الأحد، 29 نوفمبر 2009

وقالي وقلتله

قال لي: على رمش عيونها قابلت هوى طار عقلي مني وقلبي هوى

قلت له: عينك عللي رايحة والي جاية واتقابل دية تنسى دية وانا واقفة وشايفة ده بعنية ليه شايف نفسك ليييه

قال لي:
وانا ياللي كنت طبيب الهوى ولأهل العشق ببيع الدوى من نظرة لاقتني صريع الهوى يااا يا بوي

قلت له: لا دا بعدك عارفة قصدك ايه في ايه قلي مالك ايه في بالك فوق بقى من الي بقيت فيه

قال لي:
خدني شوقي لاقتني بروح عندها حد تاني سبقني وخاد يدها

قلت له: يوماتي عارفة وسامعة عليك كان ليك قول كده كام ألف حكاية يوماتي نفسك افكر فيك واناديك وتلاقي كلام ويايا يا ريتك انت تسيبك مني افهمني انا عارفة الي فيها

قال لي:
وحتى ان كنت مش جنبى بشوفك قرب انا قلبى واحس ان انت جوايا يا كل منايا وحبايبى

قلت له: عامل انت مشكله يعني لسه محتار ناسي ان قلبي اختار ايوه قلبي اختار يامجنون مش انا ليلي ولا بنسمة هواك مايلة

السبت، 28 نوفمبر 2009



الله أكبر الله أكبر الله أكبر... لا إله إلا الله
الله أكبر الله أكبر ... ولله الحمد
الله أكبر كبيرا... والحمد لله كثيرا
وسبحان الله بكرة وأصيلا...لا إله إلا الله
وحده...صدق وعده ... ونصر عبده ... وأعز جنده وهزم الأحزاب وحده
لا إله إلا الله...ولا نعبد إلا إياه... مخلصين له الدين ولو كره الكافرون
اللهم صلي على سيدنا محمد
وعلى آل سيدنا محمد
وعلى زوجات سيدنا محمد
وعلى أصحاب سيدنا محمد
وعلى ذرية سيدنا محمد وسلم تسليما كثيرا
لا إله إلا الله

الله أكبر الله أكبر الله أكبر ... لا إله إلا الله
الله اكبر الله أكبر ... ولله الحمد

*******************
يوم مميز جدا
أوله وأهم حاجة فيه طبعا أني لحقت أول تكبيرة في المسجد
أصلي فاشلة وكل عيد بوصل عالركعة الأخيرة
المرادي قلت يا بنت خليكي ذكية شوية انتي لما بتروحي للجامع البعيد مش بتلحقي الصلاة
مع انك بتاخدي حسنات على طول المسافة اللي بتمشيها
وآجي بعد مالإمام يخلص صلاة أدور على المساجد اللي بتبدأ متأخر ألاقيهم خلصوا هما كمان
وأرجع زي قلتي
لكن السنادي الحمد لله
آي نعم صليت في المسجد اللي جنب البيت لكن عالأقل لحقت أول تكبيرة
ورجعت كالعادة بعد الصلاة من طريق مختلف عن اللي جيت منه ورحت لتيتة أول حاجة
فضلت قاعدة مع خالتي شوية لأن تيتة كانت في القاهرة
روحت البيت بقى علشان أشارك في تجهيز وليمة الغداء لصحباتاتي وحبايب قلبي سارة وسلمى وجهاد
"واخدين بالكم انتوا من مصطلح وليمة ده؟!!" محسسة نفسي اني عزمتهم على خروف ولا حاجة
يا جماعة عوزة أقولكم اننا ضحينا السنادي بكتكوت
المهم وكما كان متوقع سلمى مقدرتش تيجي
بس بجد اليوم كان في منتهى الروعة وأعتقد اني متبسطش بالشكل ده بقالي فترة كبيرة جدا
طبعا اليوم كان ناقصه سلمى
لكن بجد كان في منتهى اللذاذة
أتمنى انه يكون كدة بالنسبالكم انتوا كمان "جهاد وسارة"

بالمناسبة يا سارة سحر بتسألك عن اسم البرفيوم بتاعك لأنه عاجبها قوي "أصلي بلطجت عليها يا جماعة و غرقت نفسي بيه ماهي فرصة بقى اني قاعدة في البيت أستغلها شوية"

عارفة طبعا اني كنت قايمة بدور الجرسون على أكمل وجه
وطبعا كنت كفائة في عمل الشاي مش كدة يا جيجي!!!
ولا ايه بقى عليا شوية كرم إوعى وشك

أنا بجد يا بنات كنت سعيدة جدا ربنا يخليكم ليا

جيجي إوعي تنسي المرة الجاية عندك ومترديهاليش وتلطعينا سنة زي مانا عملت فيكم
سارة طلعت أجدعنا خلصت في ساعتها أول ما قلنا يا عزومات وفت بالوعد
جدعة يا سوستة

عوزاكم بقى تشكروا في الرز اللي أنا عملته
وتمشوا تقولوا للناس كلها أيوة ماهي مش عزومة ببلاش كدة
الواحدة برضه تطلعلها بعريس ولا حاجة

الأربعاء، 18 نوفمبر 2009

قالب على ما تفرج

مش فاهمة ليه المدونة دي بالذات مش راضية تقبل ولا قالب

واللي تقبله النهاردة متقبلوش بكرة

واللي تقبله عالفير فوكس متقبلوش عالاكسبلورير

أعمل ايه بس معاكي

اشمعنى انتي؟؟

انا هحط أي قالب دلوقتي على ما تفرج وأفضلها

لأن وقتي محدود جدا عالنت

أنا لو أذيتك كنتي عملتي زيادة عن كدة إيه؟!

بالعكس عمري ماخدت منك نص اللي أنا بديه

الأحد، 15 نوفمبر 2009

من تاني مقدرتش استغنى

بسم الله الرحمن الرحيم
السلام عليكم ورحمة الله وبركاته

أعترف أنه كان قرار خاطئ أنني قررت حذفك

لكن مقدرتش أتحمل

كان لازم أرجعلك تاني

وبعد تسع شهور

وأبدأ معاكي من تاني

من أول لينك ليكي

ومن أول قالب اختارته ليكي

يا غالية عندي

يا نفسي ومع نفسي

وإن كان القالب القديم راح إن شاء الله هقدر أرجعه

وإن كانت المقالات القديمة راحت

بعون الله هكتب من تاني

طول ما ربنا مقدرلي

ياااااااااااااااااااه

يا غالية عندي