الثلاثاء، 31 يناير 2012

زواج صالونات

بسم الله الرحمن الرحيم
السلام عليكم ورحمة الله وبركاته


تعريف زواج الصالونات:
هو ذلك الزواج الذي يبدأ من خلال طرف قريب أو صديق من العائلة
يبدأ بأن "يميل" الشاب على أذن أحد أفراد أسرته أو أحد معارفه؛ أنه ينتوي الزواج ويبحث عن عروسة ويطلب المساعدة
ومن هنا تبدأ القصة فتجد كل من يعلم بالخبر يعمل كخلية نحل شنت بها حالة طوارئ.. ويبدأ البحث


الأم: هل تعلم لقد أخبرني زميلي في العمل أنه يبحث لابنه على عروسة؛ وأعطيته رقم هاتفك

الأب: ومن هو هذا الزميل هل أعرفه؟!
الأم:
بالطبع إنه فلان الفلاني الذي التقيت به في المكان الفلاني

الأب: أجل أجل تذكرت

الأم:
أتى لكِ عريس اليوم

البنت: عريس!! ومن أين أتى؟
الأم: ابن زميل لي بالعمل
البنت: دعينا من مناسبة زملاء العمل فلا داعي للحرج إذا لم يتم الموضوع
الأم: ومن أين تظنينهم يأتون؟ إذا لم يكن من زملاء العمل عندي فمن زملاء والدك أو أخوكِ أو الجيران، هل سنُحرِّم الزواج منعًا للإحراج؟!
البنت: وعلى أي أساس طلب منك هذا الطلب؟ هل رآني من قبل؟ أم أنه مخدوع ويظنني أشبهك؟
الأم: لا لم يركِ مسبقًا ..هل تعتقدين!!..أظنه طلبه لما يعرفه عنا من احترام
البنت:
وليكن..أخبريه في سياق الكلام أنني أشبه والدي في كل شيء "شخصية وشكلا" حتى تكون الأمور واضحة منذ البداية


::في يوم آخر::
الأم: زميلي يُلح عليَّ يومًا بعد يوم متى يأتوا لزيارتنا؟
الأب: اسألي ابنتك أليست هي العروس!!
البنت: ليس الآن فأنا ليس لدي وقت لهذا الأمر

::في يوم آخر::
الأم: ماذا أقول لهم؟ متى يأتوا؟
البنت: عندما أنهي امتحاناتي
الأم: قل شيئًا لابنتك.. ما الذي يدفعهم للانتظار كل هذا الوقت وهم حتى لم يروا العروس؟
الأب: دعيها وشأنها ابنتي حبيبتي واريدها بجواري تعطر لي الحياة
الأم: أريد موعد محدد لقد ضقت من إلحاح زميلي عليّ كلما رآني وأصبحت أتهرب من رؤيته
البنت: أترين!! ولهذا أخبرتك أنه لا داعِ لمعارف العمل "منعًا للإحراج"
الأم: سوف أخبرهم بأن الموعد الجمعة القادمة
البنت:
تمزحين أليس كذلك؟!


::تمر الأيام::
الأم: أخبِرهم بأن يأتوا اليوم
الأب: اليوم!!
الأم: أجل فلننه هذا الموضوع المعلق
الأب: حسنًا
البنت: إفعلوا ما طاب لكم

::ولكن الموعد يؤجل::

رغم كل التعليمات التي ألقتها والدتها على مسامعها، ألا تصبح "كالطوبة" وألا تجلس "مكشرة" وأن تتفاعل في الحوار
إلا أنها وبمجرد أن دخلت عليها والدتها غرفتها لتدعوها للدخول للضيوف، لا تدري ماذا أصابها
كتلة من مشاعر متضاربة غير مستقرة
فتارة تصيبها حالة من الضحك وتارة تشعر أنها من الأصل لا تريد الدخول وتارة يكسوها الزهول والصمت.. ولكن في جميع الأحوال هي متسمرة لا تريد الذهاب
ومن إلحاح والدتها شعرت أن ما تفعله ما هو إلا "دلع بنات" وعليها أن تحسم الأمر
أخذت نفس عميق وقررت الدخول

استغربت نفسها
هي ليست على طبيعتها بالمرة

وهي في طريقها للجلوس ومن كثرة ما حملقت في "السجادة" اكتشفت أشكال جديدة فيها رغم أنها تمر عليها منذ أكثر من عشرين عام

وجلست
"كالطوبة"
 بعد أن سلمت بابتسامة شديدة الاصطناع ولم تنظر لأحد
تأملت كل ركن من أركان "الصالون" لدرجة أنها كادت تحصي ذرات التراب المتناثرة على "السجادة"
تحدثوا طويلاً ولكنها لم تنصت ولا حتى تسمع أي شيء مما قالوا "كما لو كنت قد شغّلت المذياع في غرفة وقررت الجلوس في غرفة أخرى"
وكلما أحست أنها أصبحت "طوبة" أكثر من اللازم، ويجب عليها على الأقل النظر إلى ضيوفها من باب المجاملة، وكلما همت برفع رأسها، أحست بأن نوبة من الضحك ستنتابها؛ فتعض على شفتيها في حزم وتقرر تنكيس رأسها مرة أخرى

لقد حفظت نقوش الجوارب وانطبعت صورتها بعقلها تستطيع أن تستظهرها عن ظهر قلب

ولكنها ملّت هذه الحالة الرتيبة التي هي عليها وتذكرت كل كلمة أخبرتها بها صديقتها "بأن الموضوع ليس لعبة وأنه ليس مدعاة للإحراج؛ هذا مستقبلك بأكمله ولو احرجتِ اليوم ستكونين أنتِ أكبر خاسرة، تذكرت كل كلمة وكأنها تحدثها الآن، تذكرت وهي تخبرها بأن الإحراج له وقته ولكن هذا موقف يستدعي الإجابة بالموافقة أو الرفض.. وحتى لا تضع نفسها في هذا الموقف مرة أخرى؛ لو لم تستطع تحديد موقفها في هذه الجلسة ستضطر لإعادة الموقف بأكمله مرة اخرى"
وهنا قررت الخروج عن هذه المشاعر السلبية
قررت كسر جميع الحواجز النفسية
ورفعت رأسها ونظرت إليهم بثبات
وتحدثت وناقشت وقصت وحكت
ضحكت وانفعلت واندهشت "كما لو كانت تتحدث لأقربائها" هذه هي بلا تصنع وبلا أقنعة كأكثر ما تكون على طبيعتها
صدمها أنه لم يكن كذلك .. بعد كل العناء الذي بزلته لتتخطى حاجز الحرج ولكنه لم يقدر لها ذلك واستمر حرجه مسيطر عليه
قررت أن تتساما فوق حرج الموقف وبدأت بتوجيه كلامها إليه مباشرة
ولكنه أفحمها بردوده
تبعها مقاطعة والده بأنهم "سيستأذنوا" لأن السائق ينتظرهم بالأسفل

لم تحرك ساكنًا
فقط تبعتهم بنظرها "وقد عادت لتتأمل نقوش الجوارب"


وهكذا أدركت المقصود من مصطلح زواج صالونات والذي كان يبدو بالنسبة لها مسبقًا مصطلح غامض

أدركته ورفضته
رفضته بشدة

إمضاء::
E73

الأحد، 29 يناير 2012

حقنة مضاد

بسم الله الرحمن الرحيم
السلام عليكم ورحمة الله وبركاته


حقنة مضاد
دي حقنة مش زي أي حقنة

أنا عن نفسي معنديش فوبيا الحقن
زمان وانا صغيرة لما كان الدكتور يقولي اكتبلك كبسولة ولا حقنة واقوله حقنة كان يستغرب ومرة دكتور زعقلي لما قلتله حقنة معرفش ليه اخدها على محمل شخصي الظاهر "كان هو اللي هيديهالي يعني!!"

ومن وانا صغيرة عندي من الأدوية الأقراص أو الكبسولات أو أي أدوية بتتاخد بالفم معرفش ليه العقدة دي

ومن هنا ومن موقعي هذا ومن واحدة كييفة حقن أحب أقولكم

كله الا حقنة المضاد
ربنا ما يكتبها على حد

أنا أمي ايدها خفيفة جدا على فكرة بس الدوا مش ممكن

فظيع فظيع فظيع

مؤلم بشكل بشع لدرجة تحس معاها بانتشار الدوا في الجسم

ألم كدا يستمر بتاع عشر دقايق

وأنا اعيييييييييييييط
بس برضه مش هاخد الكبسولات

عاااااااااا سلام بقى عشان اروح أجهز الحقنة

السبت، 28 يناير 2012

حشو عصب

بسم الله الرحمن الرحيم
السلام عليكم ورحمة الله وبركاته


حشو عصب وآه ياني
ماكانوا خلعوه وريحوني

حاسة ان قطار مشي على سناني
رايح وكمان جاي من تاني

أنا فكي واجعني وبعيط
ومش ضامنة كمان يوم أصوت

رحت لدكتوري قالي تأخرتي
شرفينا الأسبوع اللي جاي لأ اللي بعده ياختي

وكتبلي على حقن وأقراص
وهو أنا مش بني آدمة وعندي إحساس!!

ضرسي بيوجعني وغايبة عن شغلي بقالي يومين
وجبت الدوا والروشتة بس النفس أجبها منين

قالك قرص بعد الأكل
وهو أنا أصلا عارفة آكل

حاسة أنه لو طول الأمر
هحتاج أعمل استئصال للعقل

يا وجع ضرسي يا ضارب في اللوز
وطالع عالدماغ ويقولك التهاب

نفسي أديلك بوكس أوقعك وأخلص
يا ضرسي يا هاريني ومجوعني إخلص


إمضاء:
E73

الأربعاء، 25 يناير 2012

يوم الثلاثاء

بسم الله الرحمن الرحيم
السلام عليكم ورحمة الله وبركاته


المقال دا كنت عاوزة اكتبه من امبارح بس اللي حصل بقى

أولا كنت برتب وجه على بالي فكرة نبيهة جدًا معرفش جت ازاي

وهي اني ارفع رجل ترابيزة الكمبيوتر واكنس تحتها
طبعا الكمبيوتر فوق الترابيزة


ومعرفش بصراحة هو ليه زعل و"سخسخ" واتفقلس ووقع لما رفعت رجل الترابيزة
وببص ورا الترابيزة لقيته جه مليون حتة والكيبورد فوق الشاشة والسي بي يو متفككة وياعيني مغم عليها على جنبها

لميته بسرعة وحاولت احط كل حاجة فيه مكانها ورجعته عالترابيزة تاني ورجعت الترابيزة مكانها

ملحقتش أخلص كنس البيت لأني رجعت من الشغل متأخرة الساعة 4 باين

المهم يعني والخلاصة

مش انا اللي اقول "اعمل حاجة وتشربوها!!" ويتقالي مفيش داعي

ولا انا اللي اقول الملبن حلو وميتاكلش منه

هههههههههههههه طبعًا دا كلام كدا بيني وبين نفسي

المهم يعني انا توصلت لمبدأ حلو قوي، بما إن الإنسان لما بييجي على نفسه قوي قوي يعني ويجيله احباط بيبقى شعور مش لطيف

انا مش هقبل بالطريقة دي تاني

ولما اقول فلتر ياريت يبقى فلتربجد يا بلاش منها أصلا

الانسان ياما بيشوف، مش شرط ابقى عندي خلفية علشان اشوف؛ لأن وقتها الموقف هيبقى مصطنع قويييييييي وبايخ فوق الوصف

حد جاي بنفسه ومقرر وعارف هو عاوز ايه اهلا وسهلا مفيش مشاكل

لكن حد مزقوق ولا جاي بالنصيحة لأ شكرًا برضه منعًا لإحراج أي من الطرفين

مش عارفة بصراحة انا كنت ناوية اكتب حاجة وطلعت حاجة تانية بس دا اللي حصل واللي اتكتب وهي جت كدا

ما علينا

أنا عملت اللي عليا وزيادة على فكرة

مرضتش البس الطقم الاسود مع اني كنت جاية من الشغل به ومكنتش ناوية اغيره

ملبستش الخاتم اللي انا جايباه اللي شبه المحبس واللي بقيت بلبسه بصفة دائمة في البيت او برة عشان محدش يفتكر اني قاصدة تطفيش

جيت على نفسي واتكلمت وضحكت وهزرت مع ان دا مش من طبعي مع الناس الغريبة يمكن آخد شهور بس عشان أرد السلام

بس علشان كذلك ميتقالش اني كنت اقصد تطفيش

يعني من الآخر عداني العيب وأزح

وبالمناسبة انا جهازي باظ وعند الدكتور بيتعالج وانا بكتب المقال دا من جهاز اخويا

الاثنين، 23 يناير 2012

لأن العند يورث الكفر

بسم الله الرحمن الرحيم
السلام عليكم ورحمة الله وبركاته


اعندي فأعند

فأزيدي عندك 

لتكتشفي أن العند استمد اسمه مني

.

الأحد، 22 يناير 2012

إجهاض

بسم الله الرحمن الرحيم
السلام عليكم ورحمة الله وبركاته

يمكن تكون أضغاث أحلام
لكن دا ميمنعش اني الفترة الأخيرة صليت كذا صلاة استخارة بخصوص عدة موضوعات ولم تحسم معي جميعًا منذ فترة

النهاردة حلمت حلم غريب جدًا
إجهاض!!

مش من عادتي البحث وراء تفسير الأحلام لكن قلت يمكن دي رؤية بخصوص صلوات الاستخارة
وكانت نتيجة البحث كالتالي:

اعتقد والله اعلم ان الاجهاض يختلف من رؤية لاخرى قد يكون زوال هم للمهموم لان الحامل يحمل شىء والاجهاض معناه زوال هذا الشىء قد يكون للتى لم تتزوج معناه انتهاء فترة العزوبية وقرب الزواج وقد يكون للطالب وهو يحمل مادة معناها نجاح فى المادة وقد يكون للتاجر وهو داخل على مشروع قد يكون معناه ضياع فلوسه وامواله هذا والله اعلم

يعني لو كانت رؤية فعلا تبقى الرؤية دي جابت مالآخر في كل شيء ما عدى اني مش تاجر ^_^

اللهم إني أسألك خيره وخير ما فسر له وأعوذ بك من شره وشر ما فسر له

الجمعة، 20 يناير 2012

إيه الإحساس دا؟!

بسم الله الرحمن الرحيم
السلام عليكم ورحمة الله وبركاته


إيه دا؟

إيه الإحساس الوحش دا

أنا مالي تعبانة نفسيًا ليه كدا؟!

ليه متضايقة ومكتئبة وقلبي مقبوض كدا؟

الإحساس دا غبي أنا مبحبوش

لا حول ولا قوة إلا بالله

استغفرك ربي من كل ذنب وخطيئة وأتوب إليك

إنا لله وإنا إليه راجعون

ربنا يستر

هو مش المفروض أبقى مبسوطة؟!

بكرة امتحان المنحة اللي مقدمة عليها

يوم الاثنين آخر امتحان في الدبلومة "نصف العام"

يوم الثلاثاء المفروض يوم مميز

خير اللهم اجعله خير

أمال إيه الاحساس الغبي اللي عندي دا؟!

عاوزة أدخل أنام ومصحاش دلوقتي خااااااااااالص

عاوزة أصحى وبس على شهر أبريل

الأربعاء، 18 يناير 2012

متجيش

بسم الله الرحمن الرحيم
السلام عليكم ورحمة الله وبركاته

ماهو أصله مينفعش بنت امبارح تبقى عروسة

دي حتى تبقى حاجة ملهاش معنى

مش عارفة مش داخلة دماغي أصلا @_@

مش بيقولك خليك ورا مش عارفة مين لحد فين

ماشي خلينا وراه لما نشوف آخرتها

السبت، 14 يناير 2012

إلى أمي..

بسم الله الرحمن الرحيم
السلام عليكم ورحمة الله وبركاته

لكم أحببت هذه الكلمات وذهبت معها ولحنها إلى عالم آخر قصيدة محمود درويش إلى أمه "أحن إلى خبز أمي"

هذه هي الانشودة

 
وإليكم كلمات
إلى أمّي

أحنُّ إلى خبزِ أمّي

وقهوةِ أمّي

ولمسةِ أمّي

وتكبرُ فيَّ الطفولةُ

يوماً على صدرِ يومِ

وأعشقُ عمري لأنّي

إذا متُّ

أخجلُ من دمعِ أمّي

* * *

خذيني، إذا عدتُ يوماً

وشاحاً لهُدبكْ

وغطّي عظامي بعشبٍ

تعمّد من طُهرِ كعبكْ

وشدّي وثاقي..

بخصلةِ شَعر..

بخيطٍ يلوّحُ في ذيلِ ثوبكْ

عساني أصيرُ إلهاً

إلهاً أصير..

إذا ما لمستُ قرارةَ قلبكْ!

* * *

ضعيني، إذا ما رجعتُ

وقوداً بتنّورِ ناركْ

وحبلِ غسيلِ على سطحِ دارِكْ

لأني فقدتُ الوقوفَ

بدونِ صلاةِ نهارِكْ

هرِمتُ، فرُدّي نجومَ الطفولة

حتّى أُشارِكْ

صغارَ العصافيرِ

دربَ الرجوع..

لعشِّ انتظاركْ.. 


محمود درويش

الاثنين، 9 يناير 2012

بائعة الورد

بسم الله الرحمن الرحيم
السلام عليكم ورحمة الله وبركاته


هذا المسلسل وخاصة في الحلقة الـ 88 والـ 89
أحدث صراع كبير بداخلي أود أن يخرج على لسان البطلة

أنت!! تأكد أنك لو لم تأخذ الخطوة فلن أبدأها أنا .. فارتح ورُق بالاً فسوف أضيع من بين يديك قريبًا

وأنت!! إن كان هذا هو الرابط الوحيد بيننا فليذهب إلى الجحيم فأنا لست باقية عليه على أية حال فلتلزم حدودك معي إذن

الأحد، 8 يناير 2012

كم عشقت هدوئك يابلدي

أصبحت أمقت زحامك

صمت الكباري




الله يرحم أيام زمان

الصور دي "كانت فأواخر الشتا قبل اللي فات"

ملحوظة صغيرة مش أنا اللي مصورة الصور دي اللي مصورها اسمه إبراهيم أبو زيد

كنت بحب هدوئك

الجمعة، 6 يناير 2012

لفتات

بسم الله الرحمن الرحيم
السلام عليكم ورحمة الله وبركاته


لفتات..تظنها تافهة..تحمل بداخلها كل شيء
______________
""...كنت بتعمل ايه في اليوم دا؟!""
"اشمعنى اليوم دا!!"
""...استنيتك كتير..كنت محتاجة اشوفك جنبي..وملقتكش..""
"قلتيلي؟"
""...وهو انا كنت محتاجة أقولك!!!!""
"أمال كنت هعرف ازاي؟!"
""...اعتبر اني مسألتكش على حاجة."""
_______________
انتهى المشهد

إمضاء:
E73

الأربعاء، 4 يناير 2012

قومي بقى

بسم الله الرحمن الرحيم
السلام عليكم ورحمة الله وبركاته

المفروض اروح اغير هدومي حاليًا وأنزل انتخب بقى كفاية تأخير لحد كدا
المشكلة في البرد والمطر اللي مبهدل الدنيا والواحد مش قادر ياخد القرار المصيري الرهيب دا "ألا وهو انه يغير هدومه في البرد دا"
***********
غدًا مساءً وكل مساء أول امتحانات التحريري لنصف العام في الدبلومة اللهم اجعله خير المفروض الامتحان الساعة واحدة الظهر بس مش عارفة بصراحة انا هروح الساعة كام يمكن اروح اتنين ولا حاجة اللي متضايقة من نفسي فيه قوي اللامبالاة اللي عندي انا حتى الآن مفتحتش ولا كتاب ولا حتى علمت في الكتب على الملغي والمقرر مش عارفة آخرتها ايه ربنا يستر

أكيد أول قلم بيفوق وربنا يسترها معايا في الخمس أقلام اللي هاخدهم لحد آخر شهر يناير

واضح كدا ان السنة دي مش ناوية تختلف كتير عن السنة اللي فاتت من بدايتها

ربنا يستر

ونفسي اقول لنفسي حاجة واحدة بس

قومي من تحت الردمِ
**********
صحيح بالمناسبة وعلشان تبقى الدعوات واحدة


أحمد أخويا حبيب قلبي ربنا يوفقك يا رب ويجعل في وشك القبول ويكرمك ويقدملك ما فيه الخير


امتحانك الساعة 6 ودلوقتي الساعة 6 ربنا يكرمك ويلهمك يا رب مش عاوزة اتصل بيك علشان ملبخكش ونفسي اطمئن وصلت في الميعاد ولا لأ

الثلاثاء، 3 يناير 2012

بعض الكورسات لن تضر



أحيانًا بنحتاج نشغل مخنا شوية

بعض الكورسات إن شاء الله لن تضر


اللهم إني أستخيرك بعلمك وأستقدرك بقدرتك وأسألك من فضلك العظيم، فأنت تعلم ولا أعلم وتقدر ولا أقدر وأنت علام الغيوب، اللهم إن كنت تعلم أن تقديمي في هذه المنحة خير لي في ديني ومعاشي وعاقبة أمري فاقدره لي ويسره لي وبارك لي فيه، وإن كنت تعلم أن تقديمي في هذه المنحة شر لي في ديني ومعاشي وعاقبة أمري فاصرفها عني واصرفني عنها واقدر لي الخير حيث كان ثم رضني به

اللهم آمين