اوراقي عشان بدل ما انا متعينة بالحصة هيخلوني بالتعاقد السنوي لقتني قمت وصليت استخارة ولبست ورحتلها وكملت ورقي زي ماكون منومة مغناطيسيًا مع اني عارفة اني مش طايقة ولا قادرة استحمل حتى انتهاء التعاقد اللي بالحصة بتاعي واللي كان المفروض يخصل في آخر شهر ابريل
هل المشكلة كانت في البلد اللي بشتغل فيها ولا المشكلة في العمل الحكومي ولا المشكلة في المناهج نفسها ولا المشكلة فيا ولا المشكلة في ايه معرفش وكل ما آخد رأي حد يقولي انتي في نعمة غيرك بيحسدوكي عليها ومترفصيش النعمة اللي انتي فيها وألاقيني ماشية بقوة الدفع او القصور الذاتي وجوايا مليون حاجة بتقولي لأ كفاية وفنفس الوقت ألف حاجة تقولي هي دي رسالتك في الحياة والدنيا دي مش مكان للراحة أساسًا ومفيش شغلانة هتبقي مبسوطة فيها 100%
حقيقي تعبانة ومش عارفة المفروض اقرر ايه
الدبلومة اللي اهملتها لما اقنعت نفسي اني مش هكمل في مجال التدريس اصبحت الان مهمة لمجالي بما اني مضيت على التعاقد
المنحة اللي كنت ناوية اتفرغلها وحطيت عليها آمال عريضة أصبحت هي الآن العائق والمشتت لطريقي وأنا مبقتش عارفة اعمل ايه
انا كان نفسي اشيل ايدي من كل حاجة وأهيم على وجهي مطرح ما أحب أسافر وقت ما أحب أزور أقاربي
شخصية تكره القيود وأشعر أن العمل الحكومي ما هو هي ساقية وأنا الثور اللي مربوط فيها ولازم لا أبص يمين ولا شمال عشان اركز في اللي بعمله
ومع كل دا الاقي آلام القولون العصبي بتتصارع بداخل لتعلن هي الأخرى رأيها في الوضع الراهن
أفكر أحيانًا.. وما الذي يجبرني على كل هذا السعي والبهدلة وأنا في النهاية أنثى لابد ممن يتحمل مسئوليتي
وأفيق أحيانًا.. ليست الحياة دائمًا وردية كما هي والله أعلم بالغيب وعصفور في اليد خير من ألف على الشجرة وأن العمل عبادة ولهذا خلقنا فإذا لم أرد العمل فلأذهب إلى قبري
وفي النهاية أفكر
لماذا أفعل ذلك بنفسي؟!
ولا أنسى قول
الحمد لله عالم الغيب والشهادة
الاشتراك في:
تعليقات الرسالة (Atom)
4 آراءكم:
بصي .. وعن تجربة .. الحكومة مقبرة .. عمرك هايتسرق من غير ما تستفيدي حاجة لا مادياً ولا علمياً ولا مهنياً ولو عندك حلم أو طموح معين يبقى تنسيه من دلوقتي أحسن والأسوأ إنك هاتحبطي نفسياً عشان تعرفي تتعاملي فيها وتستمري - وانتي في الأساس رافضاها - وواحدة واحدة هاتلاقي نفسك بقيتي شبه الناس الأغبياء غريبي الأطوار ، المتخلفين اللي اسمهم موظفين الحكومة بالظبط ! .. وهاتبقي عامله زي اللي رقصوا ع السلالم .. ما بين إنك هاتستخسري عمرك اللي قضتيه فيها وما بين إنك مش هاتعرفي بسهولة تغيري مجالك أو تشتغلي في نفس المجال في قطاع خاص لأنك هاتكوني اتعودتي على شغل الحكومة ومش هاتقدري تنافسي على وظيفة في القطاع الخاص لأن متطلباتها بتكون دايماً أكتر من الحكومة !
لعنــة ؟
مش بالظبط .. هي ممكن تناسب بعض البنات (وخاصة في ظروف البلد الفترة دي) .. مواعيدها ثابتة وقرشها (وإن كان قليل) ثابت وما فيهاش تحكمات زي القطاع الخاص وأهي فترة لحد البنت من دول ما ربنا يعدلها لها وتتجوز .. وبعد الجواز لو حبت تستمر فمش هايبقى فيه أحسن ليها من الحكومة لأن كلهم فيها عيلة واحدة مع بعضيهم :)
ده مجرد رأيي الشخصي ووجهة نظري في العمل الحكومي وبالطبع قد يكون خطأ يحتمل الصواب كما أظه صواب يحتمل الخطأ .
ربنا ييسر لك اللي فيه الخير إن شاء الله تقبلي مروري وخالص تحياتي وتقديري
أستاذ شريف بجد شرفتني
بس في نفس الوقت سبتني في حيرة هل استمر فيها باعتبار اني بنت وفي يوم من الايام هسيبها ولا سيبها لأنها هتقتل طموحاتي ومحدش ضامن النصيب فلازم آخد طريق طموحي الحقيقي واسبني من الجذور العفنة؟
المشكلة في نفس الوقت داخل من ضمن المُحيّرات حاجة تانية
ان في مجال التربية والتعليم الحكومة لا تعترف بمدرسين المدارس الخاصة بمعنى لا بتنزلهم منح ولا دورات تدريبية ولا اعارات ولا لهم أي ميزة بالنسبة للمجال التأهيلي والتنموي للمعلم "آي نعم المدرسين بيروحوا الدورات دي بس عشان مرتبهم يزيد او المكافأة اللي بتتاخد في نهاية كل كورس" لكن بالمقارنة بالقطاع الخاص اللي لا توجه لهم أي نوع من أنواع التأهيل أو التدريب ويجب ان كل واحد فيهم يعتمد على نفسه في نقطة البحث والدعم فمش عارفة بجد انهو أفضل
في الوقت اللي جتلي فيه وظيفة معلمة بالحصة اتصل بيا واحدة من أفضل المدارس الخاصة في محافظتي واللي معروف انها بتاخد الناس بالواسطة ليس أكثر وأنا كنت عملت فيها اختبار تقديم من قبل
بعد ما الادارة اتصلت بيا لقيت المدرسة دي اتصلوا بيا وقالولي انتي اتقبلتي تعالي استلمي الوظيفة قلتلهم أنا آسفة لأني اشتغلت في الحكومة
طبعا كتير من اللي اعرفهم لاموني على ردي المحبط وان دي فرصة متتعوضش
وتم اختيار زميلتي لتكون هي مكاني في هذه الوظيفة وما هي الا بضع شهور ومعظمها كان بدون راتب قالولها استغنينا عن خدماتك
ففكرت انا وقتها مانا لو كنت مكانها وقبلت الوظيفة دي كان زماني حاليا قاعدة على الرصيف فمبقتش عارفة استقر
هل اشتري راحة بالي؟ ولا امسك عصفور من اللي بيغردوا عالشجرة؟
السلام عليكم ورحمة الله وبركاته
أولاً : ألف ألف مبروك على العقد بجد ، و دي حقيقي نعمة محدش مقدرها إلا اللي حاول يحصل عليها وماعرفش ، فاحمدي ربنا عليها وما تفرطيش فيها وحاولي تاخدي الدبلومة التربوية لو ما أخدتيهاش ، وماتتردديش في الموضوع ده وما تعمليش زي ناس بتندم دلوقت انها ماأخدتهاش وهي فاضية .
ثانياً : بالنسبة لكلام شريف باشا .. ماتسمعيش كلام الراجل ده ، ده جوزي وأنا عارفاه :D
ولا أقوللك اسمعي كلامه في آخر سطرين بس ههههههههههههههههههههههههههه
مجال الحكومة فعلا يمكن للرجالة خنقة وتأييد ، بس صدقيني للبنت أو الأنثى عموما مافيش أنسب منها ..
بتاخدي فيها خبرة من معاملتك مع الأطفال في جميع أعمارهم ؛ أنا كنت زيك الأول اشتغلت في كي جي ، وبعد كده ابتدائي , بعدين اعدادي لمدرسة أولاد وبعدين لمدرسة بنات ،، فبجد أخدت خبرة كبيرة أوي أنا بستفيد منها لغاية دلوقت ..كفاية انك بتبقي معاصرة مشاكل الجيل الناشئ اللي منهم هيكونوا أولادك ف المستقبل بإذن الله
ثالثا : مع الوقت هتحبي المهنة دي صدقيني ، وكل ما هتدّي فيها هتحبيها وهتلاقي الطلبة كمان بيحبوكي أوي وده اللي هيشجعك تكملي مسيرتك في المهنة دي :)
أنا قبل جوازي كنت بقول زيك كده إني كارهة التدريس والمهنة مرهقة ومتعبة جدا ،، أنا معاكي ..بس مع الخبرة اللي أخدتها .. صدقيني زعلانة جدا إني ما أخدتش الدبلومة ، ومش فاضية دلوقت زي الأول عشان آخدها .
رابعاً : لا لا لا لا للمدارس الخاصة بجميع مغرياتها ، لأنك قصاد اللي بيغروكي بيه سواء كان مرتب أو اسم مدرسة أو أي ميزات أخرى ، بيعمل صاحب المدرسة على مص دم المدرس اللي عنده ف المدرسة بجد ، ودي ما استحملتش فيها شهرين على بعض .
أرجو اني أكون قدرت أساعدك ، وأشيل الإحباط اللي أحبطهولك السيد زوجي .
وربنا يكتبلك اللي فيه الخير ليكي .
:)
وعليكم السلام ورحمة الله وبركاته
مبدئيًا وقبل أي رد بجد منورة المدونة يا بنت الباشا بجد بأول تعليق لكي هنا مشرفاني حقيقي ربنا ما يقطعها عادة يا رب
الله يبارك فيكي يا بنوتة انا بقول الحمد لله وفي دماغي مليون هاجس مش عارفة اهرب منهم انا خريجة تربية مليش تربوي لكن دا ميمنعش اني بعمل دبلومات دراسات عليا وشكلي هبطلها
هههههههه ربنا يخليكم لبعض يا بنوتة يا رب وعقبال متجيبولي ولاد الباشا الحضانة اللي ناوية افتحها أو سنتر التدريب مش عارفة لسة
بحس انه بيهدم مبادئي يا بنوتة حاجات كتير رفضاها ومبعرفش اقول لأ ولا اعترض
اكيد دي كانت خبرة جميلة جدا لكي واعتقد فعلا زي كلامك انها هتفدني كتيييييييييير قوي لما آجي أربي أولادي ان شاء الله "الواحد بيتعلم في أولاد الناس" D:
تصدقيني يا بنوتة لو قلتلك اني دخلت كلية تربية وتحديدا رياض اطفال على الرغم من معارضة ماما الشديدة لأني ومن زماااااان قوي بحب المجال دا ونفسي ابقى فيه لكن اللي كرهته مش المجال نفسه لكن الجو المحيط بالمجال واللي مينفعش تفصلي نفسك عنه
وبعدين يا "مدام" أحب اقولك فيه معانا في الدبلومة بنات حوامل واللي عندها طفل عنده 4 شهور واللي عندها 47 سنة يعني حاولي يا فندم متكسليش والحقي نفسك دلوقتي قبل ما العيال يربطوكي
فعلا يا بنوتة ودا اللي اتقالي كتير
ربنا يباركلي فيكي يا بنوتة بجد كفاية نوك عليا يا فندم هههههههههههههههه
يا رب آمين ادعيلي لأني بصلي استخارة ومش عارفة برضه ارتاح رغم استمراري في القصور الذاتي اللي انا فيه
انا يمكن مشكلتي مع المدرسة او البلد اللي بسافرلها وهو دا اللي عقدني ويمكن مش كل المدارس الحكومي كدا مش عارفة الحقيقة :(
^_^ نورتيني
إرسال تعليق