مع نفسي

بسم الله الرحمن الرحيم

السلام عليكم ورحمة الله وبركاته

أقول إيه وأبدأ منين بس؟

الحمد لله يا رب بجد مش عارفة ولا قادرة ولا متخيلة أشكر ربنا ازاي

انا ربنا بيحبني بجد؟!

ربنا شايف كل واحد فينا وعالم بحاله ومش سايبه يلطش في الحياة كدا وخلاص

وَأَمَّا بِنِعْمَةِ رَبِّكَ فَحَدِّثْ

ولله الحمد كل لما بحس انها بتديق ربنا يبعتلي الفرج من عنده

لَا يُكَلِّفُ اللَّهُ نَفْسًا إِلَّا وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ

ربنا عارف إني قدرتي ضعيفة عشان كدا دائمًا فرجه قريب

انا بحبك قوي يا رب

كنت مقدمة في وظيفة وحطوني على الويتنج

وقدمت في منحة الآي تي آي وقدر الله وماشاء فعل ومتقبلتش فيها

الحمد لله إن الله مع الصابرين

مَا عِندَكُمْ يَنفَدُ وَمَا عِندَ اللّهِ بَاقٍ وَلَنَجْزِيَنَّ الَّذِينَ صَبَرُواْ أَجْرَهُم بِأَحْسَنِ مَا كَانُواْ يَعْمَلُونَ [النحل 96]

ولله الحمد مش من عادتي الجزع لشيء ربما ظننته سيء في بادئ الأمر

ربنا طول الوقت كاتبلنا الخير وحتى لو احنا مش شايفينه في حينه

المهم رحت امبارح الكلية وأنا فاقدة الأمل إني ألاقي التقديم للدبلومات لسة مفتوح

ولقدر ربنا الموظفة قالتلي المفروض اننا كل سنة بنقفل يوم 15 سبتمبر بس السنادي مجالناش قرار رسمي بأننا نقفل باب التقديم وعليه هاخد منك الأوراق وكنت واخدة من بابا مبلغ قبل مانزل احتياطي عشان لو كان التقديم مفتوح

والحمد لله وسبحان الله جت كل حاجة معايا صدفة وقدمت في الدبلومة على آخر لحظة مع العلم إن الدراسة يوم السبت الجاي "بعد بكرة"

المهم التربية العملي بتاعتي اتوزعت في مدرسة اعدادية بنين في منطقة تعتبر شعبية إلى حد ما

وابن خالتي اللي في اعدادي خوفني منها وبيقولي الطلبة اللي فيها بلطجية وبيشيلوا مطاوي

وقالي لازم اروح بخرطوم وحاجات عظيمة كدا وفضل يديلي درس في كيفية التعامل معاهم

وصحبتي قالتلي اوعي تدخلي المدرسة بطولك لازم تعرفي مين معاكي في التربية العملي وتروحوا كلكم سوا

وبنت خالتي قالتلي لو معاكم اولاد خلوهم هم يشكموا الطلبة وانتوا اشرحوا

كتر الكلام وانا متوكلة على ربنا

لا من طبعي الشتيمة وطولة اللسان ولا عمري مديت ايدي على حد قبل كدا ومش ناوية

وربنا يقدرلي الخير ويجازيني على قدر نيتي

طبعًا فرج ربنا كبير ... وآه يا دماغي

لن اخفيكم سرًا

أنا خايفة