الجمعة، 24 يونيو 2011

صابرة وساكتة

بسم الله الرحمن الرحيم
السلام عليكم ورحمة الله وبركاته

حاسة أنه بيخدعها وصابرة وساكتة
حسيتها متسرعة بس برضه فضل صابرة وساكتة
فيه عيوب كتير واضحة وهي متجاهلاها وأنا صابرة وساكتة
نبهتها متخافش من عواقب الرفض لو رفضت بس حسيتها أخدت كلامي من الودن دي وطلعته من التانية وأنا صابرة وساكتة

أنا قلقانة وفرحانة وصابرة وساكتة
مش حابة أظهر بشكل الغراب في المواقف اللي زي دي ولذلك قررت أفضل صابرة وساكتة

يا رب ظنوني وشكوكي كلها تطلع غلط وأبقى عملت عين العقل لما قررت أفضل صابرة وساكتة

يا رب استر

الخميس، 23 يونيو 2011

بغيضة



الاثنين، 13 يونيو 2011

أنا فاااااااااشلة

بسم الله الرحمن الرحيم
السلام عليكم ورحمة الله وبركاته
فااااااااااااااااااشلة

يا فاشلة يا فاشلة

يا فاشلة يا فاشلة يا فاشلة

فاكرين حسن حسني وهو بيذل كريم عبد العزيز في فيلم الباشا تلميذ وبيقوله يا فاشل

أهو أنا حاسة دلوقتي بشعور أنيل من شعور كريم عبد العزيز في الفيلم وفي الموقف اللي كان فيه

النهاردة يوم غريب عجيب بأمانة يوم شبه بعضه

في الوقت الحالي ماما مسافرة وسيبالي البيت أمانة في رقبتي معايا بابا وأخويا

طبعًا بقى المفروض إن أنا سيدة البيت حاليًا.. وعلى حسب كلام ماما "اللي قدك فاتحين بيت دلوقتي" فالمفروض أبقى بريمو وقد المسئولية

وصتني مامي -الله يخليهالي- قبل ما تسافر أطبخلهم صينية كوسة بشاميل، وكانت هتعملها قبل ما تسافر بس أنا أصريت أنها متعملش حاجة ولازم تدخل تنام عشان تصحى الصبح فايقة وتعرف تسافر من غير ما تتعب

طبعًا والدتي -ربنا يخليهالي- مكدبتش خبر "واثقة في تربيتها وفي قدرات بنتها"
وقد كان.. وسافرت من أول الأسبوع وسابتلي البيت أتولى زمامه

الحمد لله من ناحية الترتيب والنظافة دي حاجة مش صعبة ومش محتاجة تعليم؛ فعملتها


ماما سافرت فجر يوم الأحد وبالتالي يوم السبت كان تمام

يوم الأحد كان المفروض أعمل الغدا

نيجي بقى للغدا ولصينية الكوسة تحديدًا

قعدت أجرد الكوسة وأقطعها وأجهزها على أساس إن الوقت كفى؛ أعملها صينية كوسة بشاميل، ولو مكفاش خلاص هعملها كوسة بالصلصة في حلة وانتهينا

وإذا أنا على وضعي هذا أمام الكمبيوتر وجنبي الكوسة اللي بقطعها إذا بوالدي دخل البيت.. يا نهار ألوان دانا كدا لا لاحقة أعملها لا صينية ولا حلة ولا حتى سلطة

الحمد لله كنت عملت رز -ومن ضمن فشلي إني مأخدتش بالي إن الرز اللي عندنا قرب يخلص إلا وقتها.. وطبعًا محدش في البيت عشان أبعته يجيب رز، ومينفعش أتصل بالسوبر ماركت لأني مش هفتحله ومحدش في البيت
بس ربنا ستر وكان فيه كبايتين ونص -طبعًا رضا قوي- وربنا يخليلي ماما كان لسة فاضل من يوم السبت ملوخية وفراخ حطيت لبابا أكل واللي فضل خليت أخويا ياكله؛ بما إن الغلطة غلطتي فهما ملهمش ذنب أجوعهم معايا ودخلت أنا قليت بيضتين وقلبتهم في شوية رز وتمام التمام البيض بالرز أكلتي المفضلة بروتين حيواني ونشويات ووجبة متكاملة ومفيهاش مشاكل

نيجي بقى للنهاردة

نمت بعد الفجر بعد ما كنت نضفت البيت والمطبخ وظبط كل شيء وعملت لبابا السحور واتسحرت معاه وإلى الآن كله تمام

صحيت من النوم على آذان الظهر وفضلت قاعدة في السرير لحد الساعة 2 وربع

قمت صليت وافتكرت إن مفيش رز في البيت لأن آخر كبايتين طبختهم إمبارح وأخويا كان في البيت قلت ألحقه وأخليه يجبلي "وكتر ألف خيره قالي مش فاضيلك إطلبي السوبر ماركت يجبلك" قلتله مش هفتح للراجل قالي خليه يجيبه عند عمتك وإنزلي خديه منها
وقتها عمتي طلعت لنا، مسكت أنا فيها وقلتلها تتصل بالسوبر ماركت وتفضل معايا عشان لما ييجي تفتحله هي وتحاسبه.. وقد كان

طبعًا الكوسة متقطعة من امبارح اللي فاضل إني هعمل البشاميل والعصاج وأحط كله على بعضه وأطبخ الرز وانتهينا
ولسة قدامي وقت كبير على المغرب عشان بابا يفطر

المهم مش عارفة الوقت جري ازاي ولقيت نفسي محتاسة مش لاحقة أعمل أي حاجة، حمرت البصل وحطيت اللحمة المفرومة وسويتهم.. شوية صلصة وملح وفلفل وبهارات ولمستي الخاصة "قرفة وجنزابيل" وورق لورو وحبهان

في الوقت دا أخويا جه وكان مش فاضل على المغرب إلا أقل من ساعة وطبعًا حبيبي -ربنا يخليه لمصر- ميتوصاش في المواقف اللي زي دي

هو:الغدا جاهز؟
انا:لأ لسة
هو:وقاعدة تستعجليني وهاتلي رز هاتلي رز اللي يسمعك يقول مش فاضل إلا الرز
أنا:أنا ظابطة نفسي على أذان المغرب معرفش إنك مش صايم
هو:آدي دقني لو خلصتي على المغرب إبقي قابليني _ ونزل يشتري إندومي "أكلته المفضلة اللي محدش فينا بيطيقها"

بابا جه وأنا لسة بعمل في البشاميل والحمد لله الرز جهز

بابا:الفطار جاهز يا نوسة؟
انا:ثواني هيبقى جاهز يا حبيبي وبعدين المغرب لسة مأذنش
بابا:مانا مش عاوز المغرب يأذن وتذليني على ما تفطريني، أنا جاي من الشغل تعبان وخلصان
أنا:عيوني يا حبيبي متقلقش

وطبعًا مش محتاجة أقول إيه اللي حصل.. وإلا مكنش زماني بكتب البوست دا حاليًا

الأذان أذن

بابا: الفطار جاهز ولا أنزل أصلي؟
انا: جاهز يا حبيبي إنزل صلي بس وهيبقى جاهز
بابا: طيب مفيش حتى عصير ولا أي حاجة أفطر عليها؟!
انا: معلش يا حبيبي مأخدتش بالي

ونزل بابا

وانا بدأت أرص شرائح الكوسة في الصينية وحطيت طبقة العصاج وفوقها طبقة تانية من شارئح الكوسة وفوقها البشاميل وانا بعمل كدا عمالة بفكر.. يا ترى هي الكوسة دي هتستوي ازاي من غير مية؟! طيب أحط مية؟ ولا بلاش أحسن البشاميل يسيح
وقررت أغطيها بورق قصدير علشان تستوي في صوص العصاج وبعد كدا أبقى أدخلها الفرن تاخد وش

بابا جه من الصلاة
بابا:ها يا نوسة الفطار فين؟ ولا آكل سندوتش جبنة؟
انا: على النار أهو يا حبيبي "وجبتله كباية لبن عشان يفطر بيها"
بابا: هو مش انتي قلتي انه جاهز؟"وبدأ يدور في التلاجة عن أي خضار ماما تكون طبخته ونسيته في التلاجة"
انا: ثواني بس يا بابا وهيكون جاهز متقلقش وبعدين مانا كمان كنت صايمة هفطر معاك

وقررت وقتها "أخيرًا" أتصل بماما أتأكد منها هي كانت بتعمل صينية الكوسة كدا!! لأني شاكة بصراحة المنظر اللي عملته مش شبه اللي ماما كانت بتعمله خالص

انا: أيوة يا ماما هو حضرتك كنتي بتحطي الكوسة نية في الصينية؟
ماما: لا يا حبيبتي بستويها برة الأول وبعد كدا أحطها
انا: طب هو انا خلاص حطيتها نية وحطيت اللحمة المفرومة والبشاميل وهي مش راضية تستوي، أعمل ايه؟
ماما: عملتي اللحمة المفرومة عصاج يا حبيبتي ولا حطيتيها نية؟
انا: لأ طبعًا يا ماما طبختها
ماما: خلاص يا حبيبتي مش مشكلة سيبيها على نار هادية وهي تستوي، مش انتي حطالها مية؟
انا: لأ طبعًا محطتش مية
ماما: خلاص مش مشكلة زودي من الجناب كدا بشويش مية بحيث متبوظيش منظر البشاميل
انا: طيب أحط في المية دي ملح ولا أعمل ايه انا حطيت ملح في العصاج والبشاميل
ماما: لو حسيتي إن الملح بتاعك فيهم كان مظبوط حطي سنة صغيرة في المية ملح، ولو الملح قليل اظبطي الملح في المية وضيفيها
انا: طيب يا ماما انا محطتش بيض في البشاميل عشان مكنش فيه وقت، عادي؟!
ماما: عادي يا حبيبتي مش مشكلة، نوسة هو بابا جه ولا لسة؟
انا: جه وصايم ولسة مفطرش
ماما: حرام عليكي يا إيناس ايه دا روحي أعملي حلة بطاطس بالصلصة بسرعة وفطريه
انا: حلة بطاطس إيه بس يا ماما والكوسة اللي على النار دي مين هياكلها
ماما: كوسة مين دي اللي بتتكلمي عليها دي هتاخدلها بتاع ساعتين بالمنظر اللي انتي عملتيه دا، روحي بسرعة اعملي بطاطس تخلص في ربع ساعة وفطري بابا حرام عليكي كدا "وبدأت تقولي خطوات عمل البطاطس كما لو كانت مش واثقة في قدراتي"
انا: خلاص يا ماما خلاص حاضر هعمل بطاطس انا عارفة بتتعمل ازاي مش للدرجادي يعني

وانتهت المكالمة وبابا بيناديلي وبيترجاني أجيبله أي حاجة ان شاء الله سندوتش جبنة ولا تفاحة ولا أي حاجة "المشكلة ان بابا من النوع اللي لما بيجوع؛ نفسه بتتسد ومش بياكل، لو مأكلش في وقت ما كان جعان"

طبعًا رحت انا قشرت بططساية وقطعتها مكعبات عليها بصلاية كذلك مكعبات وطمطماية وشوية مية بملح وفلفل وقرفة وورق لورو وحبهان وحطيتها على النار

بابا: يا بنتي هاتي أي حاجة من اللي بتعمليها مش مشكلة تكون مستوية انا راضي
انا: حاضر يا بابا خلاص انا بجيب اهو

وواقفة بتابع البطاطس وطبعًا اخويا ربنا يكرمه مش راحم نفسه كل لما يعدي عليا هاتك يا تريقة " عاملة حسابي.. على المغرب الكل هيكون جاهز.."
انا بقى عاوزة أكسر صيامي وبعد ما ضفت المية لصينية الكوسة والكباية في ايدي -هحط جواها لبن- لقيت ان لسة فيها ربعها مية قلت مش مشكلة أشربها وبعدين أحط اللبن

وإذا بي بشرب

بووووووووووووووووف

ايه القرف دا؟ والزهايمر دا؟!
طبعًا المية دي اللي كنت بزود بيها الكوسة وبالتالي هي مية بملح وانا نسيت وطبعًا بعد ما شربت كانت النتيجة اني مش هبلع مية بملح على الريق والأرض اتغرقت مية

وغسلت الكباية وحطيت لبن

والحمد لله حسيت البطاطس قابلة للاستهلاك الآدمي غرفت لبابا

بابا: ايه دا؟!!!!!!!!
انا: بطاطس
بابا: هي مش كانت كوسة!!!!!!!!
انا: ماهي الكوسة لسة مستوتش
بابا: والبطاطس هي اللي استوت؟ دي الكوسة ملهاش روح بتستوي بسرعة
انا: معرفلهاش بقى مش راضية تستوي
بابا: من الصبح!!!!!!!!!!!

المهم بابا فطر ورحت انا أدوق البطاطس لقتها حادقااااااااااااا "مانا مدقتهاش وانا بطبخها "بس الحمد لله اني كنت جيباله خيار معاها كان زمانه رماها في وشي

نوسااااااااااااا
انا: نعمين يا حبيبي
إدالي الطبق
انا: حلوة البطاطس؟
بابا: اه يا حبيبتي تسلم ايدك
انا: اجبلك فاكهة؟
بابا: ليتل "Little"

جبتله فاكهة وببص على صينية الكوسة الملعونة لقيتها من تحت اتحمرت والطبقة اللي فوق مش مستوية خالص
قررت أغطيها تاني وأدخلها الفرن واللي يحصل يحصل وربنا يستر بجد اللي صعبان عليا في الليلة دي كلها كمية العصاج اللي في الصينية خسارة والله بجد

وعلى الرغم من إن كلهم ماسكين أعصابهم معايا إلا إني بجد مش طايقة نفسي

طبعًا جنبي حاليًا طبق رز وبطاطس طعمه بشع مأكلتش منه غير معلقتين ومش قادرة أكمل

وتبقى صينية الكوسة في الفرن

نسيت أقولكم ان البشاميل خلاص فقد هيبته وساح وسط الصينية بعد ما ضفت المية وربنا يستر بجد عالنتيجة

مقلتلكمش بقى على الطامة الكبراااااااااااااااااا

اني مدقتش لا البشاميل ولا العصاج ومعرفش أخبار الملح معاهم ايه وبجد يا رب استرها معايا انا كانت نيتي كويسة

وحاليًا طبعًا المطبخ يضرب يقلب مفيش ولا حلة "تقريبًا" نضيفة كل حاجة في الحوض والنملية بقت شوارع والأرض بقت حقول

عاااااااااااااااااا

انا فااااااااااااااااااااشلة

وانا اللي كنت فاكرة نفسي إييييييييييه ياما هنا ياما هناك يادي الفضيحة

يا شماتة أبلة ظاظا فياااااااااااا

الأربعاء، 8 يونيو 2011

مجنونة

بسم الله الرحمن الرحيم
السلام عليكم ورحمة الله وبركاته

مجنونة وفضيحة

أقول الموقف من الآخر!!!!!!!!!!!

عملت عملة مهببة

مش معايا موبايل..

بطلت احط أي حاجة لها قيمة في شنطتي.. بشيلها عياقة إلا من الكارنيهات والبطاقة والرخصة << ضروريات لابد منها ويمكن استرجاعها

ركبت المترو مع ماما..

الدنيا زحمة جدًا الصبح..

ماما نزلت من باب الدخول..

ناس كتير بتدخل من كل الأبواب..

نسيت أروح عند باب الخروج قبل ما المترو يقف..

أخدتني القَيامة قوي وقررت أخترق الناس جرييييييييييييييييي لحد ماوصل لباب النزول وانزل من هناك!!!

الصفارة بتصفر..

الناس برضه لسة بتطلع من باب النزول..

عدوني عدوني عدووونييييييييييييي......................

إحم! إحم!! الباب قفل على ايدي!!!

لأ مش زي تخيلكم..

انا جوة والشنطة وايدي برة والباب فاتح على قد الشنطة لأنها هي اللي مهروسة في النص، وتوقعي انه مجرد ما هيخبطها هيفتح تاني وانزل، بس مش دا اللي حصل.. وانا واقفة زي خيبتها.. ومش عارفة اعمل ايه!! وشايفة ماما واقفة على الرصيف بتتلفت حوليها انا منزلتش وراها ليه

جالي واحد كدا جنتل مان "ولا خدت بالي حتى من وشه ولا شكله" لابس تيشيرت أحمر -أو حاجة زي كدا- ملمحتوش أصلا، فتحلي الباب بايده وانا عديت جري.. وراح الباب قافل، وانا ماشية ومدياله خلاص ضهري.. افتكرت اني واجب اشكره؛ قلتله شكرا جدًا وقالي العفو "من غير ما التفتله"

ماما بقى وعاللي عملته فيا...

انتي مجنوناااااااااااااااااااااااااا!!!

يادي الكسوف شكلي كان خيبة قوي بجد اتفضحت.. ماما قالتلي منزلتيش ليه المحطة الجاية ورجعتيلي تاني؟!

انا بأمانة معرفش ليه معملتش كدا!!!

بس بعدها لما قعدت وفكرت برواقة.. عرفت ان برضه رد الفعل السريع بيبقى نتيجة أسباب مترسبة في العقل الباطن، لا يوجد وقت للتفكير فيها

اولاً: مش معايا موبايل، وانا عارفة ان ماما قلوقة جدًا -وخاصة عليا- ومش متوقعة رد فعلها كان هيبقى عامل ازاي لو فضلت راكبة ونزلت المحطة اللي بعدها.. ولو رجعتلها هل هلاقيها ولا هتقرر تركب المترو اللي بعده وتنزلي المحطة اللي بعدها ونلعب بقى حاوريني يا طيطة<< طبعًا لما قلتلها على السبب دا قالتلي ليه قالولك عليا ...!! المنطقي انك لما تتوهي من حد تقفي في مكانك لحد لما يجيلك أكيد كنت هقف مكاني

السبب التاني: أنا أخدت الشنطة ونزلت من باب استكمال المظهر مش أكتر، معرفش أصلا جواها فلوس ولا لأ والمحطة اللي بعدها مكنتش محطة تحويل.. يعني هضطر اقطع تذكرة جديدة وانا مش عارفة الشنطة أصلا جواها ايه غير المحفظة "اللي مبحطش فيها فلوس" لأني مش بركز احط ايه في الشنطة وانا ببدل بين الشنط غير في المحفظة وخاصة لما بكون خارجة مع حد مسئول عني فملوش لازمة أحمل هم حاجة تتسرق مني

طبعًا لما قلت لماما على السبب دا كمان هزئتني؛ اني المفروض بنت ومينفعش امشي من غير فلوس على الأقل 100 جنيه ؛) << أيوة أيوة كلام لكن ساعة الجد!!!!"ودا اللي بابا ياما هزأني عليه كتير رصيد الموبايل والفلوس الاتنين دول مينفعش ابقى بنت وامشي من غيرهم" وادتلي سبعة جنيه فكة
D:
****

حبيت أثبت لنفسي اني صح وهفضل صح في الوقت الغلط

مجنونة بجد

وفضيحة كمان

السبت، 4 يونيو 2011

في الطريق

بسم الله الرحمن الرحيم
السلام عليكم ورحمة الله وبركاته

دايمًا لما بكون مسافرة بتيجي على بالي مليون فكرة لكذا بوست ممكن أكتب عنهم
وديمًا طبعًا السفر بياخدني وبنسى أكتب عن الخواطر اللي جتلي
المرة دي قررت أعمل فكرة مفتكسة وهي إني أسجل الهنتس "التلميحات" عن الحاجات اللي عاوزة أكتبها
وسجلتها بالفعل في رسالة على الموبايل لكن للأسف الموبايل حاليًا مش معايا وعشان كدا هحاول افتكر بعض من هذه التلميحات واكتب عنها

***
أول تلميح كان بيقول
***

مش أي خنفس في عربية يصلح عريس
والتلميح دا كتبته لما شفت مناظر شباب اليومين دون اللي سايقين عربياتهم الملاكي على الطريق
بأمانة حاجة تغم النفس ميتقالش عليهم غير خنافس -إلا من رحم ربي-
اللي لابس سلسلة واللي لابس حلق واللي لابس حظاظة وفظاظة واللي عامل دوجلس
بجد لما بشوف المناظر دي بطني بتتقلب

وللأسف واللي ينقط أكتر لما تلاقي بنات من اللي تعرفهم شايفين إن دي أقصى طموحاتهم
واد فانكي مانكي بعربية والمقولة الشهيرة اللي بجد بتحرق دمي قويييييييييييي "حد لاقي عرسان اليومين دول"

من منطقي.. يتحرق الجواز وسنينه لو كان العريس هيبقى بالمنظر دا
ربنا يحفظنا يا رب

وترجع تلاقي الواحدة من دول بعد سنة ولا اتنين جواز راجعة بيت أهلها اسمها مطلقة ومعاها عيل
طيب وايه اللي جابرك على الوضع المنيل دامن الأول؟
مانا بطولي أهو لما اتحمل مسئولية نفسي أحسن ما اتحمل مسئولية نفسي ومعايا عيل وكمان اسمي مطلقة وتلاقي مشاكل الدنيا فوق دماغها

حقيقي نفسي افهم الناس دي بتفكر ازاي واللي ينقط أكتر لما تلاقي الواحدة منهم عندها استعداد تحب وخلاص
بتحب على نفسها بمعنى أصح ماهو عريس والسلام
اتخطبت لدا يا سلام دا ملاك ومفيش زيه فسخت الخطوبة واتخطبت لغيره تلاقيها دايبة في دباديبه
هقول برضه ربنا يعافيني
لكن انا مش متخيلة ان الحب بالساهل كدا هو انا قلبي شقة ايجار جديد؟! أي حد يخبط وياخد المفتح يقعد سنتين ويمشي ييجي غيره افتحله الباب؟!


***
دا كان بالنسبة للهنت الأول نيجي بقى للهنت التاني
***

هي مصر لسة بأمان ولا دي بلطجة؟!
لما تمشي في سفر على الطريق الزراعي وتلاقي الفلاحين والمزارعين البسطاء اللي بيزرعوا ضفاف الترع حتة كدا بتاع خمسة ستة متر
وتلاقيهم في وقت الحصاد مجمعين المحصول ونشرينه في الشمس ومحدش واقف يحرسه

هل الناس دي مطمئنة قوي كدا ان محدش هييجي يلم المحصول ويخلع!
ولا اصلا من البداية الأرض دي مش أرضهم وقالك أنا ازرعها وخلاص؟
بس برضه لو مش أرضهم مش هما صرفوا على المحصول دا لحد ما جه وقت حصاده!
حقيقي مستغربة وخاصة لما يبقى الليل مضلم ومتلاقيش فرد واحد حتى واقف بيحرس الأرض
وفكرت وقلت هل انا لو نزلت دلوقتي ولميت المحصول دا هلاقي حد طالعلي يقولي بتعملي إيه
ولا هما واثقين في ربنا قوي كدا انه مش هيضيعهم


ومش بيضيعهم!!!

***
الهنت التالت
***

إذا أكرمت الكريم ملكته وإذا أكرمت اللئيم تمرد
هي الناس دي مبتتكسفش من نفسها؟!
مبيحسوش ان اللي بيعملوه مخالف للفطرة لما يقابلوا الخير بالشر؟!


ماعلينا ناس غريبة قوي

***
الهنت الرابع
***

قمة الاستفزاز
حقيقي مش قادرة اتخيل كمية الهرجلة والفوضى اللي الشعب المصري عايش فيها
بجد بتقرف من المنظر دا بحس اني عايشة في حظيرة مش في بلد

فوضة مقززة لما تلاقي نفسك ماشي على الطريق السريع -والطريق اتجاه واحد- وتلاقي جرار غبيييييييييييييييييييييي جاي بكل برود وتناحة ومش عارفة أوصف بجد شعوري تجاه الـ........ اللي سايق الجرار دا وهو جاي بكل بلادة في الاتجاه المعاكس وبيتمخطر زي ما يكون فاكر نفسه عجلة على الطريق السريع ولا ناموسة مش هتعمل قلق لما تمشي في أي اتجاه
المنظر دا وانا رايحة
أما بقى وانا راجعة فنفس الغباء لا يمكن هيتغير دي طبيعة بشر يعني والمرادي توك توك
طيب يا بني آدم انت ضميرك مش واجعك من الغوغائية اللي انت فيها!!
خاف على حياتك لو مش خايف على حياة الناس
دانت أي عربية هتنفخك تهرسك زي صرصار الحقل

بجد حاجة تقرف لما تتخيل شخصيات بالمنظر دا

إيه البلادة ديييييييييييييييييييي؟!!!!!!!!!!!!!!!!!

***
الهنت الأخير
***

الحمد لله اني كنت مطولة أظافري
أحيانًا بحب أطول أظافري واهتم بيها -بدلع نفسي-
بجد أول مرة اعرف قيمة ان الأظافر تبقى طويلة
كنت واقفة بطبخ وبقطع بصل ومش واخدة بالي ان السكينة حامية "مسنونة" هي مش مجرد حامية هي حامية جدًاااااااااااااا
أنا صباعي كان هيطير لولا انها جت في الظافر -مأخدش في إيد السكينة غلوة-
بس بأمانة أنا اتصدمت وحمدت ربنا كتير جدًا انها جت على قد كدا
ولأني مبحبش يبقى ظافر مقصوص والباقيين لأ -لازم كلهم يبقوا طول واحد بتقرف من اللي يطول ظافر صباع واحد ويقص الباقيين أو اللي تبقى أظافرها مش طول واحد منظر بيستفزني- فطبعًا اضطريت أقص باقي الأظافر

وكل دا في سبيل أكلة معكرونة


***

بس أقولكم على أجدع حاجة في السفر بقى!!

لما يبقى فيه عربية ماشية جنبك أو قدامك وراكب فيها عيل صغير ودي دايمًا بتحصل معايا وتفضل تشاغله طول الطريق

بس ابقوا خلوا بالكم يا بنات أحسن يكون قاعد جنب النونو واحد كبير :S
إحم إحم

الجمعة، 3 يونيو 2011

مشتتة


بسم الله الرحمن الرحيم
السلام عليكم ورحمة الله وبركاته
مش عارفة الأفضل أكتب دلوقتي ولا استنى شوية لما أنام وأصحى؟!

لكن بما إني بدأت خليني أكتب موجزات
_____
أسبوعين يمكن تلاتة جو ومناخ جديد
***
حوائط تناجي بعضها وأنا قابعة بينها
***
يوم حافل وجو مشمس ومشوار طويل وخصام بدون كلام
***
أرجوك لقد ارتحت لوجودك وشعرت بالأمان فلا تتركني وتذهب .. وصلني إحساسك ولكن ماذا أفعل؟! لقد حدث ما حدث ولن أتراجع .. يا رب احمني
***
خير تعمل شر تلقى؟! التوبة البناءة..من أعمالكم سلط عليكم.. كان بإيدي إيه أعملهولك؟! انت اللي جنيت على نفسك
____
يمكن أرجع في يوم تاني أفسر بعض طلاسم البوست دا ويمكن ميحصلش بس غالبًا دا كان ملخص شعور ومواقف مريت بيها الفترة اللي فاتت

تصبحوا على أي حاجة حلوة